1 Mga Hade 11 - Marahay na Bareta Biblia

Nagtalikod sa Dios si Solomon

¹ Namoot si Solomon sa dakul na babaeng dayuhan. Pwera sa aking babae kan hade nin Egipto, nag-agom pa siya nin mga babaeng Moabita, Ammonita, Edomita, Sidoneo, asin Heteo.

² Inagom niya an mga babaeng ini maski pinagbotan nin Kagurangnan an mga Israelita na dai makipag-agoman sa mga tawong ini, huli ta dadagkahon ninda an mga Israelita na maglingkod sa saindang mga dios-dios.

³ Igwa si Solomon nin syete syentos na agom na mga prinsesa, asin tres syentos na kasaroan; pinaharayo ninda sa Dios an puso ni Solomon.

⁴ Kan gurang na si Solomon, dinagka siya kan saiyang mga agom na magsamba sa mga dios-dios. Dai siya nagin maimbod sa Kagurangnan na saiyang Dios, bakong arog kan saiyang ama na si David.

⁵ Nagsamba siya ki Astarte, an diosa nin Sidon, asin ki Molek, an makauuyam na dios nin Ammon.

⁶ Nagkasala siya tumang sa Kagurangnan asin dai siya nagsunod saiya, bakong arog kan saiyang ama na si David.

⁷ Sa bukid sa sirangan nin Jerusalem, nagpatugdok siya nin sarong altar para ki Kemos, an makauuyam na dios nin Moab, asin para ki Molek, an nakakauuyam na dios nin Ammon.

⁸ Nagtugdok man siya nin mga altar tanganing an saiyang mga agom magtutong nin insenso asin magdolot nin mga sakripisyo sa saindang sadiring mga dios.

⁹ Kaya naanggot ki Solomon an Kagurangnan huli ta nagtalikod siya sa Kagurangnan, an Dios nin Israel, na duwang beses na nagpahiling saiya

¹⁰ asin nagboot na dai siya magsamba sa mga dios-dios; alagad linapas ini ni Solomon.

¹¹ Kaya nagtaram an Kagurangnan ki Solomon, “Huli ta dai mo inotob an sakong tipan asin linapas mo an sakong mga pagboot, hahaleon ko saimo an kahadean asin itatao ko sa saro mong opisyal.

¹² Alagad huli sa saimong ama na si David, dai ko ini gigibohon sa panahon mo kundi sa panahon kan saimong aki.

¹³ Alagad dai ko man gabos hahaleon saiya an kahadean; itatada ko saiya an sarong tribu huli ki David na sakong sorogoon, asin huli sa Jerusalem na sakong pinili.”

An mga Kaiwal ni Solomon

¹⁴ Kaya an Kagurangnan nagbugtak nin sarong kaiwal ni Solomon na iyo an Edomitang si Hadad, na gikan sa pamilya nin mga hade sa Edom.

^15-16 Bago mangyari ini, kan masakop ni David an Edom, si Joab na pamayo kan saiyang hukbo nagduman tanganing maglubong kan mga gadan. Anom na bulan siyang nag-ontok sa Edom, kaiba an saiyang mga tawohan, asin sa panahon na iyan ginaradan ninda an gabos na lalaki sa Edom

¹⁷ pwera ki Hadad na aki pa kaidto asin an nagkapirang Edomitang sorogoon kan ama kaini, na nagdurulag pasiring sa Egipto.

¹⁸ Hale sa Midian nagpasiring sinda sa Paran saen may nagkapirang lalaki na nag-apil sainda. Dangan nagpasiring na sinda sa Egipto, nagduman sa hade asin tinawan kan hade si Hadad nin daga, harong, saka pagkakan.

¹⁹ Nawilihan nin marahay kan hade nin Egipto si Hadad, kaya ipinaagom niya ki Hadad an tugang na babae ni Reyna Tapenes, na saiyang agom.

²⁰ Inaki kan agom ni Hadad si Genubat, na pinadakula kan reyna sa palasyo, kaiba kan mga aking lalaki kan hade.

²¹ Kan mabaretaan ni Hadad sa Egipto na gadan na si David asin gadan na man si Joab na pamayo kan hukbo, nagsabi siya sa hade, “Tugote akong magbalik sa sadiri kong daga.”

²² “Igwa daw ako nin pagkukulang saimo kaya boot mong magbalik sa saimong banwa?” an hapot kan hade. “Tugote sana akong magbalik,” an simbag ni Hadad sa hade. Kaya nagbalik siya sa saiyang daga. Bilang hade nin Edom, si Hadad nagin maraot saka makuring kaiwal nin Israel.

