Zakaliya 3 - Livulu lya Shukulu Kalunga

Muka-kwimanena amona cimona ca Muka-kukombelela Wakama

¹ Mu cimona cikwavo Shukulu Kalunga wanjimwesele Yoshwa Muka-kukombelela Wakama nemana ku mesho a kangelo ka Shukulu Kalunga. Co kumukulo wa Yoshwa kwemanene lalo Satana, ngeci amuvangeye.

² Kangelo ka Shukulu Kalunga wendekele kuli Satana ngwendi, “Shukulu Kalunga akuhise, Satana! Shukulu Kalunga uje wazema Yelusalema akuhise. Munalume ou napu ngwe cimbundi cakushitula mu tuhya.”

³ Co Yoshwa wemanene kuje, oku nazala vuzalo vwa mazilo.

⁴ Co kangelo wendekele ku mbunga ya vaka-mwilu vaje vemanene nendi ngwendi, “Shululeni vuzalo vwa mazilo ovu vwanazala ou munalume.” Asinoni wendekele kuli Yoshwa ngwendi, “Njinatundisa vuvi vwove, co njikwana vuzalo vwavuha ngeci uzale.”

⁵ Co washikile vaje vemanene nendi ngeci vazike Yoshwa kalupusa kakujela ku mutwe wendi. Co valingile ngacije, asinoni vamuzikile vuzalo vwavuha oku kangelo ka Shukulu Kalunga nemana kuje.

⁶ Asinoni kangelo walekele Yoshwa ngwendi,

⁷ “Shukulu Kalunga Muka-nzili yoshe nendeka ngwendi, ‘Nga wenda mwamuvwa mu vingila vyange nakunyunga mashiko ange, co ukapwa mukulunu wa Njuvo yange na vimbanja vyayo, co njikaziva malombelo ove, ngwe munjikazivi malombelo a tungelo vaje vali ku mesho ange.

⁸ Tolilila, Yoshwa akupwa yove Muka-kukombelela Wakama, cooni tolilileni, yeni vakwavo vaka-kukombelela, yeni munapu cimweso cacivwa ca kulutwe. Njikasholola ngamba yange, uje ivatumbula ngwavo Munango!

⁹ Njaka limanya limo kulutwe lwa Yoshwa lije likakala na mitambela itanu na ivali. Njikolao masona a cimweso, co mu litangwa limolika njikatundisa vuvi vwa lifuti eli.

¹⁰ Omo litangwa lije likaija, umo na umo akalanya mukwavo kwija mukulivwaelelesa nakukala mu kwoloka nakulinyunga, vitungu vya mikolovozi ya vushuka vwa vinyu, na miti ya mikuyu ikamizengeleka.’ ”