1 Mga Cronica 28 - Marahay na Bareta Biblia

Mga Pagboot ni David Manongod sa Templo

¹ Tiniripon ni David sa Jerusalem an mga opisyal nin Israel, an mga opisyal kan mga tribu, an mga pamayo kan mga grupong naglilingkod sa hade, an mga opisyal nin mga rinibo saka mga ginatos, an mga administrador kan gabos na rogaring saka mga hayop kan hade saka kan saiyang mga aking lalaki, dangan an gabos na opisyal, an makokosog na mga lalaki asin an mga bantog na paralaban.

² Nagtindog si David sa atubangan ninda asin nagsabi: “Magdangog kamo, mga tugang asin mga kahimanwa. Nasa puso ko na kaidto an pagtugdok nin sarong harong na bugtakan kan Kaban nin Tipan, an tungtongan kan Kagurangnan na satong Dios. Inandam ko na an mga kagamitan para sa pagtugdok kan templo,

³ alagad sinabihan ako nin Dios, ‘Bako ika an matugdok nin harong para sako, huli ta soldados ka asin nagpabulos ka nin dakul na dugo.’

⁴ Alagad pinili ako nin Kagurangnan na Dios nin Israel na maghade sagkod pa man sa Israel. Pinili niya an tribu ni Juda bilang pamayo; asin gikan sa tribu ni Juda pinili niya an pamilya nin sakong ama. Sa mga aking lalaki nin sakong ama, naogma siyang pilion ako na magin hade kan bilog na Israel.

⁵ Tinawan niya ako nin dakul na aking lalaki, asin sa sainda pinili niya si Solomon na sakong aki na maghade sa Israel, an kahadean nin Kagurangnan.

⁶ “Nagtaram sako an Kagurangnan, ‘An saimong aki na si Solomon iyo an matugdok kan sakong Templo, huli ta pinili ko siya na magin aki ko, asin ako an magigin ama niya.

⁷ Papadanayon ko an saiyang kahadean kun padagos siyang magkuyog kan sakong mga togon saka mga pagboot arog kan ginigibo niya ngunyan.’

⁸ “Kaya ngunyan, banwaan ko, sa atubangan nin satuyang Dios asin kan katiriponan na ini nin Israel, an banwaan nin Kagurangnan, manuga kamo na kukuyogon nindo an gabos na togon nin Kagurangnan na satuyang Dios, tanganing padagos nindong masadirihan an marahay na dagang ini dangan ikawalat nindo iyan bilang pamana sa saindong mga aki sagkod pa man.”

⁹ Dangan sinabihan ni David si Solomon, “Aki ko, midbidon mo an Dios nin saimong ama, asin paglingkodan mo siya sa bilog mong puso asin makinuyog-kuyog na pag-isip, huli ta sinisiyasat nin Kagurangnan an gabos na puso asin naaaraman niya an lambang pag-isip saka pagmawot. Kun hanapon mo siya, makukua mo siya; kun talikodan mo siya papabayaan ka niya sagkod lamang.

¹⁰ Saboton mo nanggad na pinili ka nin Kagurangnan tanganing magtugdok kan saiyang banal na Templo; pagmakosog asin gibohon mo iyan.”

¹¹ Itinao ni David ki Solomon an plano kan balkon kan Templo, kan manlaen-laen na edipisyo kaini, an plano kan mga kwartong sarayan kan kayamanan asin kan iba pang mga kwarto, saka an plano kan Kabanal-banaleng lugar saen pinapatawad an mga kasalan.

¹² Itinao man niya ki Solomon an plano kan gabos na inisip niya para sa patyo asin mga kwarto sa palibot, sa mga sarayan kan mga kagamitan sa Templo saka mga regalong dolot sa Kagurangnan.

¹³ Itinao man saiya ni David an plano kan paggrupo-grupo kan mga padi saka mga Levita para sa saindang paglingkod sa Templo, asin para sa pag-ataman kan gabos na kagamitan sa laog kaini.

¹⁴ Tinukdoan niya ini kan tamang timbang nin bulawan saka plata na gagamiton para sa paggibo kan lambang kasangkapan,

¹⁵ kan lambang ilawan asin kandelero.

¹⁶ Itinukdo man niya an tamang timbang nin bulawan na gagamiton sa pagkalopkop kan lambang lamesa na bubugtakan kan mga dolot na tinapay, asin an tamang timbang nin plata para sa mga platang lamesa.

¹⁷ Itinukdo pa niya an tamang timbang nin purong bulawan na gagamiton sa paggibo nin mga tinidor, mga palanggana saka mga kalis; dangan an tamang timbang nin bulawan saka plata na gagamiton sa paggibo kan mga mangko;

¹⁸ siring man an tamang timbang nin purong bulawan na gagamiton sa paggibo kan altar nin insenso, asin sa paggibo kan karwahe kan mga kerubin na unat an mga pakpak asin minatahob kan Kaban nin Tipan nin Kagurangnan.

¹⁹ Nagsabi si David, “Ini gabos nasusurat sa planong ginibo sosog sa mga katukdoan na ipinapakuyog sako nin Kagurangnan.”

²⁰ Dangan sinabihan ni David si Solomon na saiyang aki, “Pagmakosog asin pagmaisog. Gibohon mo an trabaho; dai ka matakot ni manluya an boot, huli ta iibahan ka kan Kagurangnan Dios, na sakuyang pinaglilingkodan. Dai ka niya papabayaan sagkod na matapos an gabos na trabaho sa Templo.

²¹ Natawan na nin mga katongdan sa Templo an mga padi saka mga Levita. Andam sa pagtabang saimo an gabos na tawong igwa nin kakayahan. An gabos na opisyal asin an bilog na banwaan nasa irarom kan saimong pagboot.”