Zakaliya 10 - Livulu lya Shukulu Kalunga

Shukulu Kalunga akulaesa kwamena

¹ Lombeni nyonzi kuli Shukulu Kalunga a simbu ya nyangao. Ikeye Shukulu Kalunga muka-kutuma mashelwa a nyonzi ya vusuku-mbundu, mukuzivalesa vimbuto vya mu mahya a munu na munu.

² Vanu vakai nakwihula ku tumponya na kuli vaka-kulukiya, oloni kukumbulula kwavo kwapwa kwangoco na makuli. Vamo vakalumbununa vinjozi, oloni vamitanganesa lika, kuzembeleka kuje vakamwesa kwapwa kwangoco. Ngecivene, vanu vakalyendanganena ngoco ngwe vimanga kuvesi na kanyungi. Vali mu vushonde omwo kuvesi na ntwama.

³ Shukulu Kalunga alinakwendeka ngwendi, “Njinaluvala na vaka-kwija vaje valinakushwana vanu vange, co njikavanyanyamesa. Vanu va mu Yunda vanapu vange, co yange Kalunga Muka-nzili yoshe, njikavanyunga. Vakapwa ngwe tuvalu vange va nzili va nzita.

⁴ Akati kavo akatunda vaka-kushwana, na vantwama, na vaka-kushika mukushwana vanu vange.

⁵ Vanu va mu Yunda vakahyana ngwe mashwalale valyatangela vitozi vavo ngwe lindova lya mu vitapalo. Vakalwa omwo Shukulu Kalunga akakala amo navo, co vakafungulula nameme vitozi vavo vaka-kwendela a tuvalu.

⁶ “Vanu va mu Yunda njikavapwisa vaka-nzili, njikapatula vanu va mu Isalele. Njikavazivila ngozi, co voshe njikavelwisa kwimbo. Vakapwa ngwe vaje kunjavyanene. Yange njapwa Kalunga Njambi yavo, njikakumbulula malombelo avo.

⁷ Vanu va mu Isalele vakapwa vaka-nzili ngwe mashwalale, vakavwaelela ngwe vanu vananu vinyu. Vatekulwila vavo vakanuka kuhyana oku, co vakavwaelela omwo a vije vyanalingi Shukulu Kalunga.

⁸ “Njikasana vanu vange nakuvakungulwila amolika. Njikavapatula, co njikavapwisa vavangi ngwe muvapwile laja.

⁹ Nameme njavashandwela akati ka miyati ya vanu, oloni ku mitambela yakulyala kuje vali vakanjanuka. Vakevo na vana vavo vakayoya, co vakeluka mumolika kwimbo.

¹⁰ Njikavatundisa ku Ingito na ku Asilya nakuvelwisa kwimbo, co vakatunga mu lifuti lyavo. Vakakala lalo mu Ngilyande na mu Lembanone, lifuti lyoshe likashula na vanu.

¹¹ Omo vakaita mu mema a kalunga a tuyando, yange Kalunga njikolwesa mankimba, co Ndonga ya Nailo ikauma cau. VaAsilya vaka-kulyalesa vakalikeesa, co nzili ya Ingito ikahwa.

¹² Vanu vange vakapwa vaka-nzili, vakanjilemesa nakunjononoka.” Mwanendeka Shukulu Kalunga.