Zakaliya 9 - Livulu lya Shukulu Kalunga

Vitozi va Isalele vakavanyanyamesa

¹ Awa akewo majwi a Shukulu Kalunga. Nashiki ngeci akanyanyamesa lifuti lya Handelake na nganda ya Ndamasiku. Kesi lika miyati ya Isalele, oloni na nganda yakama ya Silya yapwa ya Shukulu Kalunga.

² Hamate, yalinga nginga na Handelake, yapwa lalo yendi, na vinganda lalo vya Tile, na Sindone, na vanu vavyo va mana.

³ Tile yalitungila vimpaka vyayo, co yalilundikila siliva yaingi-yingi manene na ngolinde ngwe vishwashwa vya mu ngila!

⁴ Oloni Shukulu Kalunga akamutambula vyoshe vyalinavyo. Co akombila vufuko vwendi vwoshe mu mema a kalunga, co nganda vakayenyeka njwa.

⁵ Nganda ya Ashekelone vakamona vyuma evi, co vakaziva lyova. Nganda ya Ngaza vakamona vyuma evi, co vakaziva lyova manene. Na Ekelone lalo vakakala mu vukalu, cinyangavili cavo cikahwa. Nganda ya Ngaza vakajeneka mwene yavo, co Ashekelone vakaiseza ngundu yangoco.

⁶ Vanu va miyati yeka na yeka vakakala mu Ashendonde. Shukulu Kalunga alinakwendeka ngwendi, “Njikononwesa vaFilisitiya voshe va kulyalesa.

⁷ Kuvakali lalo situ na maninga ayo, nambe vyakulya vyeka vya cizila. Vanu voshe vaje vasaleleo vakapwa vanu vange, co vakapwa naanga mu muyati wa Yunda. Ekelone vakapwa vanu vange, ngwe muvalingile vaNjevushi.

⁸ Njikanyunga lifuti lyange, co njikavindika mashwalale kwitamo. Kunjikatavesa lalo vaka-muuka kuyandesa vanu vange, njamono muvanayandelamo vanu vange.”

Mwene uje akashwana

⁹ Joleleni, joleleni, yeni vanu va mu Siyone! Tambekeni nakujolela, yeni vanu va mu Yelusalema! Kengeni, mwene yeni alinakwija kuli yeni! Aija mu vumpau nakuhyana, oloni wa kulikeesa nalondo a cimulu, a muna cimulu, wamundondo.

¹⁰ Shukulu Kalunga alinakwendeka ngwendi, “Njikatundisa matemba a nzita mu Isalele, nakutundisa tuvalu mu Yelusalema, mata a lusipa aje vapangesele mu nzita njikaanyongesa. Mwene yeni akanena kwoloka akati ka miyati ya vanu, ikeye akashwana kutunda ku mema a kalunga amo nakweta ku mema a kalunga akwavo, kutunda ku Ndonga ya Yufuleti nakweta ku shongo ya ano asi oshe.”

Kwiluka kwa vanu va Njambi

¹¹ Shukulu Kalunga alinakwendeka ngwendi, “Omo cikumiiyo cange neni cije civasatesele na maninga a vin̄ombelo, njikapatula vanu vove, njikavapatula ku mbulu ya vunzinda ije kuyesi na mema.

¹² Ilukeni, yeni vinzinda ololo muli na cinyangavili, ilukeni ku mwela weni wauvwa. Ololo njimileka ngwange njikamivezikisa luvali ku tuyando tweni twoshe tuje mwayandele.

¹³ Njikapangesa Yunda kupwa vuta vwange vwa lusipa, co Isalele njikavapwisa mikili yange. Njikapangesa vanalume va ku Siyone kupwa mukwale, mukulwisa vanalume va ku Ngelese.”

¹⁴ Shukulu Kalunga akashuluka akamwa ya vanu vendi ngwe lishelwa, akasha mikili yendi ngwe muhyato. Shukulu Kalunga wa Akamwa ya Vyoshe akaimba lupembo, akalwila mu lihunzi kutunda ku mbwela.

¹⁵ Shukulu Kalunga Muka-nzili yoshe akanyunga vanu vendi, co vakanyongesa vitozi vavo. Vakatambeka mu nzita ngwe vaka-kupenda, co vaketila maninga a vitozi vavo, maninga a vitozi vavo akasindumuka ngwe maninga a vin̄ombelo aje vaketila a mutula kutunda a lilonga!

¹⁶ Omo litangwa lije likaija, Shukulu Kalunga akanyunga vanu vendi ngwe kanyungi amena vutanga vwendi ku vushonde. Vakavyazima mu lifuti lyendi ngwe mamanya a seo a cilongo.

¹⁷ Lifuti lije likapwa lyakuvwaa manene! Vanike vakakola na nzili omwo vimbuto vyamwo na vinyu vyamwo.