Zefaniya 3 - Livulu lya Shukulu Kalunga

Vuvi vwa Yelusalema nakupatuka

¹ Yelusalema inanyongo, nganda ya vanu vaka-kutengulukila, na vaka-vuvi, vantwama vayo vakayandesa vanu vavo.

² Kuyatolililile kuli Shukulu Kalunga nambe kutava kunangula kwendi. Kuyakulaelele kuli Shukulu Kalunga nambe kulomba vukwasi vwendi.

³ Vamyata vayo valinakwaana ngwe vindumba, co maako vayo vanapu ngwe tungunga va njala na mutupu, vaje valya citsiya palanga noo ku mutondo.

⁴ Vaka-kwimanena vapwa vaka-kulyalesa na vaka-muuka, co vaka-kukombelela vakajwalesa vije vinajele, co vatengulula lishiko lya Njambi ngeci vafuke mu ngila kesi ikeyo.

⁵ Oloni Shukulu Kalunga anga acili mu nganda, co akalingi vije vya vushunga, co kesi kulinga vije vyavivi embwe. A mutondo na mutondo kesi kwonwa mukunena vushunga kuli vanu vendi. Oloni vaka- vushunga anga vacili nakulinga vuvi kuvesi na shwamwa.

⁶ Shukulu Kalunga alinakwendeka ngwendi, “Njamanesele miyati yoshe ya vanu njwa, njanyongesa vinganda vyavo, nakuseza vivumbe vyavo na tuposhi twavo mitumbo. Co vinganda vinapu vingundu vyangoco, naumo wai alinakwenda mu vitapalo, vanu voshe vanai.

⁷ Co njayongwele ngwange amo vanu vange vakasa kunjikomoka nakutava kunangula kwange, ngeci kesi vakevale vilongesa vije vinjavalongesele. Oloni vwasi-vwasi vonwele kulisingimika, co valingile vyuma vyavivi manene kutuvakana muje mwalaja.”

⁸ Shukulu Kalunga alinakwendeka ngwendi, “Vandameneni litangwa lije omo njikakatuka mukusompa miyati ya vanu. Njinayongola kukungulula miyati ya vanu na vumwene amolika ngeci vamone nzili ya vukalu vwange. Co ano asi oshe akanyonga na tuhya twa vukalu vwange vwakama-kama.

⁹ “Asinoni njikatengulula vimbunge vya vanu, co vakalombela lika kuli yange, kesi ku vinjambi veka lalo embwe. Co voshe vakanjononoka.

¹⁰ Nameme vaje vakala kulyala ku Sundane, vanu vange vaje vashandokele, vakanena vin̄ombelo kuli yange.

¹¹ A simbu ije, yeni vanu vange kumukazivi lalo shwamwa a kwononoka mashiko ange embwe. Co njikatundisa vanu voshe vaje vaka-kulyalesa nakulishasha, co kumukanjitengulukila lalo a lilundu lyange lyakujela embwe.

¹² Mu Yelusalema njikasezamo lika vanu vaka-kulilumbilisa na vaka-kulikeesa, vaje vakaija kuli yange mukuvakwasa.

¹³ Vanu va mu Isalele vaje vanasalao kuvakalingi lalo vuvi ku munu umo embwe, co kuvakendeka makuli, nambe kweseka kukwisa vakwavo. Co vakavezika nakukala mu kwoloka, co naumo wai akavazivisa lyova.”

Mwaso wakujolela

¹⁴ Imbeni nakutambeka nakujolela yeni vanu va mu Isalele! Joleleni na vimbunge vyeni vyoshe yeni vanu va mu Yelusalema!

¹⁵ Shukulu Kalunga namanesa cihiso ceni, natundisa vitozi veni voshe. Shukulu Kalunga mwene wa Isalele ali amo neni, kukwesi cuma ceka lalo cakumizivisa lyova cai.

¹⁶ Simbu ikaija omo vakendeka kuli vanu va mu Yelusalema ngwavo, “Yeni vanu va mu Siyone kesi muzive lyova! Kesi mutave mavoko eni azeye embwe!

¹⁷ Shukulu Kalunga Njambi yeni ali amo neni, nzili yendi ikamihyanesa. Shukulu Kalunga akavwaelela neni, co akamyana mwonyo wauha omwo ikeye wamizema! Akaimba nakujolela ali yeni,

¹⁸ ngwe kujolela kwa vanu vali ku ciwano.” Shukulu Kalunga alinakwendeka ngwendi, “Kunjikatava ngeci muvulumuke lalo, co lalo kunjikatava ngeci muzive shwamwa!

¹⁹ Simbu ilinakwija! Njikanyanyamesa vaka-kumiyandesa, co njikapatula vilema voshe nakwilwisa vinzinda voshe kwimbo, co njikatengulula shwamwa yavo kupwa kasingimiko, na vaka-kaye voshe vakavashangazala.

²⁰ Simbu ilinakwija! Njikelwisila vanu veni kwimbo vaje valishandokele, co njikamitsimanesa mu kaye mwoshe, co mukakala mwamuvwa lalo ngwe laja.” Mukemwo mwanendeka Shukulu Kalunga.