Yowano 6 - Livulu lya Shukulu Kalunga

Yesu alisa vanalume vakupwa 5,000

¹ Munima ya vyuma evi, Yesu wajavukile Lishali lya Ngalileya (nambe Lishali lya Timbelyase, lizina lyalyo likwavo).

² Co mbunga yakama vamukavele, omwo vamwene vizivukiso vyendi vyakukangwisa vaka-kuvinja.

³ Yesu walamatele a munkinda, co watumbamene amo na vandongisi vendi.

⁴ Simbu ya Ciwano ca Pasovala yakele muyehi.

⁵ Yesu wandwile mesho endi, co wamwene mbunga yakama valinakwija kuli ikeye, ngecivene, wehwile Filipu ngwendi, “Kulijo twasa kulanda vyakulya ngeci tulise vanu voshe ava?”

⁶ (Wendekele evi mukweseka Filipu, omo wazivukile vije vyalinga.)

⁷ Filipu wamukumbulwile ngwendi, “Vimbongo vya siliva vyakupwa 200 kuvyasa kupwisamo kulanda makende ngeci munu na munu atambule nameme kalikende kakandondo.”

⁸ Umo wa vandongisi vendi, Anduleo, ndolome ya Simoni Petulu, wendekele ngwendi,

⁹ “Kwali umo mwanike ali na mikasha itanu ya makende a vunga vwa mbale ya maumwa na visi vavali. Oloni kuvyasa kupwamo kuli vanu voshe ava.”

¹⁰ Yesu wavalekele ngwendi, “Lekeni vanu vatumbame asi.” (Kuje kwakele mwila waungi manene.) Ngecivene, vanu voshe vatumbamene asi, vapwile vanalume 5,000.

¹¹ Yesu watambwile ije mikasha ya makende, co wakandelelele kuli Njambi, co wapangezelele vanu vaje vatumbamene kuje asi. Ngecivene, walingile cuma cimo na ku visi lalo, co voshe valile vakutile.

¹² Co omo voshe vakutile, Yesu wendekele kuli vandongisi vendi ngwendi, “Kungululeni evi vimbazuvwila vinasalao, kesi tuviiseo nameme twatundondo.”

¹³ Ngecivene, vavikungulwile vyoshe, co vashulisile mitonga likumi na ivali na vimbazuvwila vya mikasha ya makende itanu ya vungululu vwa mbale ya maumwa vije vivasezele vaje vanu valile.

¹⁴ Omo vanu vakele kuje vamwene cikomokeso eci calingile Yesu, vendekele ngwavo, “Mwa vushunga ou ikeye Muka-kwimanena uje naija ano a kaye!”

¹⁵ Yesu wazivukile ngeci vashakele kumukwata ngeci vamupwise mwene yavo, ngecivene, waile ku malundu endi lika.

Yesu enda akamwa ya mema

¹⁶ Omo litangwa lyatokele, vandongisi va Yesu vaile ku lishali,

¹⁷ vakovelele mu vwato, co vajavukilile musambwa ya lishali nakuya ku Kapenauma. Yapwile simbu ya vutsiki, coYesu simbu kanda acete kuli vakevo.

¹⁸ A simbu ije lihunzi lyahuwile mu lishali nakukatula mankimba.

¹⁹ Omo vandongisi vajavwile kanunda ka makilomita atanu nambe atanu na imo omo vamwene Yesu alinakwenda akamwa ya mema alinakwija kuyehi na vwato, co vazivile lyova.

²⁰ Oloni Yesu wavalekele ngwendi, “Kesi muzive lyova, yange!”

²¹ Asinoni vatavele kumukovelesa mu vwato, co vwasi-vwasi vwato vwetele ku nunda ku mutambela kuje vakele nakuya.

Vanu vashakezeka Yesu

²² Alikaki mbunga vaje vasalele musambwa ya lishali vamwene ngeci kukwakele vwato vweka kuvanga vumolika. Co vazivukile ngeci Yesu kakovelele mu vwato amo na vandongisi vendi, oloni vandongisi vendi vaile avo lika.

²³ Ngecivene, mato eka aje atundile ku Timbelyase, ezile ku cikuma ca kuyehi na mutambela kuje kwakele mbunga ya vaje valile makende omo Mwene wakandelelele kuli Njambi.

