Yowano 5 - Livulu lya Shukulu Kalunga

Yesu akangwisa muka-kalepa ku lishali

¹ Munima yevi, Yesu waile ku Yelusalema ku ciwano cikwavo ca vaYunda.

² Kuje ku Yelusalema kuyehi na Cikolo ca Vimanga kwakele lishali lyakele na mambalanda atanu, mu ndaka ya ciHevelu valitumbwile ngwavo Mbetezasa.

³ Mbunga yakama ya vaka-mishongo valalele muje mu mambalanda, tupuputwa, na vilema, na vaka-kalepa. Vavandamenene mema atupuke,

⁴ omwo kangelo ka Mwene a simbu na simbu washulukile muje mu lishali nakutupwisa mema. Woshe muka-kuvinja alivangamo, enduka ku mushongo wendi.

⁵ Kwakele munalume umo kuje wavinjile myaka makumi atatu na myaka itanu na itatu.

⁶ Yesu wamumwene nalala kuje, co wazivukile ngwendi uje munalume washwile laja kuvinja, ngecivene, wamwihwile ngwendi, “Ushaka kukanguka ndi?”

⁷ Uje munalume muka-kuvinja wamukumbulwile ngwendi, “Shukulu, kunjesi na munu wakunjikovelesa mu lishali omo mema atupuka, omo njeseka ngwange njikovelemo, weka lalo alivangamo.”

⁸ Co Yesu wendekele kuli ikeye ngwendi, “Katuka, ambata linala lyove, co enda.”

⁹ Vwasi-vwasi uje munalume wakangukile, wambatele linala lyendi, washangumukile kwenda. Lyapwile Litangwa Lyakuhwima omo vyuma evi vyalingiwile,

¹⁰ ngecivene, vaka-kushwana va vaYunda valekele uje munalume wakangukile ngwavo, “Lino linapu Litangwa Lyakuhwima, co eci cinapu kulwisa Lishiko lyetu omo unambata linala lyove.”

¹¹ Wavakumbulwile ngwendi, “Munu uje nanjikangwisa ikeye nanjileka ngwendi njambate linala lyange, co njende.”

¹² Co vamwihwile lalo ngwavo, “Munu iyajo ou nakulekele kulinga ngeci?”

¹³ Oloni uje munalume wakangukile kazivukile Yesu, omwo kwakele mbunga yakama ku mwela kuje, co Yesu wavombolokele.

¹⁴ Omo kwetile kasimbu, Yesu wamuwanene ali mu Njuvo ya Shukulu Kalunga, co wendekele kuli ikeye ngwendi, “Tolilila, ololo unakanguka, kesi ukalinge lalo vuvi kutewa cuma ceka cacivi manene cikakuwana.”

¹⁵ Asinoni uje munalume waile nakuleka vaka-kushwana va vaYunda ngwendi uje namukangwisile ikeye Yesu.

¹⁶ Co vashangumukile kupakesa Yesu, omwo wakangwisile munu ou a Litangwa Lyakuhwima.

¹⁷ Oloni Yesu wavakumbulwile ngwendi, “Tate alinakupanga simbu yoshe, co nange lalo njinapande kupanga.”

¹⁸ Vyendeka evi vyalingisile manene vaka-kushwana va vaYunda ngeci vamutsiye, omwo kesi lika wapokwele lishiko lya a Litangwa Lyakuhwima embwe, oloni wendekele lalo ngwendi Njambi ikeye Ishe, co mu ngila eyi walipwisile mumo na Njambi.

Moko ya Muna Njambi

¹⁹ Ngecivene, Yesu wavakumbulwile ngwendi, “Mwa vushunga njimileka ngwange, Mwana kasa kupanga cuma cimo endi lika, akalingi lika vije amona Ishe alinga. Omwo vije vyalinga Ishe, vikevyo lalo vyalinga Mwana.

²⁰ Omwo Ishe azema Mwana, co amumwesa vyoshe vije vyalinga. Co amumwesa vyuma vyakama ngeci avilinge, co muvavoshe mukalikomokela.

²¹ Ngwe omo Ishe akasangula vatsi nakuvana mwonyo, ngecivene, mu ngila eyi lalo Mwana akana mwonyo kuli vaje ashaka.

