Zefaniya 2 - Livulu lya Shukulu Kalunga

Muka-kwimanena asana vanu ngeci vatenguluke

¹ Yeni muyati wa vanu vakujeneka shwamwa, yongoleni a vuvi vweni, co tengulukeni

² simbu kanda vacimitwale kulyala ngwe lijungu lipekumuka na lihunzi, simbu kanda litangwa liije omo Shukulu Kalunga akasholola vukalu vwendi nakuminyanyamesa ngwe tuhya mutukenyeka vyuma.

³ Ilukeni kuli Shukulu Kalunga yeni voshe vaka-kulilumbilisa va mu lifuti, vaje valinakwononoka mashiko endi. Lingeni vije vya vushunga, co lilumbiliseni ku mesho a Shukulu Kalunga. Amo mukaputumuka ku cihiso a litangwa lije omo Shukulu Kalunga akasholola vukalu vwendi.

Kunyonga kwa miyati ya vanu vaje valyatele na Isalele

⁴ Naumo wai akasala mu nganda ya Ngaza. Ashekelone ikapwa ngundu. Co vanu va mu Ashendonde vakavasheka a simbu ya mutanya, na vanu va mu Ekelone vakavandandumuna nakuvatundisa mu nganda yavo.

⁵ Yeni vaFilisitiya munanyongo, yeni vanu mwakala ku ngenge ya mema a kalunga. Shukulu Kalunga namisompo laja. Akaminyongesa, co naumo wai akasalao ali yeni.

⁶ Co lifuti lyeni lya ku ngenge ya mema a kalunga likemuka mutambela wakulila vimanga.

⁷ Vanu va mu Yunda vaje vasalao vakatambula lifuti lyeni. Vakalisila matanga avo a vimanga kuje, co vakakala mu vinjuvo vya vaka-Ashekelone. Co Shukulu Kalunga Njambi yavo akakala amo navo, co akavavezikisa lalo.

⁸ Shukulu Kalunga Muka-nzili yoshe alinakwendeka ngwendi, “Njazivi vanu va Mowavi na Amoni vatuka nakutomba vanu vange, co vali na kulyalesa ngwavo vasa kutambula lifuti lyavo.

⁹ Mwa vushunga vene yange Kalunga Njambi wa Isalele uje wayoya, njilinakulisinga ngeci Mowavi na Amoni vakanyonga ngwe Sondoma na Ngomola. Mafuti avo akemuka mitambela ya vimbulu vya mwongwa muje kuvakasa kulima vimbuto, co mukamena shaku lika. Co vanu vange vaje vakasalao vakapukula nakwambata lifuti lya Mowavi na Amoni.”

¹⁰ Omu mukemwo mumukanyanyamesa vanu va Mowavi na Amoni a kulyalesa kwavo nakulishasha kwavo akutuka vanu va Shukulu Kalunga Muka-nzili yoshe.

¹¹ Shukulu Kalunga akavajujwisa. Akatengulula vinjambi va ano asi nakuvapwisa vangoco, asinoni muyati na muyati wa vanu mu lifuti lyawo vakalemesa Shukulu Kalunga.

¹² Co Shukulu Kalunga lalo akatsiya vaka-Sundane.

¹³ Shukulu Kalunga akapangesa nzili yendi mukunyongesa Asilya. Co akanyongesa nganda ya Nenevayi nakuyipwisa ngundu, mambo yakujeka mema.

¹⁴ Nganda ya Nenevayi ikapwa mutambela wakulila matanga a vimanga, na tusitu va miyati-yati vakavutamamo. Co vinkungulu vakakala mukati kavije vingundu na mitambi yakwoya kwavyo ikatuukila mu vinjanena. Co na makololo vakendekela a vipamba vya vikolo, vanu vakavujula mavaya a kendale a kulyala aje avatungisile vinjuvo vyendi.

¹⁵ Evi vikevyo vivakalinga ku nganda ije ya vaka-kulyalesa a nzili yavo vavenya nakuyongola ngeci valimwamuvwa. Vanu vamwo vayongola ngwavo nganda yavo yapwa yakama manene muno mu kaye koshe, oloni ikemuka ngundu, mutambela uje vakakala tusitu! Co vanu voshe vaje vakaitilamo vakalipika ku mitwe yavo mukumwesa kayengu kavo na vunyengwe vwavo a nganda ije.