²⁴ Ngecivene, omo mbunga ije vamwene ngeci Yesu na vandongisi vendi vaiko kuje, vakovelele mu mato aje, co vaile ku Kapenauma nakumushakezeka.

Yesu ikeye Likende lya Mwonyo

²⁵ Omo vanu vawanene Yesu musambwa ya lishali, vendekele kuli ikeye ngwavo, “Mulongisi, unetele kuno simbu ika?”

²⁶ Yesu wavakumbulwile ngwendi, “Mwa vushunga njimileka ngwange, munanjishakezeka kesi omwo mwamwene vizivukiso vyange embwe, oloni omwo mwalile makende nakukuta.

²⁷ Kesi mupangele vyakulya vije vikavola, oloni pangeleni vyakulya vya mwonyo wa myaka yoshe. Evi vikevyo vyakulya vije vyakamyana Muna Munu, omwo Njambi, Ishe, namwaka cimweso cakumutava.”

²⁸ Asinoni vamwihwile ngwavo, “Vikajo twasa kulinga ngeci tulinge vije vyashaka Njambi?”

²⁹ Yesu wavakumbulwile ngwendi, “Vyashaka Njambi ngeci muvilinge vinapu kukulaela kuli uje yatumine.”

³⁰ Ngecivene, vamukumbulwile ngwavo, “Cizivukiso muka ulinga ngeci tucimone, co tukukulaele? Vipangi mukajo ukalinga?

³¹ Vakukulwila vetu valile maana mu mambo, ngwe muvinendeka visoneka ngwavyo, ‘Wavanene makende akutunda mwilu ngeci valye.’ ”

³² Yesu wendekele kuli vakevo ngwendi, “Mwa vushunga njimileka ngwange, Mosesa kamyanene makende akutunda kwilu, Tate ikeye amyana likende lya vushunga lyakutunda kwilu.

³³ Omwo likende lije lyaana Njambi linapu uje atunda mwilu, co ana mwonyo kuli vaka-kaye.”

³⁴ Vamwihwile ngwavo, “Mwene, twane eli likende simbu yoshe.”

³⁵ Yesu wavalekele ngwendi, “Yange likende lya mwonyo. Uje aija kuli yange kakakala lalo na njala, co uje akulaela kuli yange kakazivi lalo lihwila.

³⁶ Oloni njamilekele ngwange munanjimono oloni kumwasa kunjikulaela.

³⁷ Woshe uje yananjana Tate aija kuli yange. Co woshe uje aija kuli yange kunjikamusheke,

³⁸ omwo njatundile mwilu kesi kulinga cizango cange embwe, oloni kulinga cizango ca uje wanjitumine.

³⁹ Co cizango ca uje wanjitumine cinapu kunyunga voshe vaje vananjana ngeci voshe njikavasangwile ku mwonyo a litangwa lyakukotoka.

⁴⁰ Omwo eci cikeco cizango ca Tate ngeci voshe vaje vamona Mwana nakukulaela kuli ikeye vakale na mwonyo wa myaka yoshe. Co njikavasangwila ku mwonyo a litangwa lyakukotoka.”

⁴¹ VaYunda vashangumukile kungunguta, omwo wendekele ngwendi, “Yange likende lije lyatundile mwilu.”

⁴² Ngecivene, vendekele ngwavo, “Ou munalume kesi ikeye Yesu muna Yosefa ndi? Tuzivuka ishe na vaina. Vatijo ololo endeka ngwendi watundile mwilu?”

⁴³ Yesu wavakumbulwile ngwendi, “Kesi mungungute akati keni.

⁴⁴ Naumo wai aija kuli yange kuvanga Tate uje wanjitumine amunene kuli yange, co njikamusangwila ku mwonyo a litangwa lyakukotoka.

⁴⁵ Vaka-kwimanena vasonekele ngwavo, ‘Voshe Njambi akavalongesa.’ Woshe aziva Tate nakulilongesa kuli ikeye aija kuli yange.

⁴⁶ Eci kucalumbunukile ngeci umo wamona Tate, kuvanga lika uje watunda kuli Njambi ikeye wamona Tate.

