Zakaliya 6 - Livulu lya Shukulu Kalunga

Cimona ca matemba awana

¹ Njamwene cimona cikwavo. A simbu eyi njamwene matemba awana atundile mukati ka minkinda ivali ya vunengu.

² Litemba lyakulivanga valikokele tuvalu vakuvenga, co lyamucivali valikokele tuvalu vakuzivala,

³ lyamucitatu valikokele tuvalu vakutoka, co lyamuciwana valikokele tuvalu vakuvenguluka.

⁴ Co njehwile uje kangelo ngwange, “Mwane, awa matemba alumbunuka cuma mukajo?”

⁵ Wanjikumbulwile ngwendi, “Awa anapu mahunzi awana, anatundu ku mesho a Shukulu Kalunga wa ano asi oshe.”

⁶ Co litemba lije livakokele tuvalu vakuzivala lyaile ku kunto ku Mbambilone, co tuvalu vakutoka vakengeselele mu kangombe ka yambi, co tuvalu vakuvenguluka vaile ku lifuti lya ku mbwela.

⁷ Omo tuvalu vakuvenguluka vatuukile, vakele na cizango cakama cakuya nakwilula ano asi. Co kangelo wendekele ngwendi, “Yeni mukelule asi!” Co vaile vene.

⁸ Co uje kangelo watambekele kuli yange ngwendi, “Tuvalu vaje vaile ku kunto ku Mbambilone vanolwesa vukalu vwa Shukulu Kalunga.”

Lishiko lyakuzika Yoshwa cilongo

⁹ Shukulu Kalunga wanjilekele majwi awa ngwendi,

¹⁰ “Ambata vwana ovu vunatundu kuli vaje vinzinda Helendayi, na Toviya, na Yendaya, ya lelo vene ku njuvo ya Yosiya muna Zefaniya. Vanalume voshe ava vanatundu ku vunzinda ku Mbambilone.

¹¹ Tambula siliva na ngolinde vije vivanaana upange cilongo, ukacizike ku mutwe wa Yoshwa Muka-kukombelela Wakama, muna Yehozandake.

¹² Co muleke ngwove Shukulu Kalunga Muka-nzili yoshe alinakwendeka ngwendi, ‘Munalume uje ivanatumbula ngwavo Munango akakula kwoshe kuje kwali, co akatungulula Njuvo yange.

¹³ Ikeye akaitunga, co akatambula kasingimiko kanapande mwene, co ikeye akashwana vanu vendi. Co muka-kukombelela akemana ku litanda lyendi, Co vakapanga amolika mu kwoloka na mukulizivasana.’

¹⁴ Cilongo cikapwa canukiso ca mu Njuvo yange mukusingimika Helendayi, na Toviya, na Yendaya, na Yosiya.”

¹⁵ Vanalume vakatunda kulyala vakaija nakukwasa kutungulula Njuvo ya Shukulu Kalunga. Omo vanayitungulula, cooni mukazivuka ngeci Shukulu Kalunga Muka-nzili yoshe ikeye wanjitumine kuli yeni. Vyoshe evi vikalingiwa nga mwononoka mwamuvwa mashiko a Shukulu Kalunga Njambi yeni.