1 Mga Cronica 23 - Marahay na Bareta Biblia

¹ Kan gurang nang marahay si David, ginibo niyang hade nin Israel si Solomon na saiyang aking lalaki.

An Trabaho kan mga Levita

² Tinipon ni David an gabos na lider nin Israel, an mga padi saka an mga Levita.

³ Binilang niya an gabos na lalaking Levita, na treyntang taon an edad paitaas; an kabilogan na bilang uminabot sa treynta y otso mil.

⁴ An beynte y kwatro mil sainda ginibo ni David na mga parapamahala kan trabaho sa Templo; an seis mil ginibo niyang mga opisyal asin mga hukom;

⁵ an kwatro mil ginibo niyang mga bantay kan mga trangkahan; saka an kwatro mil ginibo niyang mga parakanta nin kaomawan sa Kagurangnan, na gamit an mga instrumento na ginibo niya para sa katuyohan na iyan.

⁶ Binaranga ni David an mga Levita sa tolong grupo sosog sa mga kamaganakan ni Gerson, ni Kohat, asin ni Merari.

⁷ An duwang aking lalaki ni Gerson iyo si Ladan saka si Simei.

⁸ An tolong aking lalaki ni Ladan iyo si Jehiel, si Zetam, saka si Joel,

⁹ na mga pamayo kan mga kamaganakan na gikan ki Ladan. (An tolong aking lalaki ni Simei iyo si Selomot, Haziel, asin Haran.)

¹⁰ An apat na aking lalaki ni Simei iyo si Jahat, Zina, Jeus, saka Berias.

¹¹ Si Jahat iyo an pamayo, ikaduwa si Ziza; dai nagkaigwa nin dakul na kapagarakian si Jeus saka si Berias, kaya ibinilang sindang saro sanang kamaganakan.

¹² An apat na aking lalaki ni Kohat iyo si Amram, Izar, Hebron, saka Uzziel.

¹³ An mga aking lalaki ni Amram iyo si Aaron asin si Moises. Linaen si Aaron dangan an saiyang kapagarakian, tanganing sagkod pa man sinda an mamahala kan mga banal na bagay, magtutong nin insenso sa atubangan nin Kagurangnan, maglingkod saiya asin tanganing magbendisyon sa mga tawo sa ngaran nin Kagurangnan.

¹⁴ Alagad an mga aking lalaki ni Moises, an sorogoon nin Dios, ibinilang man sa tribu ni Levi.

¹⁵ An mga aking lalaki ni Moises iyo si Gerson saka si Eliezer.

¹⁶ An pamayo kan mga aking lalaki ni Gerson iyo si Sebuel.

¹⁷ Saro sana an nagin aking lalaki ni Eliezer, si Rehabias, na nagkaigwa nin dakul na kapagarakian.

¹⁸ An pamayo kan mga aking lalaki ni Izar iyo si Selomit.

¹⁹ Apat an nagin aking lalaki ni Hebron: si Jerias an pamayo, ikaduwa si Amarias, ikatolo si Jahaziel, asin ikaapat si Jekameam.

²⁰ An mga aking lalaki ni Uzziel iyo si Micas an pamayo, saka si Issias.

²¹ An mga aking lalaki ni Merari iyo si Mali saka si Musi. An mga aking lalaki ni Mali iyo si Eleazar asin si Kis.

²² Nagadan si Eleazar na mayong aking lalaki kundi mga babae sana; inagom an mga ini kan saindang mga kadugo, kan mga aking lalaki ni Kis.

²³ An tolong aking lalaki ni Musi iyo si Mali, Eder, asin Jerimot.

²⁴ Iyo ini an mga kapagarakian ni Levi, sosog sa saindang mga kamaganakan asin mga pamilya. Nakalista an ngaran kan lambang saro sainda na an edad magpoon beynte paitaas; igwa man sinda nin trabaho sa Templo nin Kagurangnan.

²⁵ Nagsabi si David, “Tinawan nin Kagurangnan, an Dios nin Israel, nin katoninongan an saiyang banwaan; mag-erok siya sa Jerusalem sagkod lamang.

²⁶ Kaya an mga Levita dai na kaipuhan magdara kan Tabernakulo asin kan mga kasangkapan na ginagamit sa pagsamba.”

²⁷ Sosog sa mga huring katukdoan ni David, an gabos na Levita itatalaan para sa paglingkod pag-abot ninda sa edad na beynte.

²⁸ An katongdan ninda iyo an pagtabang sa mga aking lalaki ni Aaron sa paglingkod kan mga ini sa Templo, an pag-ataman kan mga patyo asin kan mga kwarto, an paglinig kan banal na mga kagamitan, saka an paggibo kan anoman na trabaho sa Templo.

²⁹ Matabang man sinda sa pag-andam kan tinapay na dolot sa Dios, kan arina para sa dolot na pagkakan, kan maninipis na mga tinapay na mayo nin lebadura, kan mga hinornong dolot, dangan kan mga dolot na sinalakan nin lana nin oliba. Sinda man an matimbang asin masukol kan gabos na dolot sa Templo.

³⁰ Aga-aga asin barubanggi, maomaw saka mapasalamat sinda sa Kagurangnan;

³¹ siring man kun igwang mga dolot na tinutong na atang sa Kagurangnan kun mga Sabbath, mga Bagong Bulan saka mga aldaw nin pyesta, sosog sa talaan na bilang kan mga Levita na hinahagad kan lambang gawe nin pagsamba sa Kagurangnan sa gabos na panahon.

³² Sinda an mamamahala kan Tabernakulo asin kan Templo. Tatabangan ninda an mga aking lalaki ni Aaron, na saindang mga kadugo, sa paglingkod sa Templo.