²² Nambe Ishe kesi kusompa munu. Oloni naana Mwana moko yakusompa,

²³ ngeci voshe vasingimike Mwana ngwe muvakasingimika Ishe. Uje kasingimika Mwana kasingimika Ishe uje wamutumine.

²⁴ “Mwa vushunga njimileka ngwange, woshe aziva majwi ange, co akulaela kuli uje wanjitumine, ali na mwonyo wa myaka yoshe. Kuvakamusompo embwe, oloni natundu ku kutsa nakovela ku mwonyo.

²⁵ Mwa vushunga njimileka ngwange, simbu ilinakwija, co inete laja, omo vatsi vakaziva lijwi lya Muna Njambi, co voshe vaje valiziva vakayoya.

²⁶ Omwo ngwe Tate wapwa nsina ya mwonyo, ngecivene, mu ngila eyi vene napwisa lalo Mwana nsina ya mwonyo.

²⁷ Co naana Mwana moko yakusompa, omwo napu Muna Munu.

²⁸ Kesi mukomoke a cuma eci, omwo simbu ilinakwija omo vatsi voshe vakaziva lijwi lyendi,

²⁹ co vakatuuka mu vimbumbo vyavo, vaje voshe valingile mwamuvwa vakasangukila ku mwonyo, co vaje valingile mwamuvi vakasangukila ku cihiso.

Vukaleo vwa ali Yesu

³⁰ “Kunjasa kulinga cuma cimo na moko yange vavenya, Njikasompa lika muje mwanjileka Njambi, ngecivene, kusompa kwange kunapu kwa vushunga, omwo kunjesi kulinga vije vinjishaka embwe, oloni kuvanga vije lika vyashaka uje wanjitumine.

³¹ “Nga njilyambulwila yange vavenya vukaleo vwange, vukaleo vwange kesi vwa vushunga.

³² Oloni kwali weka akwambulula vukaleo vwange, co njazivuka ngwange vukaleo vuje alinakwambulula ali yange vunapu vwa vushunga.

³³ Mwatumine miluwa veni kuli Yowano, co wavalekele vushunga.

³⁴ Kesi ngwe vukaleo vunjitambula vwakutunda ku munu embwe, oloni njilinakwendeka lika evi ngeci mwovoke.

³⁵ Yowano wapwile ngwe ndeya, washukumine nakutwa ceke, co mwavwaelelele kasimbu lika mu ceke cendi.

³⁶ Oloni yange njili na vukaleo vwakutuvakana vukaleo vuje vwambulwile Yowano, omwo evi vinjilinga, vinapu vipangi vije vyanjanene Tate ngeci njivilinge, evi vilinakwendeka ali yange mukumwesa ngeci Tate wanjitumine.

³⁷ Co Tate, uje wanjitumine, alinakwendeka vukaleo ali yange. Kanda muzive lijwi lyendi, nameme kumona cihanga cendi,

³⁸ co kumwesi kunyunga majwi endi mu vimbunge vyeni, omwo kumwakulaelele kuli uje yatumine.

³⁹ Mulinakulilongesa Visoneka, omwo muyongola ngweni mu vikevyo muwanamo mwonyo wa myaka yoshe. Co visoneka evi vyambulula vukaleo vwange!

⁴⁰ Oloni kumushaka kwija kuli yange ngeci mukale na mwonyo.

⁴¹ “Kunjishaka ngeci vanu vanjishangale embwe.

⁴² Oloni njizivuka cifwa ceni, njizivuka ngeci kumwesi na cizemo ca Njambi mu vimbunge vyeni.

⁴³ Njinaija mu lizina lya Tate, oloni yeni kumwanjitambwile, nga weka aija mu lizina lyendi, mukamutambula.

⁴⁴ Mwashaka ngeci vamishangazale, oloni kumushaka Njambi ngeci amishangazale, cooni mwasa kunjikulaela vatijo?

⁴⁵ Kesi muyongole ngweni njikamivangeya kuli Tate embwe. Mosesa vene uje imunakulaela ikeye akamivangeya.

⁴⁶ Nga mwa vushunga mwakulaelele kuli Mosesa, nga munakulaela lalo kuli yange, omwo wasonekele vyange.

⁴⁷ Oloni omwo kumwakulaelele vije vyasonekele, vatijo mukulaela vije vinjendeka?”