Zakaliya 12 - Livulu lya Shukulu Kalunga

Kupatuka kwa Yelusalema kwa kulutwe

¹ Awa akewo majwi a Shukulu Kalunga kuli Isalele, Shukulu Kalunga uje wajangumwine melu, uje watangele asi, nakwana mwonyo kuli munu. Ikeye alinakwendeka ngwendi,

² “Njikapwisa Yelusalema ngwe nganja ya vinyu, miyati ya vanu vaje vanazengelekako vakanwako, co vakapelyangela ngwe vaka-kupenda. Co omo vakavandamena Yelusalema mukuyilwisa, co na vinganda vikwavo vya mu Yunda vakavivandamena mukuvilwisa lalo.

³ Oloni omo simbu ije iketa, Yelusalema njikaipwisa ngwe limanya lyakulema, muyati woshe wa vanu vaje vakeseka kulijundula vakavulumuka. Co miyati yoshe ya vanu va mu kaye vakalipandakana amo nakuyilwisa.

⁴ A simbu ije njikayiya-yiisa tuvalu twavo twoshe, co vaka-kulondao voshe vakapwa viyambangani. Njikanyunga vanu va mu Yunda, oloni njikatsitsivalesa mesho a tuvalu twa vitozi vavo.

⁵ Asinoni vikota vya Yunda vakalyendekesa vakevo vavenya ngwavo, ‘Shukulu Kalunga Njambi Muka-nzili yoshe akana nzili kuli vanu vendi vaje vakala mu Yelusalema!’

⁶ “A simbu ije vikota vya Yunda njikavapwisa ngwe tuhya twa mu shwata nambe ngwe tuhya twa mu lihya lya vimbuto vyakuhya, vakanyongesa miyati yoshe ya vanu vaje vanalyata navo. Co vanu va mu Yelusalema vakakala mu kwoloka mu nganda.

⁷ “Yange Kalunga, njikahyanesa mbunga ya mashwalale va mu Yunda akulivanga, ngeci kasingimiko ka vatekulwila va Ndaviti na kasingimiko ka vanu va mu Yelusalema kesi kakatuvakane ka vanu va mu Yunda.

⁸ A simbu ije Shukulu Kalunga akanyunga vaje vakala mu Yelusalema, nameme vaje vakuzeya manene akati kavo vakakala na nzili ngwe yakele nayo Ndaviti. Vatekulwila va Ndaviti vakashwana ngwe kangelo ka Shukulu Kalunga, ngwe Njambi vene vavenya.

⁹ Co a simbu ije njikanyongesa muyati woshe wa vanu vaje vakeseka kulwisa Yelusalema.

¹⁰ “Njikashulisa vatekulwila va Ndaviti na vanu veka va mu Yelusalema na munzinzime wa mema ku mbunge na munzinzime wakulombela. Vakakenga kuli uje ivativile likunga nakumutsiya, co vakamulila ngwe vaje vanatsisa munavo umolika. Vakalila manene, ngwe vaje vanatsisa munavo wa ntwatwa umolika wa munalume.

¹¹ A litangwa lije kukakala kulila kwakama mu Yelusalema ngwe kulila kwakulilila Handandelimone mu cana ca Mengindo.

¹² Lifuti likalila, naanga na naanga vakalilila kwavo lika, vatekulwila va ku naanga ya Ndaviti, na vatekulwila va ku naanga ya Natane,

¹³ na vatekulwila va ku naanga ya Levi, na vatekulwila va ku naanga ya Shimei, na vinaanga vikwavo vyoshe.”

¹⁴ Naanga na naanga vakalilila kwavo lika, vanalume va ku naanga na naanga vakalilila kwavo lika kulyangunuka na vanakazi.