Yowano 20 - Livulu lya Shukulu Kalunga

Mbumbo yamupulungwa

¹ A mungulungengu a litangwa lya Calumingo, Maliya Mangandalena waile ku mbumbo, co wamwene limanya vanalitundisa ku mbumbo.

² Ngecivene, washatukilile kuli Simoni Petulu na ndongisi mukwavo uje yazemene Yesu, co wavalekele ngwendi, “Mwene vanamutundisa mu mbumbo, co kutuzivuka oku vanamwaka!”

³ Asinoni Petulu na uje ndongisi mukwavo vaile ku mbumbo.

⁴ Voshe vavali vashatukile, oloni uje ndongisi mukwavo washatukile manene kutuvakana Petulu, co wetele ku mbumbo akulivanga.

⁵ Co wakulamene nakushumbila mu mbumbo, co wamwene vinanga vya linyu, oloni kakovelelemo.

⁶ Asinoni Simoni Petulu wamukavele munima, wetele, co wakovelele mu mbumbo. Wamwene vinanga vya linyu vili asi avyolika

⁷ co na nanga ije yakele ku mutwe wa Yesu. Kuyakele amo na vinanga vya linyu oloni yakuzenga ayolika.

⁸ Asinoni ndongisi mukwavo, uje walivangele kweta ku mbumbo, nendi lalo wakovelelemo, co wamwene, co wakulaelele.

⁹ (Omwo nameme ngoco kuvazivisisile visoneka vije vyendekele ngwavyo napande kusanguka ku vatsi.)

¹⁰ Asinoni vaje vandongisi velukile kwimbo.

Yesu alisholola kuli Maliya Mangandalena

¹¹ Oloni Maliya wemanene ku mbumbo nakulila. Co omo wakele nakulila, wakulamene nakukenga mu mbumbo

¹² co wamwene tungelo vavali vanazala vuzalo vwakutoka, vanatumbama kuje kwakele muvila wa Yesu, umo ku mitwe mukwavo ku mendi.

¹³ Vamwihwile ngwavo, “Munakazi, vika ulinakulilila?” Wavakumbulwile ngwendi, “Vanambata Mwene yange, co kunjizivuka oku vanamwaka!”

¹⁴ Asinoni omo wendekele evi watengulukile nakukenga kunima wamwene Yesu nemana, oloni kazivukile ngeci ikeye Yesu.

¹⁵ Yesu wamwihwile ngwendi, “Ove munakazi, vika ulinakulilila? Iyajo ushakezeka?” Maliya wayongwele ngwendi amo ndimi, ngecivene, wendekele kuli ikeye ngwendi, “Mwene, nga yove unamwambata njileke oku unamwaka, co njiyeko njikamwambate.”

¹⁶ Yesu wendekele kuli ikeye ngwendi, “Maliya!” Maliya watengulukile, co wendekele nendi mu ciHevelu ngwendi, “Lamboni!” (Kulumbununa ngwavo, “Mulongisi.”)

¹⁷ Yesu wamulekele ngwendi, “Kesi unjikwate, omwo kanda njilonde kwilu kuli Tate. Oloni ya kuli vasamba vange ukavaleke ngwove njilinakwiluka kuli Tate ikeye Ishavo, kuli Njambi yange ikeye Njambi yavo.”

¹⁸ Ngecivene, Maliya Mangandalena waile nakuleka vandongisi ngwendi Njinamono Mwene, co wavalekele vije vyamulekele Yesu.

Yesu alisholola kuli vandongisi vendi

¹⁹ Ku cingwezi cije vene ca litangwa Lyakulivanga ku Calumingo, vandongisi valikungulwile amolika mu njuvo muje mapito apwile akupata, omwo vakele na lyova lya vaka-kushwana va vaYunda. Asinoni Yesu wezile, co wemanene akati kavo wendekele kuli vakevo ngwendi, “Kwoloka kukale neni.”

²⁰ Omo wamanesele kwendeka evi, wavamwesele mu mavoko endi na ku vimati vyendi. Asinoni vandongisi vavwaelelele omo vamwene Mwene.

²¹ Yesu wendekele lalo kuli vakevo ngwendi, “Kwoloka kukale neni. Ngwe omo Tate wanjitumine, ngecivene, nange lalo njimituma.”

²² Co omo wamanesele kwendeka evi, asinoni wahwimininine ali vakevo wendekele ngwendi, “Tambuleni Munzinzime Wakujela.

²³ Nga mukasambesa vuvi vwa vanu, vakavasambesavwo, nga kumukavasambesa, kuvakavasambesavwo.”

Yesu na Tomasi

²⁴ Umo wa vaje vandongisi likumi na vavali, Tomasi (uje vatumbwile Muna mpasa), kakeleko omo Yesu wezile.

²⁵ Ngecivene, vandongisi vakwavo vamulekele ngwavo, “Tunamono Mwene!” Oloni Tomasi wendekele kuli vakevo ngwendi, “Kunjikulaela kuvanga njinamono viveve vya vimbambo mu mavoko endi, co nakukovelesa mulavo wange mu vije viveve nakukwata ku vimati vyendi.”

²⁶ Omo kwetile matangwa atanu na atatu vandongisi vakele lalo mu njuvo, co Tomasi wakele amo navo. Vapatele mapito, oloni Yesu wezile wemanene akati kavo wendekele ngwendi, “Kwoloka kukale neni.”

²⁷ Asinoni wendekele kuli Tomasi ngwendi, “Aka mulavo wove omu, co kenga ku mavoko ange, co olola livoko lyove ngeci ukwate ku vimati vyange. Kesi ulinge vimata, oloni kulaela lika!”

²⁸ Tomasi wamukumbulwile ngwendi, “Mwene yange na Njambi yange!”

²⁹ Yesu wendekele kuli ikeye ngwendi, “Unakulaela omwo unanjimono ndi? Vanavezika vaje vanakulaela nambe kuvanjimwene!”

Vutumbe vwa livulu eli

³⁰ Yesu walingile vizivukiso vyavingi vyeka na vyeka ku mesho a vandongisi vendi vije kuvasonekele mu livulu eli.

³¹ Oloni evi vanavisoneka ngeci mukulaele ngweni Yesu ikeye Wakuvwavesa, Muna Njambi, co akukulaela kuli ikeye mukale na mwonyo.