Yowano 17 - Livulu lya Shukulu Kalunga

Yesu alombelela vandongisi vendi

¹ Omo Yesu wamanesele kwendeka vyuma evi, wandwile mesho endi kwilu wendekele ngwendi, “Tate, simbu inete. Ana vumpau kuli Munove, ngeci Munove aane vumpau kuli yove.

² Omwo wamwanene moko yakushwana vanu voshe, ngeci aane mwonyo wa myaka yoshe kuli vaje voshe vawamwanene.

³ Co mwonyo wa myaka yoshe ukewo ou, ngeci vakuzivuke yove Njambi umolika wa vushunga, co nakuzivuka Yesu Kilistu, uje iwatumine.

⁴ Njinasholola vumpau vwove ano asi, co njinamanesa vipangi vije viwanjanene ngeci njivilinge.

⁵ Ove Tate! Njane vumpau ku mesho ove ololo, vumpau vuje njakele navwo amo nove simbu kanda utange kaye.

⁶ “Njinasholola lizina lyove kuli vanu vaje vawanjanene kutunda akati ka vaka-kaye. Vapwile vove, co wanjanenevo. Vanononoka lijwi lyove,

⁷ co ololo vanazivuka ngeci vyuma vyoshe viwanjanene vyatunda kuli yove.

⁸ Omwo njavanene muzimbu uje uwanjanene, co vanautambula, co vanazivuka ngeci mwa vushunga yange njatundile kuli yove, co vanakulaela ngeci yove wanjitumine.

⁹ “Njilinakuvalombelela. Kunjilombelela vaka-kaye oloni njilombelela vaje vawanjanene, omwo vapwa vove.

¹⁰ Vyoshe njilinavyo vyapwa vyove, co vyoshe ulinavyo vyapwa vyange, co vumpau vwange vulinakusholoka muli vakevo.

¹¹ Co ololo njilinakwija kuli yove, kunjesi ano a kaye lalo, oloni vakevo vali ano a kaye. Ove Tate wakujela! Vanyunge mu kwoloka na nzili ya lizina lyove, lizina lije liwanjanene, ngeci vapwe umo ngwe yove nange twapwa umo.

¹² Simbu njakele navo, njavanyungile mu kwoloka na nzili ya lizina lyove, lizina lije liwanjanene. Njavanyungile mu kwoloka, naumo wai wavo wazimbalele, kuvanga lika munalume uje ivatumbwilile kunyonga, ngeci visoneka vipwe vya vushunga.

¹³ Oloni ololo njilinakwija kuli yove, co njilinakwendeka vyuma evi ano a kaye ngeci kuvwaelela kwange kukale mu vimbunge vyavo.

¹⁴ Njavanene muzimbu wove, co vaka-kaye vavazindile, omwo vakevo kesi vaka-kaye, ngwe omo yange kesi nji muka-kaye.

¹⁵ Kunjikulombo ngeci uvatundise ano a kaye embwe, oloni njikulomba ngwange uvanyunge kuli Citozi.

¹⁶ Ngwe omo yange kesi nji muka-kaye, vakevo kesi vaka-kaye.

¹⁷ Vakundike kuli yove vavenya mu vushunga, lijwi lyove lyapwa vushunga.

¹⁸ Njavatumine ano a kaye, ngwe omo yove wanjitumine ano a kaye.

¹⁹ Co omo ali vakevo njilikundika yange vavenya kuli yove, ngeci na vakevo lalo valikundike mu vushunga kuli yove.

²⁰ “Kunjilombelela lika vakevo, oloni naveka lalo vaje vakulaela kuli yange omwo vukaleo vwavo.

²¹ Njivalombelela ngeci voshe vapwe umo. Ove Tate! Vakale muli yetu, ngwe omo yove wakala muli yange nange muli yove. Vapwe umo, ngecivene, vaka-kaye vakakulaele ngwavo kuma yove wanjitumine.

²² Njavanene vumpau ngwevuje vuwanjanene, ngecivene, vapwe umo, ngwe yove nange twapwa umo,

²³ yange muli vakevo nove muli yange, ngeci vapwe vamutunu, ngeci vaka-kaye vazivuke ngwavo kuma yove wanjitumine, co uvazema ngwe omo wanjizema.

²⁴ “Ove Tate! Unavana kuli yange, co njishaka vakale nange kuje kunjili, ngeci vakamone vumpau vwange, vumpau vuje vuwanjanene, omwo wanjizemene simbu kanda vatange kaye.

²⁵ Yove Tate wa vushunga! Vaka-kaye kuvakuzivuka, oloni yange njikuzivuka, co ava vazivuka ngeci yove wanjitumine.

²⁶ Njasholwele lizina lyove kuli vakevo, co anga njikalisholola, ngeci cizemo cije wanjizema naco cikale muli vakevo, co nange njikale muli vakevo.”