Yowano 8 - Livulu lya Shukulu Kalunga

Munakazi ivakwatele alinga vupangala

¹ Oloni Yesu waile ku Munkinda wa Oliveta.

² Alikaki mutondo-tondo waile ku Njuvo ya Shukulu Kalunga. Mbunga yoshe vamuzengelekele, co watumbamene asi, washangumukile kuvalongesa.

³ Valongisi va majwi a Lishiko na vaFaliseo vanenele munakazi uje vakwatele alinakulinga vupangala, co vamwimikile akati kavo voshe.

⁴ Vendekele kuli Yesu ngwavo, “Mulongisi, ou munakazi vanamukwata alinakulinga vupangala.

⁵ Mu Lishiko lyetu Mosesa washikile ngeci munakazi wa cifwa cangacije vanapande kumutsiya na mamanya. Yove, co wendeka vati?”

⁶ Vendekele ngeci mukweseka Yesu, ngeci vamuwanene kashwilo. Oloni Yesu wakulamene nakusoneka asi na mulavo wendi.

⁷ Omo vemanene kuje nakumwihula, Yesu wandukile wendekele kuli vakevo ngwendi, “Umo wa ali yeni uje kanda alinge vuvi alivange kumwasha limanya.”

⁸ Co wakulamene lalo nakusoneka asi.

⁹ Oloni omo vazivile ngeci, voshe vaile, umo na umo, kushangumukila kuli vakulunu. Co Yesu wasalele endi lika, na uje munakazi anga nemana lwii kuje.

¹⁰ Yesu wandukile wendekele kuli ikeye ngwendi, “Ove munakazi, vali kulijo? Kuma naumo wai nasalao mukukuhisa ndi?”

¹¹ Wamukumbulwile ngwendi, “Naumo wai, Mwene.” Yesu wendekele ngwendi, “Mwamuvwa, nange lalo kunjasa kukuhisa. Ya, oloni kesi ukalinge lalo vuvi.”]

Yesu ikeye Ceke ca Vaka-kaye

¹² Yesu wendekele lalo kuli vaFaliseo ngwendi, “Yange ceke ca vaka-kaye. Woshe anjikava akakala na ceke ca mwonyo, co kakende lalo mu lisusulungu.”

¹³ VaFaliseo vendekele kuli ikeye ngwavo, “Ulinakulilingila yove vavenya vukaleo, oloni vukaleo vwove kesi vwa vushunga embwe.”

¹⁴ Yesu wavakumbulwile ngwendi, “Embwe, nameme nga njendeka vukaleo vwange, oloni vunapu vwa vushunga, omwo njazivuka kuje kunjatundile na kuje kunjiya. Oloni yeni kumuzivuka kuje kunjatundile nambe kuje kunjiya.

¹⁵ Yeni mukasompo vyuma mu ngila ya vunu, yange kunjesi kusompa munu.

¹⁶ Oloni nameme nga njisompa, kusompa kwange kunapu kwa vushunga, omwo kunjesi ange lika embwe, oloni Tate uje wanjitumine ali nange.

¹⁷ Mu Lishiko lyeni vanasoneka ngwavo vukaleo vwa vanu vavali vunapu vwa vushunga.

¹⁸ Yange njambulula vukaleo vwange, co Tate uje wanjitumine ambulula vukaleo vwange lalo.”

¹⁹ Vamwihwile ngwavo, “Isho ali kulijo?” Yesu wavakumbulwile ngwendi, “Yeni kumunjizivuka nambe kuzivuka Tate. Nga mwanjizivukile, nga mwazivuka na Tate lalo.”

²⁰ Yesu wendekele vyoshe evi omo wakele nakulongesa mu Njuvo ya Shukulu Kalunga, mu mulili muje mwakele vikasa vyakulambwila milambu. Oloni naumo wai wamukwatele, omwo simbu yendi te kanda icete.

Kumwasa kuya oku kunjiya

²¹ Yesu wendekele lalo kuli vakevo ngwendi, “Njilinakuya, co mukanjishakezeka, oloni mukatsa mu vivi vyeni. Kumwasa kuya kuje kunjiya.”

²² Ngecivene, vaka-kushwana va vaYunda vendekele ngwavo, “Nendeka ngwendi kutwasa kuya kuje kwaya. Eci cinalumbunuka ngeci akalitsiya ndi?”

²³ Yesu wavakumbulwile ngwendi, “Yeni mu vaka-kaye, oloni yange njitunda kwilu. Yeni mwatunda muno mu kaye, oloni yange kunjatundile muno mu kaye.

²⁴ Mukemwo njamilekele ngwange mukatsa mu vivi vyeni. Omwo mukatsa mu vivi vyeni nga kumukulaela ngweni ‘Yange Ou Njapwa Munjapwa.’ ”

²⁵ Vamwihwile ngwavo, “Yove iyajo?” Yesu wakumbulwile ngwendi, “Muje vene munjamilekele tunde akulivanga.

²⁶ Njili na vyavingi vyakwendeka ali yeni, vyavingi vyakumisompa navyo. Oloni uje wanjitumine ikeye muka-vushunga, co vyuma vije vinjazivile kuli ikeye vikevyo lika njendeka kuli vaka-kaye.”

²⁷ Kuvazivisisile ngeci Yesu wakele nakuvaleka vya ali Ishe.

²⁸ Ngecivene, Yesu wendekele kuli vakevo ngwendi, “Omo mukajundula Muna Munu, asinoni mukazivuka ngweni ‘Yange Ou Njapwa Munjapwa’, asinoni mukazivuka ngeci kunjasa kulinga cuma cimo na nzili yange vavenya, oloni njendeka lika vije vyanjilongesele Tate.

