Zakaliya 11 - Livulu lya Shukulu Kalunga

Kunyonga kwa vitozi va Isalele

¹ Yove Lembanone shokolola vikolo vyove, ngeci tuhya twenyeke miti yove ya kendale!

² Miti ya sipelese, lileni nakutambeka, miti ya kendale inau, miti ije ya vumpau vanainyongesa! Miti ya oke ya ku Mbashane, lileni nakutambeka, shwata yakuzika vanaishinji!

³ Vaka-kushwana valinyenga na vusiwa, omwo vumpau vwavo vunahu njwa! Tolilileni kwaana kwa vindumba, omwo shwata ije yapwa limbo lyavo lya ku ngenge ya Yondau inanyongo!

Tunyungi vavali

⁴ Shukulu Kalunga Njambi yange wendekele kuli yange ngwendi, “Pwa kanyungi ka vimanga vaje vavatwala mukuvatsiya.

⁵ Vavenyavo vakavatsii, oloni kuvesi kuvanyanyamesa. Vakalandesa situ nakwendeka ngwavo, ‘Shangazaleni Shukulu Kalunga! Tunafuku oni!’ Nameme tunyungi twa vaje vimanga kuvesi kuvatetela embwe.”

⁶ (Shukulu Kalunga wendekele ngwendi, “Kunjikatetela lalo munu ano asi naumo wai. Oloni njikaka vanu voshe mu mavoko a vaka-kushwana. Co vaka-kushwana vaje vakaviisa asi, co kunjikaamena ku mavoko avo.”)

⁷ Vaje valandele nakulandesa vaje vimanga vanjikumwine, co njapwile kanyungi ka vimanga vaje vavatwalele mukuvatsiya. Co njanonele milamu ivali, umo njaulukile “Ngozi,” co ukwavo njaulukile “Vumo.” Co njanyungile vutanga.

⁸ Kunjasimpile na vamo tunyungi vakwavo vatatu, vaje vanjizindile, co voshe njavatundisile mu ngonde imolika.

⁹ Asinoni njendekele ku vutanga ngwange, “Kunjikapu lalo kanyungi keni. Co vaje vatsa vatse ngano. Na vaje vanyonga vanyonge ngano. Co vaje vakasalao vakalinyongesa umo na mukwavo.”

¹⁰ Asinoni njanonele mulamu uje njatumbwile ngwange, “Ngozi,” co njaupokwele, mukuzimangana cikumiiyo cije calikumiiye Shukulu Kalunga na miyati yoshe.

¹¹ Ngecivene, cikumiiyo eci cazimanganene a litangwa lije. Vaje valandele nakulandesa vimanga vanjimwene, co vazivukile ngwavo Shukulu Kalunga ikeye wendekele mu vije vinjalingile.

¹² Njendekele kuli vakevo ngwange, “Nga mushaka, njaneni fweto yange. Oloni nga sheni, likeleni ngano.” Ngecivene, vanjifwetele mavundungulu a siliva makumi atatu.

¹³ Shukulu Kalunga wendekele kuli yange ngwendi, “Vyake mu mbango ya mu Njuvo yange.” Ngecivene, njambatele mavundungulu a siliva makumi atatu ndando ije ivayongwele ngwavo, ikeyo yanjipande, co njaakele mu mbango ya mu Njuvo ya Shukulu Kalunga.

¹⁴ Asinoni njapokwele mulamu wamucivali, unjatumbwile ngwange, “Vumo,” co vumo vwa Yunda na Isalele vwahwile.

¹⁵ Asinoni Shukulu Kalunga wendekele kuli yange ngwendi, “Ilukila lalo a vipangi vya vunyungi, a simbu eyi ukapwa oni wakujeneka seo.

¹⁶ Njinemika kanyungi mukunyunga vutanga vwange, oloni ikeye kakanyungu mwamuvwa vimanga vaje vashaka kutsa, nambe kushakezeka vaje vanazimbala, nambe kusaka vaje vanavulumuka, nambe kulisa vaje vanasalao. Oloni ikeye akali lika situ ya vaje vimanga vakununa nakuvatavozola lika vimbemba vyavo.

¹⁷ Kanyungi uje wakujeneka seo navindama! Naseze vutanga vwendi. Mwa vushunga nzita ikamanesa nzili yendi. Livoko lyendi likasekwa, co lisho lyendi lya ku cilyo likatsa.”