⁴⁷ Mwa vushunga njimileka ngwange, uje akulaela ali na mwonyo wa myaka yoshe.

⁴⁸ Yange likende lya mwonyo.

⁴⁹ Vakukulwila veni valile maana mu mambo, oloni vatsile.

⁵⁰ Oloni likende lije litunda mwilu linapu ngeci woshe uje alyako kakatsi embwe.

⁵¹ Yange likende lya mwonyo lije lyatundile mwilu. Nga munu alya ku likende eli, akayoya ku myaka yoshe. Co likende lije linjikamwana linapu muvila wange, uje unjana ngeci vaka-kaye vayoye.”

⁵² Eci cashangumwine vimata vya vikalu akati kavo. Vehwile ngwavo, “Vatijo munalume ou asa kutwana muvila wendi ngeci tuulye?”

⁵³ Ngecivene,Yesu wendekele kuli vakevo ngwendi, “Mwa vushunga njimileka ngwange, nga kumuli muvila wa Muna Munu nakunwa maninga endi, kumukakala na mwonyo.

⁵⁴ Woshe alya muvila wange nakunwa maninga ange ali na mwonyo wa myaka yoshe, co njikamusangwila ku mwonyo a litangwa lyakukotoka.

⁵⁵ Omwo muvila wange ukewo vyakulya vya vushunga, maninga ange akewo vyakunwa vya vushunga.

⁵⁶ Woshe alya muvila wange nakunwa maninga ange akala muli nange, co yange njikala muli ikeye.

⁵⁷ Tate wakuyoya ikeye wanjitumine, omwo ikeye ngeci yange njilinakuyoya lalo. Mu cifwa cimolika uje anjilya akayoya omwo yange.

⁵⁸ Eli likelyo likende lije lyatundile mwilu, kesi ngwe likende lije valile vakukulwila veni, co vatsile embwe. Uje alya likende eli akayoya myaka yoshe.”

⁵⁹ Yesu wendekele evi omo wakele nakulongesa mu sinangonge mu Kapenauma.

Majwi a mwonyo wa myaka yoshe

⁶⁰ Vandongisi vendi vavangi omo vazivile evi vendekele ngwavo, “Vilongesa evi vinapu vyavikalu. Iyajo asa kuvitolilila?”

⁶¹ Oloni Yesu wazivukile ngeci vandongisi vendi vakele nakungunguta omwo lijwi eli, ngecivene, wendekele kuli vakevo ngwendi, “Cuma eci cimilingisa ngeci mulikele ndi?

⁶² Asinoni vatijo nga mumona Muna Munu eluka ku mutambela kuje kwakele laja?

⁶³ Munzinzme wa Wakujela wa Njambi ikeye akaana mwonyo, kesi nzili ya munu. Majwi awa njinendeka kuli yeni akewo a Munzinzime, co anena mwonyo.

⁶⁴ Oloni akati keni ali vamo kanda vakulaele.” (Omwo Yesu wazivukile tunde akulivanga vaje kuvakakulaela na uje akamwenda vungungu.)

⁶⁵ Co wendekele lalo ngwendi, “Omu mukemwo njamilekele ngwange naumo wai aija kuli yange kuvanga Tate amutave.”

⁶⁶ Omwo a cuma eci, vandongisi va Yesu vavangi velukile munima kuvashakele kuya lalo nendi.

⁶⁷ Ngecivene, Yesu wehwile vaje vandongisi likumi na vavali ngwendi, “Vati yenico? Mushaka lalo kwiluka ndi?”

⁶⁸ Simoni Petulu wamukumbulwile ngwendi, “Mwene, tuya kuli iyajo lalo? Yove uli na majwi aje aana mwonyo wa myaka yoshe.

⁶⁹ Co tunakulaela nakuzivuka ngwetu yove Wakujela uje watunda kuli Njambi.”

⁷⁰ Yesu wakumbulwile ngwendi, “Kuma kunjamyangwile yeni likumi na vavali ndi? Oloni umo weni napu liyavola!”

⁷¹ Ikeye watumbwile Yundasa, muna Simoni Isikalyote. Omwo Yundasa, nameme wapwile umo wa vaje likumi na vavali, ikeye akamwenda vungungu.