Yowano 4 - Livulu lya Shukulu Kalunga

Yesu na munakazi wa ku Samaliya

¹ VaFaliseo vazivile ngeci Yesu alinakuwana nakumbwitika vandongisi vavangi kutuvakana Yowano.

² (Kesi Yesu wavambwitikile embwe, oloni vandongisi vendi vacilingile.)

³ Ngecivene, omo Yesu wazivile vije vivendekele, watundile ku Yundeya welukile ku Ngalileya,

⁴ mu vungenzi vwendi vwakuya kuje wetile mu Samaliya.

⁵ Ngecivene, mu Samaliya wetele ku nganda ivatumbwile Sikale, muyehi na lihya lije lyanene Yakomba kuli munendi Yosefa.

⁶ Lisima lya Yakomba lyakele kuje, co Yesu watumbamene kuyehi na lisima omwo wajukile manene kwenda. Simbu yapwile akati ka mutwe.

⁷ Munakazi umo kaSamaliya wezile nakutekula mema, co Yesu wendekele kuli ikeye ngwendi, “Njaneko mema njinwe.”

⁸ (Omwo vandongisi vendi vaile mu nganda nakulanda vyakulya.)

⁹ Munakazi wamukumbulwile ngwendi, “Yove u kaYunda, co yange nji kaSamaliya, ngecivene, vatijo unjilomba mema ngeci unwe?” (VaYunda kuvesi kupangesa vinganja na malonga vije vivakapangesa vaka-Samaliya.)

¹⁰ Yesu wamukumbulwile ngwendi, “Nga wazivukile vwana vwa Njambi, co nou akulomba mema akunwa, nga unamulombo, co nga nakwana mema a mwonyo.”

¹¹ Co munakazi wendekele ngwendi, “Shukulu, kuwesi na cuma cakutekwisa mema, lisima lyalova. Kulijo ukawana mema a mwonyo?

¹² Kuma yove unatuvakana kukulwila yetu Yakomba uje watwanene lisima eli ndi? Ikeye wanwilemo na vana vendi, na vimuna vendi voshe.”

¹³ Yesu wamukumbulwile, ngwendi, “Woshe anwa ku mema awa akaziva lalo lihwila,

¹⁴ oloni woshe anwa ku mema anjikamwana kakazivi lalo lihwila embwe. Mema aje anjikamwana akapwa lisima lya kavwelu-vwelu muli ikeye lije likamwana mema a mwonyo nakumwana mwonyo wa myaka yoshe.”

¹⁵ Munakazi wendekele kuli ikeye ngwendi, “Mwene, njaneko owo mema! Ngeci kesi njikazive lalo lihwila, nambe kunjikaija-ija lalo kuno nakutekula mema.”

¹⁶ Yesu wendekele kuli ikeye ngwendi, “Ya ukasane munalume wove, co wiluke kuno.”

¹⁷ Munakazi wamukumbulwile ngwendi, “Kunjesi na munalume.” Yesu wamukumbulwile ngwendi, “Unendeka mwa vushunga omo unendeka ngwove kuwesi na munalume.

¹⁸ Omwo unashomboka ku vanalume vatanu, co ou munalume uli nendi ololo kesi munalume wove. Unanjileke mwa vushunga.”

¹⁹ Munakazi wendekele kuli ikeye ngwendi. “Mwene, njinazivuka ngwange yove u muka-kwimanena.

²⁰ Vakukulwila vange vaSamaliya valemesele Njambi a munkinda ou, oloni yeni vaYunda mukendeka ngweni tunapande kulemesela Njambi ku Yelusalema lika.”

²¹ Yesu wendekele kuli ikeye ngwendi, “Ove munakazi njikulaele, simbu ilinakwija omo vanu kuvakalemesela Tate a munkinda ou nambe mu Yelusalema.

²² Yeni vaSamaliya kumuzivuka uje imulemesa, oloni yetu vaYunda tuzivuka uje itulemesa, omwo kwamena kwatunda kuli vaYunda.

²³ Oloni simbu ilinakwija, co inete laja, omo a nzili ya Munzinzime wa Njambi vanu vakalemesa Tate ngwe muje mwafwa, vakamulemesa mu vushunga ngwe muje mwashaka.

²⁴ Njambi ikeye Munzinzime, co vaje vamulemesa, vanapande kumulemesa mu munzinzime na mu vushunga.”

²⁵ Munakazi wendekele kuli ikeye ngwendi, “Njazivuka ngwange Wakuvwavesa alinakwija, co omo naija, akatuleka vyuma vyoshe.”

²⁶ Yesu wamukumbulwile ngwendi, “Yange vene ikeye, uje alinakwendeka nove.”

²⁷ Aje vene vandongisi va Yesu vezile, co valikomokelele manene akuwana Yesu alinakwendeka na munakazi. Oloni naumo wai wehwile uje munakazi ngwendi, “Vika ushaka?” Nambe kwihula Yesu ngwavo, “Omwo vika ulinakwendeka nendi?”

