Zakaliya 8 - Livulu lya Shukulu Kalunga

Shukulu Kalunga akulaesa kwindula Yelusalema

¹ Shukulu Kalunga Muka-nzili yoshe wendekele kuli Zakaliya ngwendi,

² “Njishungwiya kukwasa Yelusalema omwo cizemo cange cakama manene ali vanu vaje valimo, cizemo cije canjiluvalesele na vitozi vendi.

³ Njikeluka ku Yelusalema, nganda yange yakujela, co njikakala muje. Vakaitumbula nganda ya kulongwa, co lilundu lya Shukulu Kalunga Muka-nzili yoshe vakalitumbula ngwavo lilundu lyakujela.

⁴ Co a simbu ije vene tukulukazi va vanalume na ava va vanakazi, vaje vanakuluvala manene vendela a mikombo, vakatumbama mushandangala ya mu nganda.

⁵ Co vakwenje na vambanda vakakala mu vitapalo nakweelamo.

⁶ “Eci cikapwa ngwe cuma cacikalu ku miyati ya vanu vange vaje vasaleleo, oloni kucikapu cacikalu kuli yange embwe.

⁷ Njikapatula vanu vange ku mafuti kuje kuvavatwalele,

⁸ njikavatundisa mu ngangela na mu kangombe ka yambi ngeci vakukale mu Yelusalema. Vakevo vakapwa vanu vange, nange lalo njikapwa Njambi yavo, njikavashwana na kulongwa na vushunga.

⁹ “Simpeni! Ololo mulinakuziva majwi a cifwa cimo ngwe aje vendekele vaka-kwimanena a simbu ije vajalele luvula lwakutungulula Njuvo yange.

¹⁰ Te simbu ije kanda icete, naumo wai wakumwine vanu nambe tusitu, co naumo wai wakele mu kwoloka ku vitozi vendi. Cooni njatavele munu woshe kulilwisa umo na mukwavo.

¹¹ Oloni ololo kunjesi nakunyanyamesa vanu vaje vanasalao va ku muyati ou.

¹² Vakakuna vimbuto vyavo mu kwoloka. Co miti yavo ya mikolovozi ya vushuka vwa vinyu ikaima vushuka, livu likakala na vwilo mukutuwisa vimbuto, co kukakala nyonzi yaingi. Vivezikiso vyoshe evi njikavyana kuli vanu va ku muyati wange vaje vanasalao.

¹³ Vanu va mu Yunda na vanu va mu Isalele! Ku san̄ulu vaka-kwija valisingile umo na mukwavo nakwendeka ngwavo, ‘N̄avava ije vene yawililile a Yunda na a Isalele iwile ali yeni.’ Oloni njikamyamena, co vaka-kwija vaje vakendeka kuli umo na mukwavo ngwavo, ‘Tambuleni vivezikiso vya cifwa cimo vije vyakele a Yunda na a Isalele!’ Ngecivene, simpeni kesi muzive lyova.”

¹⁴ Shukulu Kalunga Muka-nzili yoshe alinakwendeka ngwendi, “Omo vakukulwila veni vanjiluvalesele, co njayongwele kuvalinga mwamuvi, co kunjatengulwile viyongola vyange embwe, oloni njalingile ngwe vene muje njayongwele.

¹⁵ Oloni ololo njayongola kuvezikisa vanu va mu Yelusalema na mu Yunda. Ngecivene, kesi muzive lyova.

¹⁶ Evi vikevyo vyuma vimunapande kulinga, endekeni lika vushunga kuli umo na mukwavo. Mu vimbanja sompeni mu vushunga vuje vunena kwoloka.

¹⁷ Kesi mulitumbile matumbe akulivulumuna umo na mukwavo. Kesi mulisinge omo mwendeka makuli. Njazinda makuli kujeneka vushunga na muuka.”

¹⁸ Shukulu Kalunga Muka-nzili yoshe walekele Zakaliya majwi awa ngwendi,

¹⁹ “Kulikela kulya kuje kukakalako ku ngonde yamuciwana, na yamucitanu, na yamucitanu na vivali, na ku ngonde yamulikumi vikapwa viwano vyakujolela nakuvwaelela vya vanu va mu Yunda. Munapande kuzema vushunga na kwoloka.”

²⁰ Shukulu Kalunga Muka-nzili yoshe alinakwendeka ngwendi, “Simbu ikaija omo vanu vakatunda ku vinganda vyakama vakaija ku Yelusalema.

²¹ Co vaje vakatunda ku nganda imo vakendeka kuli vaje vakatundu ku nganda ikwavo ngwavo, ‘Yetu tulinakuya nakulemesa Shukulu Kalunga Muka-nzili yoshe nakulombela vivezikiso vyendi. Ijeni tuye amolika netu!’

²² Vanu vavangi na miyati ya vanu va nzili vakaija ku Yelusalema nakulemesa Shukulu Kalunga Muka-nzili yoshe nakulombela vivezikiso vyendi.

²³ A matangwa aje vaka-kwija likumi vakaija kuli kaYunda umo nakwendeka ngwavo, ‘Tuya amolika nove, omwo tunazivi ngeci Njambi ali amo nove.’ ”