Zakaliya 5 - Livulu lya Shukulu Kalunga

Cimona ca livulu lyakuzenga lyakupulula

¹ Njakengele lalo, a simbu eyi vene, njamwene livulu lyakuzenga lipulula mu lihunzi.

² Co kangelo wanjihwile ngwendi, “Vikajo wamono?” Njamukumbulwile ngwange, “Njamono livulu lyakuzenga lipulula lyakupwa mamita atanu na awana mu vulaja na mamita awana na litambelo mu vwihi.”

³ Co wendekele kuli yange ngwendi, “Mu livulu eli vanasonekao cisingo cije cikaya ano a kaye koshe. Mu mutambela umo wa livulu eli vanasonekamo ngwavo mwizi woshe vakamutundisa muno mu lifuti, co ku mutambela ukwavo vasonekao ngwavo woshe uje endeka makuli nakulisinga na ikeye lalo vakamutundisa mu lifuti.

⁴ Shukulu Kalunga Muka-nzili yoshe alinakwendeka ngwendi akasholola cisingo eci, co cikakovela mu njuvo ya mwizi woshe na mu njuvo ya munu woshe uje endeka makuli nakulisinga. Cisingo eci cikakala mu vinjuvo vyavo nakuvinyongesa vyoshe njwa.”

Cimona ca munakazi wa mu mutonga

⁵ Co kangelo washolokele lalo wendekele kuli yange ngwendi, “Kenga, cuma ceka lalo cilinakwija!”

⁶ Co njamwihwile ngwange, “Cuma mukajo?” Wanjikumbulwile ngwendi, “Mutonga, unemanena vuvi vwa lifuti lyoshe.”

⁷ Co uje mutonga wakele na cifwiko cakulinga na shumbu. Co omo njakengele, cifwiko cafukukile, mu mutonga mwatumbamene munakazi!

⁸ Co uje kangelo wendekele ngwendi, “Ou munakazi nemanena vuvi.” Asinoni wasindikilile uje munakazi mu mutonga, co wafwikileko lalo cifwiko.

⁹ Njandwile mesho ange, co njamwene vanakazi vavali vapuluwile kuli yange na mambava a nzili ngwe a kanyange-nyange. Co vakakwile uje mutonga nakupulula nawo.

¹⁰ Njehwile uje kangelo ngwange, “Kulijo vatwala uje mutonga?”

¹¹ Co wanjikumbulwile ngwendi, “Vautwala ku Mbambilone, kukekwo kuvakautungila njuvo yakulemesela. Omo ije njuvo inahu kutunga, co uje mutonga vakawaka muje ngeci vaulemese.”