Zakaliya 7 - Livulu lya Shukulu Kalunga

Shukulu Kalunga ahisa kulikela kulya kwa civembulu

¹ Mu mwaka wamuciwana omo Ndalyuse wapwile mwene, a litangwa lyamuciwana ku ngonde yamucitanu na viwana (ngonde ya Kiseleve), Shukulu Kalunga wendekele kuli yange.

² Vanu va ku Mbetele vanatumu Shalezele na Lengemeleki na vanu vendi kuya ku Njuvo ya Shukulu Kalunga Muka-nzili yoshe mukulomba vivezikiso vyendi,

³ nakwihula cihula eci kuli vaka-kukombelela na kuli vaka-kwimanena ngwavo, “Kuma tunapande kutwalao kulila nakulikela kulya ku ngonde yamucitanu ngwe mutwakele nakulinga myaka yaingi omwo Njuvo ya Shukulu Kalunga inanyongo ndi?”

⁴ Awa akewo majwi a Shukulu Kalunga aje ezile kuli yange.

⁵ Shukulu Kalunga wendekele kuli yange ngwendi, “Leka vanu voshe va mu lifuti na vaka-kukombelela ngwove omo mwalikelele kulya nakulila ku ngonde yamucitanu na ku ngonde yamucitanu na vivali mu myaka eyi makumi atanu na avali, kumwanjisingimikile embwe.

⁶ Oloni valile nakunwa, capwile cizango cavo vavenya cakulivwaelelesa.”

⁷ Evi vikevyo vyendekele Shukulu Kalunga ali vaka-kwimanena vakulivanga a simbu ije omo Yelusalema yakele mwamuvwa nakushula na vanu, co lalo omo vanu vavangi kuvakele lika mu vinganda vije vyazengelekele Yelusalema, oloni vakele lalo mu lifuti lya ku mbwela, na mu lifuti lya ku vushelumukilo vwa malundu lya mu kangombe ka yambi.

Kujeneka kwononoka kukekwo kwanenesele vunzinda

⁸ Shukulu Kalunga walekele majwi awa kuli Zakaliya ngwendi,

⁹ “Ku san̄ulu njashikile mashiko awa kuli vanu vange ngwange, ‘Moneni ngeci vushunga vulinakulingiwa, mweseni ngozi na mema ku mbunge kuli umo na mukwavo.

¹⁰ Kesi muyandese vifwile, nambe visiwa, nambe vaka-kwija vaje vali akati keni, nambe munu woshe uje najeneka. Co kesi mweseke kutumba matumbe akuvulumuna vakweni embwe!’

¹¹ “Oloni vanu vange vakaluwisile vimbunge vyavo manene, co vavyanene kunjitolilila. Vashokele mana avo,

¹² nakukaluwisa manene vimbunge vyavo ngwe limanya. Omwo kuvatolililile ku vilongesa vije njavatuminine kwitilila muli vaka-kwimanena vaje vakeleko ku san̄ulu, co njaluvalele manene.

¹³ Omwo kuvatolililile omo njendekele, co kunjavakumbulwile omo valombelele.

¹⁴ Co njavapekumwine ngwe lihunzi nakuvatwala ku mafuti eka ngeci vakayoyeleko. Lifuti eli lyalivwa lyasalele mu ngundu yangoco, naumo wai wayoyelelemo.”