1 Mga Cronica 22 - Marahay na Bareta Biblia

¹ Kaya nagsabi si David, “Iyo ini an lugar na pagtutugdokan kan Templo nin Kagurangnan Dios, asin digdi mamumugtak an altar na pagdodolotan kan mga atang kan banwaan nin Israel.”

Mga Pag-andam para sa Pagpatugdok kan Templo

² Pinagbotan ni Hadeng David na magtiripon an gabos na dayuhan na nag-eerok sa daga nin Israel, asin pinatrabaho niya sinda. An iba sainda ginibo niyang mga paratabas nin gapo na gagamiton sa pagtugdok kan Templo nin Dios.

³ Nag-andam siya nin dakul na lansang na gigibohon na mga pako saka mga pang-ipit para sa mga trangkahan, dangan dakul na bronse na dai kayang timbangon nin siisay man huli sa kadakulan.

⁴ Dinarahan man siya kan mga taga Sidon saka mga taga Tiro nin dakul na kahoy na sedro.

⁵ Nagsaboot si David, “An Templo na ipapatugdok para sa Kagurangnan kaipuhan magayon, bantog asin igagalang sa bilog na kinaban. Alagad hoben pa si Solomon na sakuyang aking lalaki, saka mayo pa nin naaaraman; kaya aandamon ko na an mga kaipuhan para sa Templo.” Kaya bago nagadan si David, inandam na niya an dakul na mga kagamitan para sa Templo.

⁶ Dangan ipinaapod ni David si Solomon na saiyang aking lalaki, asin pinagbotan ini na magpatugdok nin templo para sa Kagurangnan, an Dios nin Israel.

⁷ Sinabihan niya si Solomon, “Aki ko, minawot ko na magtugdok nin templo tanganing tawan nin onra an Kagurangnan na sakong Dios.

⁸ Alagad nagtaram sako an Kagurangnan na dakul nang tawo an sakong ginadan asin dakul nang gera an sakong linabanan. Kaya huli kan dakul na dugo na sakong napabulos, habo niyang ako an magtugdok nin templo para saiya.

⁹ Alagad nagtaram siya sako, ‘Magkakaigwa ka nin aking lalaki. Maghahade siya sa katoninongan; dai siya pupurisawon asin iiwalon kan saiyang mga kaiwal. Solomon an saiyang magigin ngaran, huli ta sa panahon nin saiyang paghahade, tatawan ko nin katoninongan asin katiwasayan an Israel.

¹⁰ Siya an mapatugdok nin templo para sako. Magigin aking lalaki ko siya, asin ako an saiyang magigin ama. An saiyang kahadean sa Israel magigin daing kataposan.’”

¹¹ Nagpadagos si David, “Ngunyan, aki ko, mapasaimo logod an Kagurangnan tanganing matapos mo an pagpatugdok nin templo para sa Kagurangnan na saimong Dios, sosog sa itinaram niya manongod saimo.

¹² Tawan ka logod nin Kagurangnan na saimong Dios nin kadonongan asin pakasabot, tanganing kun gibohon ka na niyang hade nin Israel, maotob mo an saiyang mga togon.

¹³ Dangan magigin mauswag ka kun kuyogon mo an mga togon asin mga pagboot na itinao nin Kagurangnan ki Moises para sa Israel. Magmakosog ka. Dai ka matakot, ni manluya.

¹⁴ Manongod sa Templo, nagpagal ako sa pagtipon nin maabot sa tres mil kwatro syentos na toneladang bulawan, saka mga treynta mil na toneladang plata, laen pa kan dakul na bronse asin lansang. Nag-andam man ako nin kahoy asin gapo, alagad kaipuhan dugangan mo pa an mga ini.

¹⁵ Dakul an saimong mga trabahador: mga paratabas nin gapo, mga kantero, mga karpintero, saka dai mabilang na mga eksperto sa pagtrabaho

¹⁶ sa bulawan, plata, bronse, asin lansang. Poonan mo na an trabaho! Ibahan ka logod nin Kagurangnan!”

¹⁷ Pinagbotan man ni David an gabos na lider nin Israel na tabangan si Solomon na saiyang aki.

¹⁸ Olay niya, “Bakong inibahan kamo nin Kagurangnan na saindong Dios? Bakong tinawan niya kamo nin katoninongan sa palibot nindo? Itinugot niyang madaog ko an mga nag-eerok kaidto sa dagang ini; ngunyan mga sakop na nindo sinda asin nin Kagurangnan.

¹⁹ Kaya maglingkod kamo sa Kagurangnan na saindong Dios sa bilog nindong puso asin kalag. Poonan na nindo an pagtugdok kan Templo, tanganing ikabugtak nindo diyan an Kaban nin Tipan nin Kagurangnan saka an banal na mga kagamitan para sa pagsamba saiya.”