1 Mga Cronica 16 - Marahay na Bareta Biblia

¹ An Kaban nin Tipan nin Dios dinara ninda sa tolda na inandam ni David. Ibinugtak ninda duman an Kaban nin Tipan, dangan nagdolot sinda sa Dios nin mga tinutong na atang saka mga dolot para sa katoninongan.

² Pakadolot ni David kan mga sakripisyo, benendisyonan niya an mga tawo sa ngaran nin Kagurangnan;

³ dangan an lambang lalaki saka babae tinawan niya nin sarong pedasong tinapay, sarong pedasong karne saka mga pasas.

⁴ Dangan nagpili si David nin nagkapirang mga Levita tanganing mangenot sa pagsamba, pagpasalamat dangan pag-omaw sa Kagurangnan, an Dios nin Israel, sa atubangan kan Kaban nin Tipan.

⁵ Si Asaf an ibinugtak na pamayo, asin si Zacarias bilang saiyang katabang. Si Jeiel, Semiramot, Jehiel, Matitias, Eliab, Benaias, Obed-edom, asin Jeiel iyo an matugtog kan mga arpa asin lira, mantang si Asaf iyo an mapatanog kan mga trompeta sa atubangan kan Kaban nin Tipan.

⁶ An duwang padi na si Benaias saka Jahaziel danay man na mapatanog kan trompeta sa atubangan kan Kaban nin Tipan.

⁷ Sa aldaw na iyan enot na itinalaan ni David si Asaf asin an kapwa niya mga Levita na mag-awit nin pasalamat sa Kagurangnan.

Sarong Awit nin Pag-omaw

⁸ Magpasalamat kamo sa Kagurangnan, mag-apod sa saiyang ngaran; an saiyang mga gibo irukyaw nindo sa mga banwaan!

⁹ Awiton nindo an awit nin pag-omaw sa saiya; ibareta an gabos na ngangalasan na ginibo niya.

¹⁰ Magmuraway kita sa banal niyang ngaran; mag-ogma an mga pusong naghahanap sa Kagurangnan.

¹¹ Hanapa nindo an Kagurangnan asin an saiyang tabang; danay na sambahon nindo siya.

^12-13 Kamong kapagarakian ni Abraham na sorogoon nin Dios. Kamong kapagarakian ni Jacob na pinili nin Dios; giromdomon nindo an mga ginibo niyang ngangalasan, an mga milagro, asin an mga paghukom na saiyang itinao.

¹⁴ An Kagurangnan iyo an satuyang Dios; an mga pagboot niya para sa bilog na kinaban.

¹⁵ An saiyang tipan ginigiromdom niya sagkod pa man, an saiyang pagboot para sa rinibong henerasyon;

¹⁶ tipan na ginibo niya ki Abraham, panuga na isinumpa niya ki Isaac,

¹⁷ na pinatotoohan niya ki Jacob bilang sarong togon, ki Israel bilang daing kataposan na tipan.

¹⁸ Nagtaram siya, “Itatao ko saimo an daga nin Canaan, bilang sadiri mong kahirasan.”

¹⁹ An banwaan nin Dios dikit pa sana kaidto sa bilang, sinda mga dayuhan sa daga nin Canaan.

²⁰ Nakaabot sinda sa manlaen-laen na nasyon, asin sa manlaen-laen na kahadean.

²¹ Alagad dai nagtugot an Dios na igwang mag-api sainda; an mga hade saiyang pinatanidan huli sainda.

²² Nagtaram siya, “Dai nindo pagdutaan an sakong mga linahidan; an sakong mga propeta dai nindo pagkulogan.”

²³ Mag-awit sa Kagurangnan an bilog na kinaban! ipagrukyaw aroaldaw an saiyang kaligtasan.

²⁴ Ipahayag sa mga nasyon an saiyang kamurawayan, an mga ngangalasan niya sa tahaw kan gabos na banwaan.

²⁵ Huli ta dakula an Kagurangnan, asin maninigo nanggad na omawon; dapat siyang katakotan orog sa gabos na dios.

²⁶ An mga dios kan ibang nasyon mga dios-dios sana alagad an kalangitan linalang nin Kagurangnan.

²⁷ Omaw asin kamahalan yaon sa saiyang atubangan; kosog asin kaogmahan yaon sa saiyang santwaryo.

²⁸ Itao nindo sa Kagurangnan, O mga pamilya nin mga banwaan, itao nindo sa Kagurangnan an kamurawayan asin kosog.

²⁹ Itao sa Kagurangnan an kamurawayan na maninigo sa saiyang ngaran; magdara nin dolot asin magdolok sa saiya! Sambahon nindo an Kagurangnan sa saiyang pagdatong.

³⁰ Magtakig sa saiyang atubang an bilog na kinaban! An kinaban masarig na pinamugtak asin dai nanggad mahihiro.

³¹ Mag-ogma an langit, mag-ogma an daga! Sabihan nindo an gabos na nasyon, “Na naghahade an Kagurangnan!”

³² Maghagubohob an dagat, asin an gabos na yaon diyan; mag-ogma an kaomahan, asin an gabos na yaon diyan!

³³ Dangan an mga kahoy sa kadlagan mag-aawit sa kaogmahan sa atubang nin Kagurangnan, huli ta siya minaabot tanganing hukoman an daga.

³⁴ Magpasalamat kamo sa Kagurangnan, huli ta siya marahayon; huli ta an danay niyang pagkamoot mayo nin kasagkoran.

³⁵ Sabihon man nindo: “Ligtasan kami, O Dios nin samong kagligtas; tipona kami asin ligtasan sa mga nasyon, tanganing pasalamatan mi an saimong banal na ngaran saka magmuraway sa saimong kaomawan.

³⁶ Pag-omawon an Kagurangnan, an Dios nin Israel, ngunyan asin sagkod pa man!” Dangan an mga tawo nagsabi, “Amen!” asin nag-omaw sa Kagurangnan.

Pagsamba duman sa Jerusalem asin sa Gibeon

³⁷ Itinao ni David ki Asaf asin sa mga kapwa niya Levita an pamamahala kan pagsamba duman sa lugar na namumugtakan kan Kaban nin Tipan, tanganing gibohon ninda sa aroaldaw an saindang katongdan.

³⁸ Tatabangan sinda ni Obed-edom na aking lalaki ni Jedutun, kaiba an sesenta y otsong lalaki na kaayon sa saiyang kamaganakan. Si Hosa asin si Obed-edom iyo an mabantay kan mga trangkahan.

³⁹ Alagad an padi na si Zadok asin an mga kapwa niya padi iyo an mamamahala kan pagsamba sa Kagurangnan duman sa lugar na pagsasambahan sa Gibeon.

⁴⁰ Aga-aga asin barubanggi, dayaday na madolot sinda nin mga tinutong na atang sa altar, sosog sa nasusurat sa Togon na itinao nin Kagurangnan sa Israel.

⁴¹ Magigin kaiba ninda si Heman, si Jedutun saka an iba pang tawo na piniling magpasalamat sa Kagurangnan huli ta an saiyang pagkamoot dai nin kataposan.

⁴² Si Heman saka si Jedutun iyo an mamahala kan mga trompeta, mga gimbal asin iba pang mga instrumento na gagamiton para sa mga banal na awit. An mga aking lalaki ni Jedutun iyo an mamamahala kan mga trangkahan.

⁴³ Pakatapos, an lambang saro nagpuli sa saiyang harong; nagpuli man si David tanganing masakaibahan kan saiyang pamilya.