²³ An Dios nagbugtak pa nin sarong kaiwal ni Solomon, na iyo si Rezon na aking lalaki ni Eliada. Nagdulag si Rezon sa saiyang kagurangnan, si Hadadezer na hade nin Zoba,

²⁴ asin nagin lider nin sarong grupo nin mga tulisan. (Nangyari ini pakatapos na madaog ni David si Hadadezer asin magadan an mga kaalyansa niyang taga Siria.) Nagpasiring sa Damasco si Rezon kaiba an saiyang mga tawohan asin duman sinda nag-erok. Duman ginibo siyang hade nin Siria kan saiyang mga tawohan.

²⁵ Nagin kaiwal kan Israel si Rezon sa bilog na panahon kan paghahade ni Solomon.

An Panuga nin Dios ki Jeroboam

²⁶ An saro pang tawo na nagrebelde ki Solomon iyo an saro niyang opisyal, na si Jeroboam na aking lalaki ni Nebat, na taga Zereda nin Efraim. Saro nang balo an saiyang ina, na an ngaran si Zerua.

²⁷ Iyo ini an istorya kan pagrebelde ni Jeroboam. Pinapatambakan kaidto ni Solomon nin daga an sirangan na parte kan Jerusalem asin ipinapahirahay an mga kudal kan syudad.

²⁸ Si Jeroboam sarong lalaki na igwa nin kakayahan, asin kan mahiling ni Solomon an kahigosan ni Jeroboam sa pagtrabaho, ibinugtak niya ini bilang parapamahala kan mga tawong pirit na pinapagtrabaho sa teritoryo kan mga tribu ni Manases asin ni Efraim.

²⁹ Sarong aldaw, nagluwas si Jeroboam sa Jerusalem asin sinabat siya sa dalan kan propetang si Ahias na taga Shilo. An propeta nakasulot nin bagong alikboy asin sinda sanang duwa an yaon duman sa kahiwasan.

³⁰ Hinuba ni Ahias an saiyang sulot na bagong alikboy, dangan ginisi sa doseng pedaso.

³¹ Sinabihan niya si Jeroboam, “Kuaha an sampolong pedaso, huli ta nagtataram saimo an Kagurangnan, an Dios nin Israel, ‘Hahaleon ko ki Solomon an kahadean, asin itatao ko saimo an sampolong tribu.

³² Matatada ki Solomon an sarong tribu huli sa sakong sorogoon na si David asin huli sa Jerusalem, an syudad na pinili ko sa gabos na tribu nin Israel.

³³ Gigibohon ko ini huli ta isinikwal ako ni Solomon asin nagsamba siya sa mga dayuhan na dios: ki Astarte, an diosa nin Sidon; ki Kemos, an dios nin Moab; asin ki Molek, an dios nin Ammon. Tinalikodan ako ni Solomon; nagkasala siya asin dai niya inotob an sakong mga togon saka mga pagboot, bakong arog kan gibo kan saiyang ama na si David.

³⁴ Alagad dai ko hahaleon ki Solomon an bilog na kahadean. Mapadagos siya sa saiyang paghahade sagkod na siya buhay huli sa pinili kong sorogoon na si David, na nagkuyog kan sakong mga togon saka pagboot.

³⁵ Hahaleon ko an kahadean sa aki ni Solomon asin itatao ko saimo an sampolong tribu.

³⁶ Alagad an sarong tribu itatao ko sa saiyang aking lalaki, tanganing danay akong igwa nin sarong kapagarakian kan sorogoon kong si David na naghahade sa Jerusalem, an syudad na pinili ko tanganing bugtakan kan sakong ngaran.

³⁷ Gigibohon takang hade nin Israel, asin ika an maghahade sa gabos na teritoryo na saimong mawoton.

³⁸ Kun kukuyogon mo nanggad ako, mamumuhay sosog sa sakong katogonan, asin maggigibo kan matanos sa atubang ko huli sa pag-otob kan sakong mga togon saka mga pagboot siring kan ginibo kan sorogoon kong si David, danay takang iibahan. Gigibohon takang hade nin Israel asin gigibohon kong hade an saimong mga kapagarakian bilang kasalihid mo, siring kan ginibo ko para ki David.

³⁹ Huli kan kasalan ni Solomon, papadusahan ko an mga kapagarakian ni David, alagad bakong sagkod lamang!’”

⁴⁰ Huli kaini, hinanap ni Solomon si Jeroboam tanganing gadanon, alagad nakadulag siya pasiring ki Hadeng Sisak nin Egipto asin duman siya nag-ontok sagkod na magadan si Solomon.

An Pagkagadan ni Solomon

⁴¹ An iba pang gibo ni Solomon, an saiyang paghade asin an saiyang kadonongan, gabos nakasurat sa librong “An Kasaysayan ni Solomon.”

⁴² Kwarentang taon niyang pinaghadean an bilog na Israel sa Jerusalem.

⁴³ Nagadan siya asin ilinubong sa Syudad ni David. Nagin kasalihid niya bilang hade an saiyang aking si Rehoboam.