1 Mga Cronica 12 - Marahay na Bareta Biblia

An Enot na mga Soldados ni David na Gikan sa Tribu ni Benjamin

¹ Kan nag-eerok si David sa Ziklag, pakatapos niyang magdulag ki Hadeng Saul, nagduman saiya an dakul na matitibay na mga soldados.

² Kaayon sinda sa tribu ni Benjamin, na ginikanan man ni Saul. Mga parapana sinda, na pwedeng magpana asin maglagpitaw magin kan wala o kan toong kamot.

^3-7 An mga soldados na ini pinamamayohan ni Ahiezer asin Joas, na mga aking lalaki ni Semaa na taga Gibea. Iyo ini an mga soldados: si Jeziel asin Pelet na mga aking lalaki ni Azmavet si Beraca asin Jehu na mga taga Anatot si Ismaias na taga Gibeon, sarong bantog na soldados asin saro kan mga lider kan “An Treynta” si Jeremias, Jahaziel, Johanan, asin Jozabad na mga taga Gedera si Eluzai, Jerimot, Bealias, Semarias, asin Sefatias na mga taga Harif si Elkana, Issias, Azarel, Joezer, asin Jasobeam na mga kaayon sa kamaganakan ni Kora si Joela asin Zebadias na mga aking lalaki ni Jeroham na taga Gedor.

An mga Soldados ni David na gikan sa Tribu ni Gad

⁸ Sa tribu ni Gad, may bantog asin ekspertong mga soldados na nag-iba sa hukbo ni David kan ini nasa sarong bantayan sa desyerto. Mga eksperto sinda sa pagkapot nin kalasag saka garod; maiisog an mga lalawogon na garo sa leon, asin mga marikas arog kan mga usa.

⁹ Si Ezer iyo an pamayo, ikaduwa si Obadias, ikatolo si Eliab,

¹⁰ ikaapat si Mismana, ikalima si Jeremias,

¹¹ ikaanom si Attai, ikapito si Eliel,

¹² ikawalo si Johanan, ikasiyam si Elzabad,

¹³ ikasampolo si Jeremias asin ikaonse si Macbanai.

¹⁴ An mga lalaking ini kan tribu ni Gad gabos mga opisyal kan hukbo, na an pinakadikit na bilang kan mga soldados na nasasakopan dai mahababa sa sanggatos katawo, asin an pinakadakul masobra sa sangribo.

¹⁵ Kan enot na bulan kan baha an Salog nin Jordan, nagbalyo an mga lalaking ini sa salog, kaya nagdurulag an mga tawo na nag-eerok sa mga kapantayan na nasa sirangan asin nasa solnopan.

An mga Soldados na gikan sa Tribu ni Benjamin asin ni Juda

¹⁶ Nagkapirang mga lalaki na gikan sa mga tribu ni Benjamin asin ni Juda an nagduman sa bantayan na namumugtakan ni David.

¹⁷ Nagluwas si David asin sinabat sinda dangan sinabihan, “Kun napadigdi kamo bilang mga katood sa pagtabang sako, inaako ko kamo. Alagad kun iniisip nindong ipasaluib ako sa akong mga kaiwal, maski mayo man ako nin sala, maiisihan iyan kan Dios nin satong mga ginikanan, asin papadusahan niya kamo.”

¹⁸ Dangan an Espiritu nin Dios uminabot ki Amasai, na nagin pamayo kan “An Treynta,” asin nagsabi ini, “Saimo kami, O David; asin kaiba mo kami, O aki ni Jesse! an Katoninongan mapasaimo, asin sa mga nagtatabang saimo! Huli ta tinabangan ka kan saimong Dios.” Inako sinda ni David asin ginibong mga opisyal kan saiyang hukbo.

An mga Soldados na Gikan sa Tribu ni Manases

¹⁹ Nagkapirang mga lalaki na gikan sa tribu ni Manases an nag-apil ki David kan maglakaw siya kaiba an mga Filisteo tanganing labanan si Hadeng Saul. An katotoohan, dai man tinabangan ni David an mga Filisteo huli ta nagkatarakot an mga hade kaini ta tibaad ipasaluib sinda ni David sa saiyang dating kagurangnan na si Saul; kaya pinabalik ninda sa Ziklag si David.

