Yowano 9 - Livulu lya Shukulu Kalunga

Yesu akangwisa munalume wasemukile kapuputwa

¹ Omo Yesu wetile, wamwene munalume uje wasemukile kapuputwa.

² Co vandongisi vendi vamwihwile ngwavo, “Mulongisi, iya walingile vuvi ngeci asemuke kapuputwa? Ikeye nambe visemi vendi?”

³ Yesu wavakumbulwile ngwendi, “Kesi ikeye walingile vuvi nameme visemi vendi kuvalingile vuvi embwe. Oloni napu kapuputwa ngeci nzili ya Njambi isholoke muli ikeye.

⁴ Tunapande kupanga vipangi vya uje wanjitumine omo kucili mutanya, vutsiki vulinakwija omo naumo wai asa kupanga.

⁵ Omo njili ano a kaye njinapu ceke ca vaka-kaye.”

⁶ Omo wamanesele kwendeka ngeci, Yesu wajekwilile mate asi, co watikile mate na livu, wakwitile livu a mesho a kapuputwa

⁷ co wamulekele ngwendi, “Ya ukajwele ku mesho ove ku Lishali lya Siloame.” (Kulumbununa ngwavo, “Vanamutumu.”) Ngecivene, waile wakajwelele ku mesho, co welukile alinakumona.

⁸ Vandambo vendi na vaje vamumwene laja alinakulomba vwana vehwile ngwavo, “Ou kesi ikeye uje munalume watumbamene nakulomba vwana ndi?”

⁹ Vamo vendekele ngwavo, “Ikeye vene,” oloni veka ngwavo, “Kesi ikeye embwe, nalifu nendi lika.” Ngecivene, ikeye vavenya wendekele ngwendi, “Yange vene.”

¹⁰ Vamwihwile ngwavo, “Mesho ove anatono vati?”

¹¹ Wakumbulwile ngwendi, “Munalume uje ivatumbula ngwavo Yesu natikile livu nakunjikwita a mesho, co wanjilekele ngwendi njiye ku Siloame, co njikajwele ku mesho. Ngecivene, njaile nakujwela, co njamwene.”

¹² Vamwihwile ngwavo, “Ali kulijo ikeye?” Wakumbulwile ngwendi, “Kunjizivuka.”

VaFaliseo valowelela akukangwisa oku

¹³ Asinoni vatwalele uje munalume wapwile kapuputwa akulivanga kuli vaFaliseo.

¹⁴ Litangwa lije lyatikile Yesu livu nakutonesa mesho endi lyapwile Litangwa Lyakuhwima.

¹⁵ VaFaliseo vamwihwile lalo vati ikeye wasele kumona. Co wavalekele ngwendi, “Ikeye wakwitile livu a mesho ange, co njajwelele ku mesho, co ololo njilinakumona.”

¹⁶ VaFaliseo vamo vendekele ngwavo, “Munu ou nalingi eci katundile kuli Njambi, omwo kononokele Litangwa Lyakuhwima.” Oloni vamo ngwavo, “Muka-vuvi asa kulinga vati vizivukiso ngeci evi?” Co valipangele akati kavo.

¹⁷ Ngecivene, vaFaliseo vehwile lalo uje munalume ngwavo, “Umutumbula vatijo omo natonesa mesho ove?” Wakumbulwile ngwendi, “Napu muka-kwimanena.”

¹⁸ Vakulunu va vaYunda kuvakulaelele ngwavo wapwile kapuputwa, co natono, noo vasanene visemi vendi.

¹⁹ Co vavehwile ngwavo, “Ou muneni ndi? Munendeka ngweni wasemukile kapuputwa, natono vati?”

²⁰ Visemi vendi vakumbulwile ngwavo, “Tuzivuka ngwetu munetu, co tuzivuka ngwetu wasemukile kapuputwa.

²¹ Oloni kutuzivuka mwanatonena, nameme lalo kutuzivuka ou namutonesa. Mwihuleni ikeye vavenya nakolo, co amikumbulula!”

²² Visemi vendi vendekele ngeci omwo vazivile lyova lya vakulunu va vaYunda, vaje valizivasanene laja ngeci nga umo endeka ngwendi Kilistu ikeye Wakuvwavesa, co vamusheka mu sinangonge.

²³ Mukemwo visemi vendi vendekele ngwavo, “Nakolo, mwihuleni ikeye vavenya!”

²⁴ Ngecivene, vasanene uje munalume wapwile kapuputwa lwamucivali vamwihwile ngwavo, “Kulaesa ku mesho a Njambi ngeci wendeka vushunga! Tunazivuka ngwetu munalume ou nakutonesa napu muka-vuvi.”

²⁵ Wakumbulwile ngwendi, “Kunjizivuka nga ikeye muka-vuvi nambe embwe. Cuma cimo lika cinjizivuka ngwange, nameme njapwile kapuputwa, co ololo njitona.”

²⁶ Vamwihwile ngwavo, “Vika nalingile nove? Vatijo natonesele mesho ove?”

²⁷ Wavakumbulwile ngwendi, “Njamileke laja, oloni kumwanjitolililile. Omwo vikajo mushaka lalo kuziva lwamucivali? Mushaka kupwa vandongisi vendi ndi?”

²⁸ Co vamushawile ngwavo, “Yove u ndongisi yendi, oloni yetu tu vandongisi va Mosesa.

²⁹ Tuzivuka ngeci Njambi wendekele na Mosesa, oloni munu ou kutuzivuka noku kwatunda!”

³⁰ Munalume wavakumbulwile ngwendi, “Eci cinapu cuma cakukomokesa! Kumuzivuka oku kwatunda, oloni nanjitonesa!

³¹ Tuzivuka ngwetu Njambi kesi kutolilila ku vaka-vuvi, oloni akatolilila lika kuli vaje vamusingimika nakulinga vije vyashaka ngeci vavilinge.

³² Tunde akutanga kwa kaye kanda tuzive umo ngwavo natonesa mesho a munu wasemukile kapuputwa.

³³ Nga munu ou katundile kuli Njambi, kasa kulinga cuma cimo.”

³⁴ Vakumbulwile ngwavo, “Yove wasemukile nakukulelela mu vuvi, co ushaka kutulongesa ndi?” Co vamushekele mu sinangonge.

Vupuputwa vwa mu munzinzime

³⁵ Omo Yesu wazivile vije vyalingiwile, co wawanene uje munalume wamwihwile ngwendi, “Unakulaela kuli Muna Munu ndi?”

³⁶ Uje munalume wakumbulwile ngwendi, “Njileke, ikeye iyajo, mwene, ngeci njikulaele kuli ikeye!”

³⁷ Yesu wendekele kuli ikeye ngwendi, “Unamumono laja, co ikeye ou alinakwendeka nove ololo.”

³⁸ Uje munalume wendekele ngwendi, “Mukemwo vene Mwene, njinakulaela!” Co watsikamene a mavuli ku mesho a Yesu.

³⁹ Yesu wendekele ngwendi, “Omwo njinaija ano a kaye mukusompa, ngecivene, tupuputwa vase kumona, co vaje valinakumona vapwe tupuputwa.”

⁴⁰ VaFaliseo vamo vaje vakele nendi omo vazivile vije vyendekele, co vendekele kuli ikeye ngwavo, “Kuma utumbula lalo yetu ngwove tutupuputwa ndi?”

⁴¹ Yesu wakumbulwile ngwendi, “Nga mwapwile mutupuputwa, nga kumwesi na mulonga, oloni omwo mwendeka ngweni mumona, eci cilumbununa ngeci anga mucili na mulonga.”