Zakaliya 4 - Livulu lya Shukulu Kalunga

Cimona ca citumbikilo ca ndeya

¹ Co kangelo uje wendekele nange wezile lalo, co wanjindwile ngwe muvakendula munu mu tulo.

² Wanjihwile ngwendi, “Vikajo wamono?” Co njamukumbulwile ngwange, “Njamono citumbikilo ca ndeya ca ngolinde. Co akamwa ali lilonga lya mazi. Co a citumbikilo ca ndeya ali vindeya vitanu na vivali, co ndeya imo na imo ili na mitetango itanu na ivali.

³ Kuli miti ivali ya olive kumukulo wa citumbikilo ca ndeya, ku mutambela umo na umo kuli muti umo.”

⁴ Cooni njehwile uje kangelo ngwange, “Mwane, evi vinemanena vyuma mukajo?”

⁵ Co wanjihwile ngwendi, “Kuma yove kuuzivuka ndi?” Co njamukumbulwile ngwange, “Embwe mwane, kunjizivuka.”

Cikulaeso ca Njambi kuli Zelumbambele

⁶ Co kangelo wanjilekele kwambulula majwi awa kuli Zelumbambele akutunda kuli Shukulu Kalunga ngwange Shukulu Kalunga nendeka ngwendi, “Yove ukahyana, kesi na nzili ya vushwalale nambe na nzili yove vavenya embwe, oloni na Munzinzime wange.

⁷ Minkinda yakama kuyikasa kwimana ku mesho ove. Ukatungulula Njuvo yange, co omo ukaka limanya lyakumanesela mu mutambela walyo, co vanu vakatambeke ngwavo, ‘Kuvwaha, kuvwaha!’ ”

⁸ Co majwi akwavo ezile kuli yange akutunda kuli Shukulu Kalunga.

⁹ Wendekele ngwendi, “Zelumbambele najala luvula lwa Njuvo yange, co ikeye lalo akaimanesa kuyitunga. Omo eci cikalingiwa, vanu vange vakazivuka ngeci yange njakutumine kuli vakevo.

¹⁰ Vakevo vanazivi shwamwa omwo vyuma vyavindondo lika vilinakulingiwa. Oloni vakamona Zelumbambele atwalao kutunga Njuvo yange, co vakajolela.” Co kangelo wanjilekele ngwendi, “Evi vindeya vitanu na vivali vinapu mesho a Shukulu Kalunga atanu na avali, aje alinakumona ano asi oshe.”

¹¹ Co njehwile uje Kangelo ngwange, “Indi ije miti ivali ya olive ili ku mitambela ivali ya citumbikilo ca ndeya ilumbunuka cuma mukajo?

¹² Indi ije minango ivali ya olive ili kumukulo wa miyengo ivali ya ngolinde kuje kulinakutuukila mazi a olive ilumbunuka cuma mukajo?”

¹³ Wanjihwile ngwendi, “Kuma yove kuuzivuka ndi?” Co njamukumbulwile ngwange, “Embwe mwane, kunjizivuka.”

¹⁴ Co wanjilekele ngwendi, “Ava vakevo vanalume vavali vaje vanaangula Njambi nakuvavwavesa ngeci vamupangele, ikeye Shukulu Kalunga wa ano asi oshe.”