Zakaliya 13 - Livulu lya Shukulu Kalunga

¹ Shukulu Kalunga Muka-nzili yoshe alinakwendeka ngwendi, “A litangwa lije, lisima lya kavwelu-vwelu likashokoloka mukujelesa vatekulwila va Ndaviti na vanu va mu Yelusalema ku vuvi vwavo na ku tumponya.

² A litangwa lije njikatundisa mazina a tumponya mu lifuti, co naumo wai lalo akavanuka. Njikatundisa woshe uje akalitumbula muka-kwimanena, co njikatundisa cizango cakulemesa tumponya.

³ Asinoni nga munu umo anga akashaka kwambulula vuka-kwimanena, co vaishe na vaina vakamunangula ngwavo yove unapande kutsa vene, omwo ulinakwendeka makuli mu lizina lya Shukulu Kalunga. Nga anga akatwalao kwambulula vuka-kwimanena, co vaishe na vaina vakamutsiya na mukwale.

⁴ A litangwa lije, naumo wai muka-kwimanena akalyalesa na vimona vyendi, nambe kupwa ngwe muka-kwimanena, nambe kuzala vuzalo vwa muka-kwimanena vwa vulaja ngeci akwise vanu.

⁵ Oloni ikeye akendeka ngwendi, ‘Yange kesi nji muka-kwimanena embwe. Yange njapwa ndimi njapwa muka-kulima simbu yoshe yakuyoya kwange.’

⁶ Oloni nga munu umo akamwihula ngwendi, ‘Indi vimbandu vyavika ovyo vili a nulo yove?’ Co akakumbulula ngwendi, ‘Njavivetwele ku njuvo ya musamba wange!’ ”

Lishiko lyakutsiya kanyungi ka Njambi

⁷ Shukulu Kalunga Muka-nzili yoshe alinakwendeka ngwendi, “Induka mukwale, ngeci ulwe na kanyungi kange uje muka-kunjipangela! Mutsiye, co vimanga vakalishandoka. Yange njikalwisa vanu vange,

⁸ co mu lifuti mwoshe matambelo avali ku matambelo atatu a vanu vakatsa.

⁹ Co njikelula litambelo lyamucitatu vaje vakasalao nakulijelesa ngwe muvakajelesa siliva na tuhya. Co njikavelula ngwe muvakelula ngolinde. Asinoni vakalombela kuli yange, co njikavakumbulula. Njikavaleka ngwange vanapu vanu vange, co vakalitavela ngeci yange njinapu Njambi yavo.”