²⁸ Asinoni uje munakazi wasezele njava yendi yakutekwila mema, welukile ku nganda, wakalekele vanu kuje ngwendi,

²⁹ “Ijeni mukamone munalume uje nanjileka vyuma vyoshe vinjalingile. Kesi ikeye Wakuvwavesa ndi?”

³⁰ Ngecivene, vatundile mu nganda vaile kuli Yesu.

³¹ A simbu ije vene vandongisi valombele Yesu ngwavo, “Mulongisi, lya vyakulya!”

³² Oloni ikeye wavakumbulwile ngwendi, “Njili na vyakulya vije kumuzivuka.”

³³ Ngecivene, vandongisi vashangumukile kulihozola akati kavo ngwavo, “Kuli munu umo namwana vyakulya ndi?”

³⁴ Yesu wendekele kuli vakevo ngwendi, “Vyakulya vyange vinapu kwononoka cizango ca uje wanjitumine nakumanesa vipangi vyanjanene ngeci njivilinge.

³⁵ Kuma kumwesi kwendeka ngweni, ‘Kwasala vingonde viwana, co simbu ya kuteja yeta.’ Oloni njimileka ngwange, kengeni mu mahya, vimbuto vinahi laja ngeci vaviteje!

³⁶ Uje ateja valinakumufweta, co alinakukungulula vimbuto vya mwonyo wa myaka yoshe, ngecivene, muka-kukuna na muka-kuteja voshe vakavwaelela amolika.

³⁷ N̄anda eyi yapwa ya vushunga ngwayo, ‘Umo akuna, mukwavo ateja.’

³⁸ Njinamitumu kuteja vimbuto mu lihya muje kumwapangele, veka vapangelemo, co yeni munawanenamo vimo a vipangi vyavo.”

³⁹ VaSamaliya vavangi va mu nganda ije vakulaelele kuli Yesu omwo uje munakazi wendekele ngwendi, “Nanjileka vyuma vyoshe vinjalingile.”

⁴⁰ Ngecivene, omo vaSamaliya vezile kuli ikeye, vamulombele ngeci akale navo, co Yesu wakele kuje matangwa avali.

⁴¹ Co vavangi vakulaelele kuli ikeye omwo majwi endi,

⁴² co valekele uje munakazi ngwavo, “Ololo tunakulaela, kesi omwo lijwi lyove, oloni omwo twalizivila yetu vavenya, co twazivuka ngwetu mwa vushunga ikeye Muyoyesi wa vaka-kaye.”

Yesu akangwisa muna mukulunu wa vaLoma

⁴³ Omo Yesu wakele kuje matangwa avali, co watundileko waile ku Ngalileya.

⁴⁴ Omwo ikeye vavenya wendekele ngwendi, “Muka-kwimanena naumo wai ivasingimika mu lifuti lyendi.”

⁴⁵ Ngecivene, omo wetele mu Ngalileya, vanu kuje vamutambwile mwamuvwa, omwo vaile ku Ciwano ca Pasovala mu Yelusalema, co vakamwene vyuma vyoshe vije vyalingile ku ciwano.

⁴⁶ Asinoni Yesu welukile ku Kana mu Ngalileya, kuje watengulwile mema kupwa vinyu. Co kuje kwakele mukulunu wa vaka-kushwana wakele na munendi wa munalume wakele nakuvinja mu Kapenauma.

⁴⁷ Omo wazivile ngeci Yesu natundu ku Yundeya naija ku Ngalileya, waile kuli ikeye nakumulomba ngeci aije ku Kapenauma nakukangwisa munendi, uje washakele kutsa.

⁴⁸ Yesu wendekele kuli ikeye ngwendi, “Naumo wai akati keni akakulaela kuvanga amone vizivukiso na vikomokeso.”

⁴⁹ Uje mukulunu wendekele kuli ikeye ngwendi, “Mwene tuye mumo simbu kanda munange atse.”

⁵⁰ Yesu wendekele kuli ikeye ngwendi, “Ya, munove enduka!” Uje munalume wakulaelele majwi a Yesu, co waile.

⁵¹ Omo wakele nakuya kwimbo waliwanene na vangamba vendi akati vamulekele ngwavo, “Munove nenduka!”

⁵² Ngecivene, wavehwile simbu muka munendi wendukile, co vamukumbulwile ngwavo, “Izau akati ka mutwe, lisika-sika lyamutundile.”

⁵³ Asinoni ishe wanukile ngeci ikeyo simbu ije Yesu wamulekele ngwendi, “Munove enduka.” Ngecivene, ikeye amo na naanga yendi voshe vakulaelele.

⁵⁴ Eci cikeco cizivukiso camucivali cije calingile Yesu omo watundile ku Yundeya kwija ku Ngalileya.