Yowano 16 - Livulu lya Shukulu Kalunga

¹ “Njinamileka vyuma evi, ngeci kesi mukecele kukulaela kweni.

² Vakamisheka mu masinangonge, mwa vushunga simbu ikaija omo woshe uje akamitsiya akayongola ngeci akulinga cuma eci alinakupangela Njambi.

³ Co vanu vakalinga vyuma evi kuli yeni omwo kuvazivukile Tate nambe yange.

⁴ Oloni njamileka vyuma evi, ngeci omo simbu yavo iketa yakulinga vyuma evi, mukanuke ngeci njamilekevyo. “Kunjamilekele vyuma evi akulivanga, omwo njakele amo neni.

Vipangi vya Munzinzime Wakujela

⁵ Oloni ololo njilinakuya kuli uje wanjitumine, oloni naumo wai weni anjihula kuje njilinakuya.

⁶ Oloni omwo njinamileka vyuma evi, vimbunge vyeni vili na vusiwa.

⁷ Oloni mwa vushunga njimileka ngwange, mwamuvwa kuli yeni ngeci yange njiye, omwo nga kunjii, Mukwasi kakaija kuli yeni. Oloni nga njiya, co njikamutuma kuli yeni.

⁸ Co omo akaija, akavayesa vaka-kaye a vuvi, na a vushunga, na a cihiso ca Njambi.

⁹ Akavavayesa a vuvi omwo kuvakulaelele kuli yange,

¹⁰ akavavayesa a vushunga omwo njilinakuya kuli Tate, co yeni kumukanjimono lalo,

¹¹ nakuvavayesa a cihiso omwo muka-kushwana wa ano a kaye vanamuhisa laja.

¹² “Njili na vyavingi vyakumileka, oloni vimilemena manene.

¹³ Omo Munzinzime akaija, uje akasholola vushunga vwa Njambi, akamitwamenena mu vushunga vwoshe. Omwo kakendeka mu nzili yendi embwe, oloni akendeka vije aziva nakumileka vyuma vikaija kulutwe.

¹⁴ Akanjana vumpau, omwo akaziva vije vinjikendeka nakuvyambulula kuli yeni.

¹⁵ Vyoshe vyali navyo Tate vinapu vyange, ngecivene, mukemwo njinendeka ngwange Munzinzime akambata vije vinjimuleka nakuvyambulula kuli yeni.

Vusiwa nakuvwaelela

¹⁶ “Mu kasimbu kakandondo lika kumukanjimono lalo, co mu kasimbu kakandondo lalo mukanjimona.”

¹⁷ Vamo vandongisi vendi valihozwele akati kavo ngwavo, “Eci cilumbunuka vika? Atuleka ngwendi mu kasimbu kakandondo lika kutukamumono lalo, co lalo mu kasimbu kakandondo tukamumona, co lalo endeka ngwendi, ‘Omwo njiya kuli Tate.’

¹⁸ Vendekele ngwavo aka ‘Kasimbu kakandondo lika’ kanalumbunuka vika? Kutuzivuka evi alinakwendeka!”

¹⁹ Yesu wazivukile ngeci vashakele kumwihula, ngecivene, wendekele kuli vakevo ngwendi, “Njinendekele ngwange, ‘Mu kasimbu kakandondo lika kumukanjimono lalo, co mu kasimbu kakandondo lalo mukanjimona.’ Evi vikevyo mulinakulihozola akati keni ndi?

²⁰ Mwa vushunga njimileka ngwange, mukalila nakusikoka manene, oloni vaka-kaye vakajolela, mukakala na vusiwa, oloni vusiwa vweni vukatenguluka kupwa kujolela.

²¹ Omo munakazi ashaka kukita mwana, ali na vusiwa, omwo simbu yendi yakuyanda inete, oloni omo mwana asemuka, evala tuyando twendi, omwo navwaelela ngeci mbututu nasemuka ano a kaye.

²² Ngecivene, omu mukemwo mucinapu neni, ololo muli na vusiwa, oloni njikamimona lalo, co vimbunge vyeni vikashula nakujolela, kujolela kuje naumo wai akacitundisa muli yeni.

²³ “Omo litangwa lije likaija, kumukanjilombo cuma cimo. Mwa vushunga njimileka ngwange, nga mukalomba cuma coshe kuli Tate mu lizina lyange akamyanaco.

²⁴ Tunde aje nakweta ku lelo kanda mulombe cuma cimo mu lizina lyange, lombeni, co mukatambula, ngeci kuvwaelela kweni kukapwemo.

Kuhyana kaye

²⁵ “Njinendeka neni na visimo mukumileka vyuma evi. Oloni simbu ikaija omo kunjikendeka lalo neni na visimo, oloni njikendeka vya Tate kuli yeni na majwi aje amuzivisisa.

²⁶ Omo litangwa lije likaija, mukamulomba mu lizina lyange, oloni kunjendeka ngwange njikamilombelela kuli Tate embwe,

²⁷ omwo Tate ikeye vavenya wamizema. Wamizema omwo mwazema yange nakukulaela ngeci yange njatundile kuli Njambi.

²⁸ Njatundile kuli Tate, co njezile ano a kaye, co ololo njilinakutunda ano a kaye njilinakuya kuli Tate.”

²⁹ Asinoni vandongisi vendi vendekele kuli ikeye ngwavo, “Ololo unendeka vije vituzivisisa, kuwendekele lalo na visimo.

³⁰ Twazivuka ngeci yove uzivuka vyuma vyoshe, co naumo wai napande akwihule vihula. Eci citulingisa ngeci tukulaele ngwetu yove watundile kuli Njambi.”

³¹ Yesu wavakumbulwile ngwendi, “Ololo mwakulaela ndi?

³² Simbu ilinakwija, co inete laja, omo yeni voshe mukashandoka, munu na munu akaya kwimbo lyendi, co njikasala ange lika. Oloni kunjikasala ange lika embwe, omwo Tate ali amo nange.

³³ Njamileka vyuma evi ngeci mukale mu kwoloka akukala muli yange. Vaka-kaye vakamiyandesa. Oloni simpeni! Njinafungulula vaka-kaye!”