²⁹ Co uje wanjitumine ali amo nange, kanjisezele ange lika embwe, omwo simbu yoshe njikalingi vije vimuvwaelelesa.”

³⁰ Vavangi vaje vazivile Yesu alinakwendeka vyuma evi vakulaelele kuli ikeye.

Vanu vakupatuka na vandungo

³¹ Ngecivene, Yesu wendekele kuli vaje vamukulaelele ngwendi, “Nga mwononoka vilongesa vyange, mwa vushunga munapu mu vandongisi vange,

³² co mukazivuka vushunga, co vushunga vukamipatula.”

³³ Vamukumbulwile ngwavo, “Yetu tu vatekulwila va Avilahama, kanda tupwe tu vindungo va munu umo embwe. Vika ulumbununa akwendeka ngwove, ‘Vakamipatula’?”

³⁴ Yesu wendekele kuli vakevo ngwendi, “Mwa vushunga njimileka ngwange, munu woshe alinga vuvi napu ndungo ya vuvi.

³⁵ Ndungo kakundamene ku naanga ya munu simbu yoshe, oloni mwana ikeye wakundamako simbu yoshe.

³⁶ Ngecivene, nga Mwana amipatula, mwa vushunga mukapwa vaka-kupatuka.

³⁷ Njizivuka ngwange mwapwa mu vatekulwila va Avilahama. Oloni mushaka kunjitsiya, omwo kumutambula vilongesa vyange.

³⁸ Njendeka vije vyananjimwesa Tate, oloni yeni mulinga vije vyanamileka ishweni.”

³⁹ Vamukumbulwile ngwavo, “Avilahama ikeye Tatetu.” Yesu wakumbulwile ngwendi, “Nga mwa vushunga mwapwile mu vana va Avilahama, nga neni lalo mulinakulinga vipangi vije vyalingile Avilahama.

⁴⁰ Oloni cuma cimolika cinjinalingi cinapu kumileka vushunga vunjazivile kuli Tate, oloni yeni mushaka kunjitsiya. Avilahama kalingile cuma ngwe eci embwe!

⁴¹ Yeni mulinakulinga vije vyalingile ishweni.” Vakumbulwile ngwavo, “Njambi lika ikeye Tatetu, yetu tu vana vendi va vushunga.”

⁴² Yesu wendekele kuli vakevo ngwendi, “Nga mwa vushunga Njambi wapwa Ishweni, ngwe mwanjizeme, omwo yange njatundile kuli Njambi, ololo njili kuno. Kunjezile na nzili yange vavenya, oloni ikeye wanjitumine.

⁴³ Omwo vikajo kumuzivisisa vije njendeka? Kumushaka kutolilila ku majwi ange.

⁴⁴ Yeni muli na ishweni, Liyavola, co mushaka kukava mashungu a ishweni. Tunde akulivanga ikeye wapwile muka-kutsiya, co kapwile muka-vushunga embwe, omwo muli ikeye kumwakele vushunga. Omo endeka makuli, endeka muje mwafwila, omwo wapwa muka-makuli, co ikeye ishe ya makuli.

⁴⁵ Oloni yange njendeka vushunga, mukemwo kumwesi nakunjikulaela.

⁴⁶ Iyajo akati keni anjihisa a vuvi? Nga njendeka vushunga, omwo vika kumunjikulaela?

⁴⁷ Uje atunda kuli Njambi atolilila ku majwi a Njambi. Yeni kumwatundile kuli Njambi embwe, co mukemwo kumutolililako.”

Yesu na Avilahama

⁴⁸ Vehwile Yesu ngwavo, “Kuma kutwatombwele omo twendekele ngwetu u muka-Samaliya, co muli yove lalo muli munzinzime wakujwala?”

⁴⁹ Yesu wakumbulwile ngwendi, “Muli yange kumwesi munzinzime wakujwala embwe, yange njilinakusingimika Tate, oloni yeni mulinakunjishaula.

⁵⁰ Oloni yange kunjishaka kulyana kasingimiko embwe. Kwali umo ashaka, co ikeye akapwa lyaako.

⁵¹ Mwa vushunga njimileka ngwange, woshe ononoka vilongesa vyange kakatsi.”

⁵² Va Yesu vendekele kuli ikeye ngwavo, “Mwa vushunga ololo tunamono ngeci muli yove muli munzinzime wakujwala! Avilahama watsa, na vaka-kwimanena vatsa, co yove wendeka ngwove woshe ononoka vilongesa vyove kakatsi.

⁵³ Tatetu Avilahama watsa, kuma wasa kulipwisa wakama kutuvakana Avilahama ndi? Co vaka-kwimanena lalo vatsa. Yove unayongola ngwove yove iya?”

⁵⁴ Yesu wakumbulwile ngwendi, “Nga njilisingimika yange vavenya, kasingimiko kange kapwa kangoco. Uje anjisingimika ikeye Tate, uje imutumbula ngweni Njambi yeni.

⁵⁵ Oloni yeni kumwamuzivukile, yange njimuzivuka. Nga njendeka ngwange kunjimuzivuka, co njipwa nji muka-makuli ngwe yeni. Oloni yange njimuzivuka, co njinonoka lijwi lyendi.

⁵⁶ Ishweni Avilahama wajolelele ngeci amone litangwa lyakwija kwange, walimwene, co wajolelele.”

⁵⁷ VaYunda vendekele kuli ikeye ngwavo, “Yove kuwesi na myaka makumi atanu, co wamumona Avilahama ndi?”

⁵⁸ Yesu wakumbulwile ngwendi, “Mwa vushunga njimileka ngwange, simbu kanda Avilahama asemuke, ‘Yange Ou.’ ”

⁵⁹ Ngecivene, vanonele mamanya ngeci vamwashe, oloni Yesu walavukile, co watundile mu Njuvo ya Shukulu Kalunga.