Zakaliya 14 - Livulu lya Shukulu Kalunga

Yelusalema na miyati yeka ya vanu

¹ Kengeni, litangwa lya Shukulu Kalunga lyakusompa lili muyehi. Co Yelusalema vakaipukula, co vije vyakupukula vakavipangela akati keni.

² Shukulu Kalunga akakungulula miyati yoshe ya vanu nakulwisa Yelusalema. Nganda vakayambata, co vakapukula vyuma vya mu vinjuvo, vanakazi vakavazivisa shwamwa. Co litambelo lya vanu vakaya ku vunzinda, oloni vaje vakasalao kuvakavatundisa mu nganda.

³ Asinoni Shukulu Kalunga akaya nakulwa na miyati ya vanu vaje, ngwe mwalwile mu visimbu vya kunima.

⁴ A litangwa lije akemana a Munkinda wa Oliveta, mu ngangela ya Yelusalema. Asinoni Munkinda wa Oliveta ukatavuka akati kushangumuka mu ngangela kweta na mu kangombe ka yambi, co cimbongo cakama manene cikakala mukati. Co litambelo limo lya munkinda likashwenya ku kunto likwavo mu mbwela.

⁵ Co yeni mukatewela mu cimbongo eci caangununa munkinda mu mitambela ivali. Mukatewa ngwe muvatewele vakukulwila veni omo lifuti lyajajele a simbu ya Mwene Uziya wa mu Yunda. Shukulu Kalunga Njambi yange akaija, akaija amo na tungelo twendi vakujela.

⁶ A litangwa lije, kukukakala lisika nambe mema akukonda,

⁷ nambe lisusulungu, likapwa litangwa lya ceke nameme ku simbu ya vutsiki. Vavenya Shukulu Kalunga ikeye lika azivuka litangwa eli.

⁸ Omo litangwa lije likaija, mema akutonola njenje akatuuka kutunda mu Yelusalema, co litambelo lyawo limo likaya ku Lishali lya Kutsa, co litambelo likwavo lalo likaya ku Lishali lya Menditelenyani. Co akaita myaka yoshe, cisika na ndombo akakalako simbu yoshe.

⁹ Asinoni Shukulu Kalunga akapwa mwene wa ano asi oshe, co munu woshe akalemesa kupwa Njambi nakumuzivuka a lizina lyendi.

¹⁰ Lifuti lyoshe, kutunda ku Ngemba ku kunto nakweta ku Limone mu mbwela, likanyekumuka. Yelusalema ikakala a mwela wayo akulunduka, co nganda ikatunda ku Cikolo ca Mbenjemani nakweta ku Cikolo ca mu Mbango, kuje kwakele cikolo calaja, kutunda ku Kaposhi ka Hananele, nakweta ku cikamwino ca vinyu.

¹¹ Vanu vakakala kuje mu kwoloka, co kukukakala lalo lyova lyakunyonga.

¹² Shukulu Kalunga akanena mushongo wakukomokesa a miyati ya vanu voshe vaje valwisa Yelusalema. Situ yavo ikavola oku vakevo vacili nakuyoya, mesho avo na vindaka vyavo vikavola.

¹³ A simbu ije Shukulu Kalunga akavaiya-yiisa na lyova ngeci munu na munu akakwata munu uje yakalyata nendi nakumulwisa.

¹⁴ Vanu va mu Yunda vakalwa mukuvingilikiya Yelusalema. Co vakambata vufuko vwakupukula vwavungi vwa miyati ya vanu voshe, ngolinde na siliva na vuzalo.

¹⁵ Co mushongo wakukomokesa lalo ukakala a tuvalu, na a vamula, na a tumelo, na a vimulu, na a tusitu voshe vaje vakakala mu vilombo vya vitozi.

¹⁶ Asinoni vaje vasaleleo ku miyati yoshe ya vanu vaje valwisile Yelusalema vakaya ku Yelusalema a mwaka na mwaka mukulemesa Shukulu Kalunga Muka-nzili yoshe ngwe mwene, co vakalisamba a Ciwano ca Mapapela.

¹⁷ Nga muyati umo wa vanu vakavyana kuya nakulemesa Shukulu Kalunga Muka-nzili yoshe, co nyonzi kuyikanyokela mu lifuti lyavo.

¹⁸ Nga vaka-Ingito vakavyana kulisamba a Ciwano ca Mapapela, co navo vakavinja mushongo wa cifwa cimo uje wakatuma Shukulu Kalunga ku muyati woshe wa vanu vaje vakavyana kuyako.

¹⁹ Eci cikapwa cihiso ca a Ingito na a miyati ya vanu voshe nga kuvakalisamba Ciwano ca Mapapela.

²⁰ A litangwa lije vakasoneka a vingenjo vya tuvalu ngwavo, “Vyakukundika kuli Shukulu Kalunga.” Vindeo vya mu Njuvo ya Shukulu Kalunga vikapwa vyakujela ngwe malonga a ku mutula.

²¹ Vindeo vyoshe vya mu Yelusalema na mu Yunda mwoshe vakavyangunwina kwavyo lika nakuvipangesa mukulemesa Shukulu Kalunga Muka-nzili yoshe. Co vanu vaje vakombelela vin̄ombelo vakavipangesa akutelekamo situ yakukombelela. Omo simbu ije iketa, kukukakala muka-kulandesa mu Njuvo ya Shukulu Kalunga Muka-nzili yoshe.