1 Mga Cronica 11 - Marahay na Bareta Biblia

Nagin Hade nin Israel asin nin Juda si David

¹ Dangan nagduman ki David sa Hebron an bilog na Israel asin nagsabi, “Kadugo mo kami.

² Kaidto, maski kan si Saul iyo pa an hade, ika an namayo kan banwaan nin Israel sa gera; nanuga saimo an Kagurangnan na saimong Dios na ika an mangengenot kan saiyang banwaan asin magigin pamayo ninda.”

³ Kaya nagduman ki Hadeng David sa Hebron an gabos na kamagurangan nin Israel. Nakipagtipan siya sa sainda sa atubangan nin Kagurangnan, asin linahidan ninda si David bilang hade nin Israel, siring sa ipinanuga nin Kagurangnan sa paagi ni Samuel.

⁴ Nagduman sa Jerusalem si David asin an bilog na Israel; Jebus an ngaran kaidto kan Jerusalem, asin an mga Jebuseo iyo an mga nag-eerok duman.

⁵ Nagsabi ki David an mga Jebuseo, “Dai ka makakalaog sa syudad.” Alagad nabihag ni David an bantayan nin Sion, asin nabantog ini sa ngaran na “Syudad ni David.”

⁶ Nagsabi si David, “An enot na makagadan nin sarong Jebuseo iyo an magigin pamayo kan hukbo!” Si Joab na aking lalaki ni Zeruias iyo an enot na nagsalakay, kaya siya an nagin pamayo.

⁷ Duman na nag-erok si David sa bantayan, kaya inapod idtong “Syudad ni David.”

⁸ Pinakarahay giraray ni David an syudad magpoon sa lugar na tinambakan nin daga sa sirangan na parte kan bulod, asin si Joab an naghirahay kan ibang kabtang kan syudad.

⁹ Orog na kuminosog si David, huli ta kaibahan niya an Kagurangnan nin mga hukbo.

An Bantog na mga Soldados ni David

¹⁰ Iyo ini an bantog na mga soldados ni David, kaiba an bilog na Israel, na nagtabang saiya sa pagigin hade, siring sa ipinanuga nin Kagurangnan; pinakosog ninda an kahadean ni David.

¹¹ Si Jasobeam, na kaayon sa kamaganakan ni Hacmon, iyo an pamayo kan “An Tolo.” Nakilaban siya sa paagi kan saiyang garod laban sa tres syentos na lalaki, na saiyang ginadan sa saro sanang pagralaban.

¹² An sunod sa bantog na “An Tolo” iyo si Eleazar na aking lalaki ni Dodo kan kamaganakan ni Aho.

¹³ Kaiba siya ni David sa pakilaban sa mga Filisteo duman sa Pas-dammim. Yaon siya duman sa sarong oma nin sebada kan magdurulag an mga Israelita;

¹⁴ alagad dai siya naghiro sa saiyang natitindogan duman sa oma, kaiba an saiyang mga tawohan. Dai sinda naghale kundi nakilaban; ginadan ninda an mga Filisteo. Sarong dakulang kapangganahan an itinao sainda kan Kagurangnan.

¹⁵ Sarong aldaw, tolo sa treyntang mga namamayong soldados an nagduman sa sarong gapo, saen nag-ontok si David sa may Lungib nin Adullam, mantang nagkakampo an sarong grupo nin mga Filisteo sa Kapantayan nin Refaim.

¹⁶ Yaon kaidto si David sa sarong bantayan, asin sinakop na kaidto nin sarong grupo nin mga Filisteo an Betlehem.

¹⁷ Napungaw si David asin nagsabi, “Kun igwa lamang kutanang makatao sako nin maiinom na tubig na hale sa bubon na nasa may trangkahan kan Betlehem!”

¹⁸ Kaya nangahas maglaog sa kampo kan mga Filisteo an tolong makokosog na soldados, nagharok nin tubig sa bubon na nasa may trangkahan kan Betlehem, dangan dinara ki David. Alagad dai idto ininom ni David, kundi, inula bilang sarong atang sa Kagurangnan.

