Zefaniya 1 - Livulu lya Shukulu Kalunga

¹ Eli likelyo lijwi lije lyendekele Shukulu Kalunga kuli Zefaniya simbu ije Yosiya muna Amoni wapwile mwene wa mu Yunda. (Zefaniya wapwile wa ku cikota ca Mwene Hezekiya, na Amaliya, na Ngendaliya, na Kushi.)

Litangwa lya Shukulu Kalunga lyakusompa

² Shukulu Kalunga wendekele ngwendi, “Njikanyongesa vyuma vyoshe vya ano asi,

³ vanu voshe na tusitu, tuzila na visi. Njikatundisa vaka-vuvi voshe, njikanyongesa vanu voshe, co naumo wai akasalao. Yange Kalunga, njinendekamo.

⁴ “Njikanyanyamesa vanu voshe va mu Yelusalema na mu Yunda. Njikanyongesa munu woshe muka-kulemesa Mbale, co naumo wai lalo akanuka vaka-kukombelela va vaka-kujeneka kukulaela vaje vamupangelele.

⁵ Njikanyongesa vanu voshe vaje vakalondo akamwa ya njuvo nakulemesa litangwa, na ngonde, na vingongonosi. Co lalo njikanyongesa vaje vakulaesa ngwavo vakanjipangela mu kulongwa, oloni valisinga lalo mu lizina lya njambi Moleki.

⁶ Njikanyongesa lalo vaje vanalikela kunjipangela, vaje kuvesi kwija kuli yange nambe kunjilomba ngeci njivatwamenene.”

⁷ Litangwa lili muyehi omo Shukulu Kalunga akatumbama nakusompa vanu ngecivene, olokeni kuluu ku mesho endi. Shukulu Kalunga nalivwaesela cimweja kukombelela vanu vendi, nalanya vitozi mukupukula Yunda.

⁸ Shukulu Kalunga alinakwendeka ngwendi, “A litangwa lije omo njikalingisa vitozi kutsiya vanu vange, njikanyanyamesa, vamyata, na naanga ya mwene, na vaje voshe valinakulemesa vinjambi veka.

⁹ Njikanyanyamesa lalo voshe vaje valinakukavangeya futisi ya vaje vaka-kujeneka kunjilemesa yange Kalunga, vaje valinakwiva nakutsiya ngeci vashulise vinjuvo vyakulemesela vinjambi vavo na vyuma vyakupukula.

¹⁰ “A litangwa lije mukaziva muyoyo wakulila ku Cikolo ca Visi ca Yelusalema. Mukaziva kutendeka kwakama mu mutambela wamucivali wa mu nganda na muyoyo wa vinjuvo vilundumuka akamwa ya malundu a Yelusalema.

¹¹ Lileni nakutendeka omo muziva vyuma evi, yeni muli na kukala mu mitambela ya kwisi ya nganda, omwo vaka-kulandesa voshe vakavanyongesa!

¹² “A simbu ije njikambata ndeya nakushakezeka mu Yelusalema. Njikanyanyamesa vanu vaje valinakulivwaelelesa nakulikulaesa vakevo vavenya, vaje vendeka ngwavo, ‘Shukulu Kalunga kakalingi cuma cimo kuli yetu.’

¹³ Vufuko vwavo vakavupukula, co vinjuvo vyavo vakavinyongesa. Vakatunga vinjuvo, oloni kuvakakalamo nambe kunwa vinyu vya mu vitungu vya mikolovozi ya vushuka vwa vinyu vije vakatombeka.”

¹⁴ Litangwa lije omo Shukulu Kalunga akasompa vanu lili muyehi-yehi, lilinakwija vwasi-vwasi! Litangwa lije likapwa lya vusiwa manene, nameme mashwalale vakusimpa vakalila nakutendeka cinyangavili cakutambula vukwasi!

¹⁵ Likapwa litangwa lya vukalu vwakama, litangwa lya tuyando twakama na vusiwa, litangwa lyakuviisa nakunyongesa, litangwa lya lisusulungu lyakama-kama vwii, na mashelwa amangi,

¹⁶ litangwa lya muyoyo wa malupembo a nzita na mutambi wa mashwalale vaje valwisa vimpaka vya vinganda na tuposhi twatulaja.

¹⁷ Shukulu Kalunga alinakwendeka ngwendi, “Njikanena tuyando twakama ngeci vanu voshe vakapuputiya ngwe tupuputwa. Vanalingi vuvi ku mesho ange, co ololo maninga avo vakawetila ngwe muvaketila mema, co mivila yavo ikalala asi nakuvolelao.”

¹⁸ A litangwa lije omo Shukulu Kalunga aketila vukalu vwendi vwakama, nameme siliva yavo nambe ngolinde yavo kuvikasa kuvamena. Kaye koshe kakanyonga na tuhya twa vukalu vwendi. Co vwasi-vwasi akanyongesa vanu voshe vaje vakala ano asi.