1 Mga Cronica 21 - Marahay na Bareta Biblia

Nagsenso si David

¹ Nagtindog si Satanas laban sa Israel asin dinagka si David na sensohon an banwaan nin Israel.

² Sinabihan ni David si Joab saka an mga namamayo kan hukbo, “Lakaw asin sensohon nindo an Israel, magpoon sa Beer-sheba sagkod sa Dan, tanganing maaraman ko an bilang kan mga namamanwaan.”

³ Nagsimbag si Joab, “Gibohon logod nin Kagurangnan na magdakul pa nin sanggatos na beses an bilang ngunyan kan namamanwaan sa Israel! Mahal na Hade, mga sorogoon mo sinda gabos. Tadaw ta boot mong gibohon ini? Tadaw ta boot mong magkasala an bilog na nasyon?”

⁴ Alagad ipinaotob kan hade ki Joab an saiyang pagboot. Kaya nagluwas si Joab, naglibot sa bilog na Israel dangan nagbalik sa Jerusalem.

⁵ Itinao niya ki David an kabilogan na bilang kan mga lalaking maninigong maglingkod sa hukbo: sarong milyon sanggatos mil sa Israel asin kwatro syentos setenta mil sa Juda.

⁶ Huli ta dai naoyonan ni Joab an pagboot ni David, dai niya kinua an senso kan mga tribu ni Levi saka ni Benjamin.

⁷ Naanggot an Dios kan bagay na ini kaya pinadusahan niya an Israel.

⁸ Nagsabi si David sa Dios, “Nagkasala ako nin makuri huli kan ginibo kong ini. Nakikimaherak ako na patawadon mo ako sa kalolongan kong ini.”

⁹ Dangan nagtaram an Kagurangnan ki Gad na propeta ni David,

¹⁰ “Lakaw asin sabihan mo si David na tinatawan ko siya nin tolong pagpipilian. Gigibohon ko an arin man na saiyang pilion.”

¹¹ Nagduman si Gad ki David, ipinahayag an itinaram saiya nin Kagurangnan, dangan naghapot, “Arin digdi sa tolo an pipilion mo:

¹² tolong taon nin gutom; o tolong bulan nin pagkadaog asin pagdulag sa mga hukbo nin saimong mga kaiwal; o tolong aldaw kan espada nin Kagurangnan, peste sa daga asin kagadanan na dadarahon kan malibot na anghel nin Kagurangnan sa bilog na Israel? Ngunyan sabihi ako kan simbag na dadarahon ko sa nagsugo sako.”

¹³ Nagsimbag si David ki Gad, “Masakit an kamugtakan ko! Alagad habo kong an tawo an magpadusa sako. An Kagurangnan iyo an magpadusa sako, huli ta dakula an saiyang pagkaherak.”

¹⁴ Kaya nagpadara nin peste sa Israel an Kagurangnan, asin nagkagaradan an setenta mil na mga Israelita.

¹⁵ Dangan nagsugo siya nin sarong anghel tanganing tunawon an Jerusalem; alagad nagbago siya nin isip asin nagsabi sa anghel, “Ontok! Tama na!” An anghel nin Kagurangnan nagtitindog sa may ginikan ni Arauna na Jebuseo.

¹⁶ Nagtingkalag si David asin nahiling niya an anghel na nakatindog sa pagultanan kan langit asin daga, kapot an saiyang espadang andam na ibingat sa Jerusalem. Kaya nagdapa si David saka an kamagurangan nin Israel, na gabos nakagubing nin sako.

¹⁷ Dangan namibi sa Dios si David, “Bakong ako man sana an nagkasala, huli ta ako an nagboot na sensohon an mga tawo? Ano an naginibo kan mga tawong ini? Nakikimaherak ako, O Kagurangnan, sakuyang Dios, na ako sana saka an sakuyang pamilya an saimong padusahan; alagad iligtas mo an saimong banwaan.”

¹⁸ Pinagbotan si Gad kan anghel nin Kagurangnan na sabihan si David na magpatugdok nin altar para sa Kagurangnan duman sa ginikan ni Arauna na Jebuseo.

¹⁹ Kinuyog ni David an pagboot nin Kagurangnan, asin nagduman sa lugar na sinabi saiya ni Gad.

²⁰ Naggiginik kaidto nin trigo si Arauna kaiba an apat niyang aking lalaki. Kan mahiling ninda an anghel, nagdaralagan saka nagtarago an apat niyang aki.

²¹ Kan mahiling ni Arauna na nagdadangadang si David, binayaan niya an ginikan asin nagdapa sa pagtaong galang sa hade.

²² Nagsabi si David ki Arauna, “Pabakalan sako an saimong ginikan; tutugdokan ko iyan nin altar para sa Kagurangnan tanganing mag-ontok an peste. Babayadan ko an bilog na halaga kaiyan.”

²³ Nagsimbag si Arauna, “Mahal na hade, saimo na sana iyan. Giboha an ano man na pagmarahayon mo. Itinatao ko man ining baka para sa tinutong na mga atang, ining mga kahoy kan ginikan bilang igatong, saka ining trigo para sa dolot na pagkakan. Itinatao ko ini gabos saimo.”

²⁴ Alagad nagsimbag an hade, “Babakalon ko an saimong ginikan sa tamang halaga. Dai ko kukuahon para sa Kagurangnan an anoman na pagsadiri mo; dai man ako madolot nin anoman na dai ko binayadan.”

²⁵ Kaya binayadan ni David si Arauna nin seis syentos na kwartang bulawan para sa ginikan.

²⁶ Nagpatindog duman si David nin sarong altar para sa Kagurangnan, asin nagdolot siya nin mga tinutong na atang saka mga dolot para sa katoninongan. Namibi siya asin sinimbag siya nin Kagurangnan sa paagi nin kalayong hale sa langit na tuminutong kan mga dolot sa altar.

²⁷ Dangan pinagbotan nin Kagurangnan an anghel na isarong an espada, asin nagkuyog ini.

²⁸ Sa paaging ini, nahiling ni David na dinangog nin Kagurangnan an saiyang pamibi, kaya nag-atang siya nin mga sakripisyo sa altar duman sa ginikan ni Arauna.

²⁹ An Tabernakulo nin Kagurangnan na ginibo ni Moises duman sa kalangtadan, saka an altar para sa tinutong na atang yaon pa kaidto sa lugar na pagsasambahan sa Gibeon;

³⁰ alagad dai nakaduman si David sa pagsamba sa Dios, huli ta natakot siya sa espada kan anghel nin Kagurangnan.