¹⁹ Nagsabi si David, “Dai ko ini pwedeng inomon. Garo ko man sana iinomon an dugo kan mga lalaking ini, huli ta ibinugtak ninda sa pag-alaman an saindang buhay tangani sanang makua ini!” Kaya dai ininom ni David an tubig. Iyo ini an mga ginibo kan tolong bantog na soldados.

²⁰ Si Abisai, na tugang na lalaki ni Joab, iyo an pamayo kan “An Treynta.” Nakilaban siya sa paagi kan saiyang garod laban sa tres syentos na lalaki, asin ginadan niya an mga ini, kaya nagin bantog siya arog kan “An Tolo.”

²¹ Siya an pinakabantog sa “An Treynta,” asin iyo an saindang nagin pamayo; alagad bako siyang arog kabantog kan “An Tolo.”

²² Si Benaias, na aking lalaki ni Jehoiada na taga Kabzeel, saro man na bantog na soldados; nagpahiling siya nin dakul na gawe nin kaisogan. Ginadan niya an duwang dakulang paralaban na Moabita. Sarong aldaw sa panahon nin tiglipot, nagbaba siya sa sarong kalot asin nakagadan duman nin sarong leon.

²³ Nakagadan man siya nin sarong Egipcio, sarong dakulang lalaki na masobra sa duwang metros an langkaw asin armado nin dakulang garod. Sinalakay ini ni Benaias na kapot an sarong sugkod, inagaw an garod sa kamot kan Egipcio asin ginadan ini kan sadiring garod.

²⁴ Iyo ini an mga ginibo ni Benaias na kabilang sa “An Treynta.”

²⁵ Saro siya sa mga mas bantog sa “An Treynta,” alagad bakong arog kabantog kan “An Tolo.” Siya an ibinugtak ni David na pamayo kan saiyang mga bantay.

^26-47 Iyo ini an iba pang bantog na mga soldados: si Asahel na tugang na lalaki ni Joab si Elhanan na aking lalaki ni Dodo kan Betlehem si Samot na taga Harod si Helez na taga Pelet si Ira na aking lalaki ni Ikkes na taga Tekoa si Abiezer na taga Anatot si Sibecai na taga Husa si Ilai na taga Aho si Maharai na taga Netofa si Heled na aking lalaki ni Baana na taga Netofa si Itai na aking lalaki ni Ribai na taga Gibea sa daga nin Benjamin si Benaias na taga Piraton si Hurai na hale sa mga burabod nin Gaas si Abiel na taga Arba si Azmavet na taga Bahurum si Eliaba na taga Saalbon si Hasem na taga Gizon si Jonatan na aking lalaki ni Sagee na taga Harar si Ahiam na aking lalaki ni Sacar na taga Harar si Elifal na aking lalaki ni Ur si Hefer na taga Mekera si Ahias na taga Pelon si Hezro na taga Carmelo si Naarai na aking lalaki ni Ezbai si Joel na tugang na lalaki ni Natan si Mibhar na aking lalaki ni Hagri si Zelek na taga Ammon si Naharai na taga Beerot, na iyo an paradara kan armas ni Joab si Ira asin si Gareb na mga taga Jatir si Urias na Heteo si Zabad na aking lalaki ni Alai si Adina na aking lalaki ni Siza, na sarong lider sa tribu ni Ruben asin igwa man nin sadiring grupo nin treyntang mga soldados si Hanan na aking lalaki ni Maaca si Josafat na taga Mitan si Uzias na taga Astera si Samma asin si Jeiel na mga aking lalaki ni Hotam na taga Aroer si Jediael asin si Joha na mga aking lalaki ni Simri na taga Tiz si Eliel na taga Mahava si Jeribai asin si Josabias na mga aking lalaki ni Elnaam si Itma na taga Moab si Eliel, si Obed asin si Jaasiel na mga taga Zoba.