Yowano 21 - Livulu lya Shukulu Kalunga

Yesu alisholola kuli vandongisi vatanu na vavali

¹ Munima yevi, Yesu walisholwele lalo kuli vandongisi vendi ku Lishali lya Timbelyase. Co omu mukemwo muvyalingiwile.

² Simoni Petulu na Tomasi, uje vatumbwile “Muna mpasa,” na Natanele (uje watundile ku Kana mu Ngalileya), na vana va Zembendeo na vandongisi veka vavali va Yesu vakele amo.

³ Simoni Petulu wendekele kuli vakwavo ngwendi, “Njiya nakuta visi.” Vakwavo vamulekele ngwavo, “Netu tuya nove.” Ngecivene, vaile mu vwato, oloni vutsiki vwoshe vuje naumo isi ivakwatele wai.

⁴ A mungulungengu, Yesu wemanene kumukulo wa lishali, oloni vandongisi kuvazivukile ngeci uje ikeye Yesu.

⁵ Asinoni wendekele kuli vakevo ngwendi, “Eni vakwenje, munakwatako visi ndi?” Vakumbulwile ngwavo, “Embwe, naumo isi tunakwata wai.”

⁶ Wendekele kuli vakevo ngwendi, “Teni linimbwa lyeni ku mutambela wacilyo ca vwato, co mukwata visi.” Ngecivene, vatele linimbwa, co kuvasele kukoka lalo linimbwa, omwo atsile visi vavangi.

⁷ Ndongisi uje yazemene Yesu wendekele kuli Petulu ngwendi, “Ou ikeye Mwene!” Omo Simoni wazavile ngeci ikeye Mwene, wazalele cikoveyo cendi(omwo washulwile vuzalo vwendi), co watumbukilile mu lishali.

⁸ Oloni vandongisi vakwavo vezile mu cikuma mu vwato, vakele nakukoka linimbwa lyakushula lya visi. Omwo kuvakele kulyala na nunda, oloni yapwile nunda ya mamita 100.

⁹ Omo vetele ku nunda, vamwene manungu alinakwenyuka, co akele visi na likende.

¹⁰ Asinoni Yesu wendekele kuli vakevo ngwendi, “Neneni visi vamo vamunakwata.”

¹¹ Ngecivene, Simoni Petulu wakovelele mu vwato, co wakokelele linimbwa ku nunda lyakushula na visi vakama, vapwile 153, co nameme vapwile visi vavangi, anga linimbwa kulyatavukile.

¹² Yesu wendekele kuli vakevo ngwendi, “Ijeni mulyaule.” Naumo wai wa vaje vandongisi wasele kumwihula ngwendi, “Yove iyajo?” Omwo vazivukile ngwavo ikeye Mwene.

¹³ Ngecivene, Yesu wezile, wanonele likende wavanene, co walingile ngeci lalo na ku visi.

¹⁴ Eyi yapwile simbu yamucitatu yalisholwele Yesu kuli vandongisi vendi omo nakusanguka ku vatsi.

Yesu na Petulu

¹⁵ Omo vanalyaula laja, Yesu wendekele kuli Simoni Petulu ngwendi, “Simoni muna Yowano, wanjizema kutuvakana ava ndi?” Petulu wakumbulwile ngwendi, “Eyo Mwene, uzivuka ngeci njakuzema.” Yesu wendekele kuli ikeye ngwendi, “Nyunga vana va vimanga vange.”

¹⁶ Yesu wendekele simbu yamucivali ngwendi, “Simoni muna Yowano, wanjizema ndi?” Petulu wakumbulwile ngwendi, “Eyo Mwene, uzivuka ngeci njakuzema.” Yesu wendekele kuli ikeye ngwendi, “Nyunga vimanga vange.”

¹⁷ Yesu wendekele simbu yamucitatu ngwendi, “Simoni muna Yowano, wanjizema ndi?” Petulu wakele na vusiwa omwo Yesu wamwihwile simbu yamucitatu ngwendi, “Wanjizema ndi?” Co Petulu wendekele kuli ikeye ngwendi, “Mwene yove uzivuka vyuma vyoshe, uzivuka ngeci njakuzema!” Yesu wendekele kuli ikeye ngwendi, “Nyunga vimanga vange.

¹⁸ Mwa vushunga njikuleka ngwange, omo wapwile mukwenje, walivwaesele nakuya kwoshe kuwashakele, oloni omo unakuluvala, ukolola mavoko ove, co weka akakukuta nakukutwala kuje kuwashakele kuya.”

¹⁹ (Akwendeka evi, Yesu watumbwile kutsa kuje kwakatsa Petulu nakunena vumpau kuli Njambi.) Co Yesu wendekele kuli ikeye ngwendi, “Njikave!”

Yesu na uje ndongisi mukwavo

²⁰ Petulu watengulukile wakengele munima yendi wamwene ndongisi mukwavo, uje yazemene Yesu, uje wajendamenene ali Yesu a simbu yakulya, co wamwihwile ngwendi, “Mwene, iyajo akakwenda vungungu?”

²¹ Omo Petulu wamumwene, wehwile Yesu ngwendi, “Mwene, vatico ali ou munu?”

²² Yesu wamukumbulwile ngwendi, “Nga njishaka ngwange ayoye noo njikaija, eci cinapu vatijo kuli yove? Yove njikave lika!”

²³ Ngecivene, muzimbu washandokelele akati ka vaka-kukava Yesu ngeci ndongisi ou kakatsi embwe. Oloni Yesu kendekele ngwendi kakatsi, oloni wendekele ngwendi, “Nga njishaka ngwange ayoye noo njikaija, eci cinapu vatijo kuli yove?”

²⁴ Ikeye vene ndongisi uje wambulwile vyuma evi, uje lalo wasonekele evi, co tunazivuka ngwetu vije vyendekele vinapu vya vushunga.

Mamaneselelo

²⁵ Oloni kuvili vyuma vyeka vyavingi vije vyalingile Yesu. Nga vavisonekele vyoshe cimo na cimo, njiyongola ngwange nga kaye koshe kuvasele kuwana mwela wakutulikila mavulu oshe aje vanasoneka.