1 Mga Cronica 24 - Marahay na Bareta Biblia

An Katongdan kan mga Padi

¹ Iyo ini an mga grupo kan kapagarakian ni Aaron. An mga aking lalaki ni Aaron iyo si Nadab, Abihu, Eleazar, saka si Itamar.

² Enot na nagadan ki sa saindang ama si Nadab saka si Abihu, asin dai sinda nagkaigwa nin mga aki; kaya si Eleazar asin si Itamar iyo an nagin mga padi.

³ Sa tabang ni Zadok na saro sa kapagarakian ni Eleazar, saka ni Ahimelec na saro sa kapagarakian ni Itamar, pinaggrupo-grupo ni David an kapagarakian ni Aaron sosog sa saindang mga katongdan nin paglingkod.

⁴ An kapagarakian ni Itamar pinag-organisar sa walong grupo sana; mantang an kapagarakian ni Eleazar sa dyes y seis na grupo. Ginibo ini huli ta mas dakul an mga lalaking pamayo nin pamilya sa kapagarakian ni Eleazar ki sa ki Itamar.

⁵ Huli ta anas igwa nin mga opisyal kan templo saka mga opisyal nin Dios an kapagarakian ni Eleazar asin ni Itamar, an pag-organisar sainda ginibo sa paagi nin ripa.

⁶ Turno-turno an kapagarakian ni Eleazar asin ni Itamar sa pagripa. An eskriba na si Semaias, na aking lalaki ni Netanel, iyo an nagtala kan saindang mga ngaran sa atubangan kan hade, kan mga opisyal, kan padi na si Zadok, ni Ahimelec na aking lalaki ni Abiatar, asin kan mga pamayo kan mga pamilya nin mga padi saka nin mga Levita.

⁷ Iyo ini an orden kan beynte y kwatrong grupo nin mga pamilya na tinarawan nin mga trabaho: enot si Joiarib, ikaduwa si Jedaias,

⁸ ikatolo si Harim, ikaapat si Seorim,

⁹ ikalima si Malkias, ikaanom si Mijamin,

¹⁰ ikapito si Hakkoz, ikawalo si Abias,

¹¹ ikasiyam si Jesua, ikasampolo si Secanias,

¹² ikaonse si Eliasib, ikadose si Jakim,

¹³ ikatrese si Huppa, ikakatorse si Jesebeab,

¹⁴ ikakinse si Bilga, ikadyes y seis si Immer,

¹⁵ ikadyes y syete si Hezir, ikadyes y otso si Hapizez,

¹⁶ ikadyes y nuebe si Petaias, ikabeynte si Jehezkel,

¹⁷ ikabeynte y uno si Jakin, ikabeynte y dos si Samuel,

¹⁸ ikabeynte y tres si Delaias, ika beynte y kwatro si Maazias.

¹⁹ Bilang katongdan nin paglingkod, an mga lalaking ini minaduman sa Templo sosog sa paaging itinao sainda ni Aaron na saindang ginikanan, siring kan pagboot nin Kagurangnan na Dios nin Israel.

An Lista kan mga Levita

²⁰ Iyo ini an iba pang mga pamayo nin mga pamilya na naggikan ki Levi: Jedeias, saro sa kapagarakian ni Amram na gikan ki Sebuel;

²¹ Issias, saro sa kapagarakian ni Rehabias;

²² Jahat, saro sa kapagarakian ni Izar na gikan ki Selomit;

²³ An mga aking lalaki ni Hebron: enot si Jerias, ikaduwa si Amarias, ikatolo si Jahaziel, ikaapat si Jekameam;

²⁴ Samir, saro sa kapagarakian ni Uzziel na gikan ki Mikas;

²⁵ Zacarias, saro sa kapagarakian ni Uzziel na gikan ki Issias, na tugang na lalaki ni Mikas.

²⁶ An mga kapagarakian ni Merari na iyo si Mali, Musi, saka Jaazias;

²⁷ igwa nin tolong aking lalaki si Jaazias na iyo si Soham, Zaccur, asin Ibri;

^28-29 an mga aking lalaki ni Mali na iyo si Eleazar saka si Kis. Dai nagkaigwa nin aking lalaki si Eleazar, alagad si Kis igwa nin saro, si Jerameel;

³⁰ an mga aking lalaki ni Musi iyo si Mali, Eder, asin Jerimot. Ini gabos iyo an mga pamilya kan mga Levita.

³¹ Sa atubangan ni Hadeng David, ni Zadok, ni Ahimelec, asin kan gabos na pamayo kan mga pamilya nin mga padi saka mga Levita, nagripa man an lambang pamayo nin pamilya asin an sarong ngohod na tugang na lalaki kaini, siring kan ginibo kan saindang mga kadugo, an mga padi na naggikan ki Aaron.