Yowano 3 - Livulu lya Shukulu Kalunga

Yesu na Nikondemo

¹ Kwakele ntwama umo wa vaYunda lizina lyendi Nikondemo, wapwile wa mu munga ya vaFaliseo.

² Munalume ou waile kuli Yesu vutsiki, co wendekele kuli ikeye ngwendi, “Mulongisi, twazivuka ngwetu yove u mulongisi wakutunda kuli Njambi. Omwo naumo wai asa kulinga vizivukiso viwulinakulinga kuvanga Njambi akale amo nendi.”

³ Yesu wamukumbulwile ngwendi, “Mwa vushunga njikuleka ngwange, naumo wai asa kumona Vumwene vwa Njambi kuvanga asemuke luvali.”

⁴ Nikondemo wendekele kuli ikeye ngwendi, “Vatijo munu asa kusemuka luvali nga nakuluvala laja? Asa kukovela lalo mwimo lya vaina ngeci asemuke lalo simbu yamucivali ndi?”

⁵ Yesu wamumbulwile ngwendi, “Mwa vushunga njikuleka ngwange, naumo wai asa kukovela mu Vumwene vwa Njambi kuvanga asemuke ku mema na ku Munzinzime Wakujela.

⁶ Munu akatambula cifwa cendi ca vunu ku visemi vendi, oloni Munzinzime Wakujela ikeye amulingisa ngeci asemuke ku Munzinzime.

⁷ Kesi ukomoke omo njikuleka ngwange unapande kusemuka luvali.

⁸ Lihunzi lihuwa kwoshe kulishaka, wasa kuziva cililimo calyo, oloni kuwasa kuzivuka kuje kulitunda nambe kuje kuliya. Ngecivene, mukemwo mucinapu navoshe vaje vanasemuka ku Munzinzime Wakujela.”

⁹ Nikondemo wehwile ngwendi, “Eci cilingiwa vatijo?”

¹⁰ Yesu wamukumbulwile ngwendi, “Yove u mulongisi wakama mu Isalele, kuma kuuzivuka eci ndi?

¹¹ Mwa vushunga njikuleka ngwange, twendeka vije vituzivuka, co twambulula vukaleo vwa vije vitunamono, oloni yeni ku mutambula muzimbu wetu.

¹² Kumunjikulaela omo njimileka vyuma vya ano a kaye, co vatijo munjikulaela omo njimileka vyuma vya mwilu?

¹³ Naumo wai nai mwilu kuvanga Muna Munu lika uje wezile kutunda mwilu.”

¹⁴ Co ngwe Mosesa washukikile linyoka wa vunengu a manda mu mambo, ngecivene, mucifwa cimo vakashukika Muna Munu,

¹⁵ ngeci woshe akulaela kuli ikeye akale na mwonyo wa myaka yoshe.

¹⁶ Omwo Njambi wazemene vaka-kaye manene ngeci waanene Munendi umolika, ngeci woshe akulaela kuli ikeye kesi anyonge, oloni akale na mwonyo wa myaka yoshe.

¹⁷ Omwo Njambi katumine Munendi ano a kaye nakuhisa vaka-kaye embwe, oloni apwe Muyoyesi wavo.

¹⁸ Uje akulaela kuli Mwana kuvakamuhisa embwe, oloni uje kakulaelele vanamuhisa laja, omwo kakulaelele kuli Muna Njambi umolika.

¹⁹ Co omu mukemwo mucikapanga cihiso, ceke cinaija ano a kaye, oloni vanu vazema lisusulungu kutuvakana ceke, omwo vilinga vyavo vyapwa vyavivi.

²⁰ Omwo munu woshe alinga vyuma vyavivi azinda ceke kasa kwija ku ceke, omwo kashaka vilinga vyendi vyavivi ngeci visholoke.

²¹ Oloni woshe uje muka-kulinga vushunga aija ku ceke ngeci ceke cisholole vipangi vyendi vyanalingi mukwononoka kuli Njambi.

Yesu na Yowano

²² Munima yevi, Yesu na vandongisi vendi vaile ku lifuti lya Yundeya, kuje kwakakele navo ka simbu nakumbwitika vanu.

²³ Yowano lalo wakele nakumbwitika mu Aenone kuyehi na Salime, omwo kwakele mema amangi. Co vanu vakele nakuya kuli ikeye, co wavambwitikile.

²⁴ (Omwo a simbu eyi Yowano te kanda vamwake mu kamenga.)

²⁵ Vamo vandongisi va Yowano vakele nakulinga vimata na kaYunda umo a futisi yakujwela.

²⁶ Ngecivene, vaile kuli Yowano, co vamulekele ngwavo, “Mulongisi, wanuka munalume uje wakele nove mu ngangela ya Yondau uje iwalingilile vukaleo? Kenga, alinakumbwitika, co vanu voshe valinakuya kuli ikeye!”

²⁷ Yowano wavakumbulwile ngwendi, “Naumo wai atambula cuma kuvanga vanamwanaco kuli Njambi.

²⁸ Yeni mu vakaleo vange ngeci muje njendekele ngwange, ‘Kesi yange Wakuvwavesa, oloni vananjitumu kulutwe lwendi.’

²⁹ Uje ali na shombolwa ikeye vavenya vulo, oloni musamba wa vavenya vulo, uje nemana nakumutolilila, avwaelela omo aziva lijwi lya vavenya vulo. Ngecivene, mukemwo mukunapu kuvwaelela kwange.

³⁰ Ikeye napande kupwa wakama, oloni yange njipande kupwa wamundondo.”

Uje atunda mwilu

³¹ Uje atunda mwilu nahyana voshe. Uje atunda ano asi nakundama ku vya asi nakusimutwiya vin̄anda vya ano asi, oloni uje atunda mwilu ali akamwa ya vyoshe.

³² Alinakusimutwiya vije vyanamono, co na vije vyanazivi, oloni naumo wai atambula muzimbu wendi.

³³ Oloni woshe atambula muzimbu wendi amwesa ngeci Njambi wapwa muka-vushunga.

³⁴ Omwo woshe uje yanatumu Njambi endeka majwi a Njambi, omwo Njambi namwana Munzinzime Wakujela muvungi.

³⁵ Ishe wazema Mwana, co naaka vyuma vyoshe mu mavoko endi.

³⁶ Woshe akulaela kuli Mwana ali na mwonyo wa myaka yoshe, woshe avyana Mwana kakala na mwonyo, oloni vukalu vukala ali ikeye.