²⁰ An mga soldados kan tribu ni Manases na nag-apil ki David pagbalik niya sa Ziklag iyo si Adna, Jozabad, Jediael, Miguel, Jozabad, Elihu, asin Zilletai. Sa tribu ni Manases, gabos sinda pamayo nin mga grupo nin manangribo katawo.

²¹ Naglingkod sinda ki David bilang mga opisyal kan saiyang hukbo, huli ta gabos sinda mga bantog na soldados; nagin sindang mga opisyal sa hukbo kan mga Israelita.

²² Haros aroaldaw, dakul na lalaki an minaapil ki David sa pagtabang saiya, kaya dai nahaloy nagdakula an saiyang hukbo.

Talaan kan Hukbo ni David

^23-37 Kan nasa Hebron si David, dakul na soldados na gabos andam sa pakilaban, an nag-ayon sa saiyang hukbo tanganing tabangan siyang magin hade na masalihid ki Saul, siring sa ipinanuga nin Kagurangnan. An bilang ninda iyo an minasunod: hale sa tribu ni Juda: seis mil otso syentos na mga soldados, gabos armado nin kalasag asin garod; hale sa tribu ni Simeon: syete mil syen na makokosog na mga soldados; hale sa tribu ni Levi: kwatro mil seis syentos na mga soldados; dai pa kabilang digdi an mga parasunod ni Joaida, na kapagarakian ni Aaron, na an bilang minaabot sa tres mil syete syentos. Dai pa man kabilang digdi an beynte y dos na mga opisyal, na mga kadugo ni Zadok, sarong hoben na paralaban; hale sa tribu ni Benjamin (an tribung ginikanan ni Saul): tres mil na mga soldados (kadaklan sa mga tawohan ni Benjamin nagdanay na maimbod ki Saul); hale sa tribu ni Efraim: beynte mil otso syentos na mga soldados, gabos bantog sa saindang sadiring kamaganakan; hale sa tribu ni Manases sa Solnopan: dyes y otso mil na mga soldados, na napili tanganing magduman ki David asin gibohon siyang hade; hale sa tribu ni Issakar: dos syentos na mga lider, kaiba an mga tawohan na nasasakopan ninda; (aram kan mga lider na ini kun ano an dapat gibohon nin Israel sa tamang panahon); hale sa tribu ni Zabulon: singkwenta mil na maimbod asin mapapaniwalaan na mga soldados, gabos andam sa paggamit nin anoman na armas; hale sa tribu ni Neftali: sangribo na mga lider, kaiba an treynta y syete mil na mga lalaking armado nin mga kalasag asin mga garod; hale sa tribu ni Dan: beynte otso mil seis syentos na mga soldados, gabos armado sa pakilaban; hale sa tribu ni Aser: kwarenta mil na mga soldados na andam sa pakilaban; hale sa mga tribu sa sirangan kan Jordan—Ruben, Gad, asin Manases sa Sirangan: syento beynte mil na mga soldados na gabos andam sa paggamit nin anoman na armas.

³⁸ An mga soldados na ini, gabos andam sa pakilaban, nagduman sa Hebron na pano nin pagmawot na gibohon na hade si David kan bilog na Israel. Siring man an iba pang mga taga Israel nagkasararo sa katuyohan na ini.

³⁹ Tolong aldaw sinda sa kaibahan ni David, nagkakan asin nag-inom kan inandam para sainda kan saindang mga kahimanwa.

⁴⁰ Hale pa sa hararayong mga tribu ni Issakar, Zabulon, asin Neftali, nag-abot an mga tawo na may darang mga asno, kamelyo, mula, asin baka na gabos may lunad na pagkakan—mga arina, higera, pasas, arak asin lana, nin oliba. Nagdara man sinda nin mga baka asin mga karnero na bubunoon asin kakanon. An gabos na ini tanda kan kaogmahan na namatean kan bilog na Israel.