1 Mga Hade 10 - Marahay na Bareta Biblia

An Pagdalaw kan Reyna nin Sheba

¹ Nadangog kan reyna nin Sheba an kabantogan ni Solomon, kaya nagduman siya tanganing baloon si Solomon sa paagi nin mga dipisil na hapot.

² Nag-abot siya sa Jerusalem kaiba an kadakul na sorogoon, mga kamelyo na may kargang mga pahamot, dakul na bulawan saka mga mahalagang bato. Kan mag-abot an reyna, sinaro-saro niya ki Solomon an gabos na hapot na nasa isip niya.

³ Sinimbag ni Solomon an gabos na kahapotan niya; mayo nin hapot na dipisil para saiya.

⁴ Nadangog kan reyna nin Sheba an kadonongan ni Solomon asin nahiling niya an palasyo na saiyang itinugdok.

⁵ Nahiling niya an pagkakan sa saiyang lamesa, an mga erokan kan saiyang mga opisyal, an marahay na paglingkod kan saiyang mga sorogoon saka an mga gubing na sulot ninda, an mga naglilingkod sa saiyang lamesa, asin an saiyang mga tinutong na atang na idinodolot niya sa Templo. Nagngalas siya nin marahay sa mga nahiling niya.

⁶ Nagsabi siya sa hade, “Totoo an baretang nadangog ko sa sadiri kong daga manongod sa mga gibo mo asin sa saimong kadonongan.

⁷ Alagad dai ako nagtubod kan mga bareta sagkod na nagdigdi ako asin nahiling kan sadiri kong mga mata. Alagad kabanga sana kan bareta an nadangog ko; an saimong kadonongan asin kayamanan orog nin marahay ki sa ibinareta sako.

⁸ Paladan an saimong mga agom! Paladan an mga sorogoon mong ini, na danay na naglilingkod sa atubang mo asin naghihinanyog kan saimong kadonongan.

⁹ Pag-omawon an Kagurangnan na saimong Dios, na nawiwili saimo asin nagpapatukaw saimo sa trono nin Israel! Huli ta namomoot sa Israel sagkod lamang an Kagurangnan, ginibo ka niyang hade tanganing papagdanayon mo an hustisya saka an katanosan.”

¹⁰ Itinao niya ki Hadeng Solomon an mga regalong dara niya: sobra sa kwatro mil na kilo nin bulawan asin dakul na pahamot saka mga mahalagang bato. An halaga kan mga pahamot na itinao niya ki Solomon iyo an pinakadakul sa mga inako na ni Solomon. (

¹¹ An mga barko ni Hiram na nagdara nin bulawan hale sa Ofir, nagdara man hale duman nin dakul na kahoy na almug asin mga mahalagang bato.

¹² An mga kahoy ginibo ni Solomon na mga harigi kan Templo asin kan palasyo; ginibo man niya iyan na mga lira asin arpa para sa mga paraawit. Mayo na nin nag-abot o nahiling na kahoy na almug sagkod ngunyan.)

¹³ Itinao ni Hadeng Solomon sa reyna nin Sheba an gabos na hinagad kaini laen pa kan ibang mga regalo na tudok sa puso na itinao niya saiya. Dangan nagbalik an reyna sa sadiri niyang daga, kaiba an saiyang mga sorogoon.

An Kayamanan ni Solomon

¹⁴ Taon-taon, haros beynte y tres mil na kilo nin bulawan an nag-abot ki Hadeng Solomon,

¹⁵ laen pa kan mga buhis na ibinayad kan mga negosyante, kan ganansya sa negosyo, asin kan buhis na ibinayad kan mga hade sa Arabia patin kan mga gobernador sa mga distrito nin Israel.

¹⁶ Naggibo si Solomon nin duwang gatos na darakulang kalasag na an lambang saro patos nin haros pitong kilong bulawan.

¹⁷ Naggibo man siya nin tolong gatos na saradit na kalasag na an lambang saro patos nin haros duwang kilong bulawan. Ibinugtak niya an mga kalasag sa Sala kan Kadlagan nin Lebanon.

¹⁸ An Hade naggibo man nin dakulang tronong marpil na pinatos niya nin purong bulawan.

¹⁹ Igwa nin anom na tangga an trono, asin sa likod kaini igwa nin payo nin baka. An tukawan igwa nin pahingaloan nin takyag sa lambang gilid asin nagtitindog an duwang pormang leon sa gilid kan mga pahingaloan nin takyag.

²⁰ Sa anom na tangga igwa nin nakatindog na doseng pormang leon, sarong pormang leon sa lambang poro kan tangga. Mayo pa nin tronong ginibo na arog kaini sa arin man na kahadean.

²¹ Bulawan an gabos na inoman na kalis ni Hadeng Solomon asin purong bulawan man an gabos na kagamitan sa Sala kan Kadlagan nin Lebanon. Mayong platang ginamit huli ta ibinilang ini na mayo nin halaga sa panahon ni Solomon.

²² An hade igwa nin mga barko na naglalayag sa dagat kaiba an mga barko ni Hiram. Makasaro sa lambang tolong taon minaabot an saiyang mga barko na may mga darang bulawan, plata, marpil, mga kabalang asin mga pabo.

²³ Orog na mayaman asin madonong si Hadeng Solomon ki sa ibang hade

²⁴ asin an bilog na kinaban nagmawot na makaatubang ki Solomon tanganing hinanyogon an kadonongan na itinao nin Dios saiya.

²⁵ An lambang saro sainda nagdara kan saiyang regalo, mga kagamitan na bulawan saka plata, mga gubing, mga armas, mga pahamot, mga kabayo, sagkod mga mula; danay ining nangyayari taon-taon.

²⁶ Nagtipon si Solomon nin dakul na karwahe asin kabayo: mil kwatro syentos an saiyang mga karwahe asin dose mil an nakakabayong mga soldados. An iba sainda ibinugtak niya sa Jerusalem asin an natada ibinugtak niya sa manlaen-laen na syudad.

²⁷ Sa Jerusalem, kan panahon ni Solomon, an plata ordinaryo sana siring sa gapo, asin an sedro arog kadakul kan ordinaryong kahoy na sikomoro duman sa Sefela.

²⁸ An mga kabayo ni Solomon hale pa sa Egipto saka sa Kue, asin an saiyang mga negosyante an minabakal kaiyan sa Kue sa talaan na presyo.

²⁹ Ipinabakal ninda an lambang karwahe sa kantidad na seis syentos na pedaso nin plata asin syento singkwenta an lambang kabayo. An mga karwahe asin mga kabayo ipinabakal ninda sa mga hade kan mga Heteo saka kan mga taga Siria.