Zakaliya 2 - Livulu lya Shukulu Kalunga

Cimona ca mukole wakusetekesa

¹ Mu cimona cikwavo njamwene munalume wakwatele mukole wakusetekesa mu livoko lyendi.

² Co njamwihwile ngwange, “Uya kulijo?” Ikeye wanjikumbulwile ngwendi, “Njiya nakuseteka vulaja na vwihi vwa Yelusalema.”

³ Asinoni njamwene kangelo uje wakele nakwendeka nange ashwenya kulutwe, co kangelo mukwavo wezile nakuliwana nendi.

⁴ Co uje kangelo wakulivanga wendekele kuli uje mukwavo ngwendi, “Shatuka ukaleke uje mukwenje nakwata mukole wakusetekesa ngwove mu Yelusalema mukakala vanu vavangi na vimuna vavangi, co kuyikakala na vivumbe vyakuyizengeleka.

⁵ Shukulu Kalunga nakulaesa ngwendi ikeye vavenya vene akapwa civumbe ca tuhya cakuzengeleka nganda mukuyinyunga, co ikeye vene akakala muje mu nganda mu vumpau vwendi vwoshe.”

Vinzinda vavasana veluke kwimbo

⁶ Shukulu Kalunga wendekele kuli vanu vendi ngwendi, “Njamishandwelele mu mitambela yoshe.

⁷ Oloni ololo, yeni vinzinda pitukeni mutunde ku Mbambilone ngeci mwiluke ku Yelusalema.

⁸ Woshe akamipupa akapupa cuma ca seo yakama manene kuli yange.” Ngecivene, Shukulu Kalunga Muka-nzili yoshe wanjitumine na majwi awa ku miyati ya vanu vaje vapukwilile vanu vendi,

⁹ “Shukulu Kalunga ikeye vavenya akamilwisa, co vakamipukula kuli vanu vaje vapwile vangamba veni.” Omo eci cikalingiwa, co munu woshe akazivuka ngwendi Shukulu Kalunga Muka-nzili yoshe ikeye wanjitumine.

¹⁰ Shukulu Kalunga wendekele ngwendi, “Imbeni nakujolela, yeni vanu va mu Yelusalema! Njikaija nakukala akati keni!”

¹¹ A simbu ije miyati ya vanu vavangi vakaija kuli Shukulu Kalunga, co vakapwa vanu vendi. Co akakala akati keni, co mukazivuka ngeci kuma ikeye nanjitumu kuli yeni.

¹² Co Yunda lalo ikapwa vufuko vwa Shukulu Kalunga vwa seo yakama mu lifuti lyendi lyakujela, co Yelusalema ikapwa nganda ije yaazema manene kutuvakana vinganda vyoshe.

¹³ Munu na munu oloke kuluu ku mesho a Shukulu Kalunga, omwo ikeye alinakwija kutunda ku mutambela wendi wakujela kuje kwakala.