Yowano 14 - Livulu lya Shukulu Kalunga

Yesu ikeye Ngila yakuya kuli Tate

¹ Yesu wavalekele ngwendi, “Kesi mulishoshomwene mu vimbunge vyweni. Kulaeleni kuli Njambi, co kulaeleni kuli yange lalo.

² Mu njuvo ya Tate mwakala milili yaingi, nga yaimo, nga njinamileka. Co njilinakuya mukumivwaesela kwakukala.

³ Co omo njinayi nakumivwaesela kwakukala, njikeluka lalo nakumizila ngecivene, mukakale kuje kunjikakala yange.

⁴ Co munazivuka ngila iya kuje kunjilinakuya.”

⁵ Tomasi wendekele kuli ikeye ngwendi, “Mwene, kutuzivuka oku ulinakuya, ngecivene, vatijo tuzivuka ngila yakweta kuje?”

⁶ Yesu wamukumbulwile ngwendi, “Yange ngila, na vushunga, na mwonyo, naumo wai aya kuli Tate oloni kuvanga ali yange.

⁷ Nga munanjizivuka, nga munazivuka na Tate lalo, co kushangumuka ololo kutwala kulutwe, munamuzivuka, co munamumono.”

⁸ Filipu wendekele kuli ikeye ngwendi, “Mwene, tumwese Isho, mukemwo mu tushaka yetu voshe.”

⁹ Yesu wakumbulwile ngwendi, “Njinakala neni muvavoshe simbu yakama, oloni kuwanjizivukile, Filipu? Woshe uje nanjimono namono Tate. Omwo vikajo wendeka ngwove, ‘Tumwese Isho’?

¹⁰ Kuma kuukulaela Filipi ngeci yange njili muli Tate, co Tate ali muli yange ndi?” Yesu wendekele kuli vandongisi vendi ngwendi, “Majwi awa njinendeka kuli yeni kuwapwile a mu mbunge yange embwe. Tate wakala muli yange akapanga vipangi vyendi.

¹¹ Njikulaeleni omo njendeka ngwange njili muli Tate, co Tate ali muli yange. Nga kesi ngoco, kulaeleni omwo vyuma vije njilinakulinga.

¹² Mwa vushunga njimileka ngwange, woshe uje akulaela kuli yange akalinga vipangi vije vinjilinga, eyo, akalinga vipangi vyakama kutuvakana evi, omwo njilinakuya kuli Tate.

¹³ Co njikalinga cuma coshe-icoshe cije cimukalomba mu lizina lyange, ngeci vumpau vwa Tate vukasholoke ali Mwana.

¹⁴ Nga mulomba cuma cimo mu lizina lyange, njikacilinga.

Cikulaeso ca Munzinzime Wakujela

¹⁵ “Nga munjizema, mukononoka mashiko ange.

¹⁶ Co njikalomba kuli Tate, co akamyana Mukwasi weka, uje akakala neni ku myaka yoshe.

¹⁷ Ikeye Munzinzime wa vushunga, uje asholola vushunga vwa Njambi. Vaka-kaye kuvasa kumutambula, omwo kuvasa kumumona nambe kumuzivuka. Oloni yeni mumuzivuka, omwo wakala neni, co ali muli yeni.

¹⁸ “Omo njiya kunjikamiseza enilika ngwe visiwa embwe, njikaija kuli yeni.

¹⁹ Oloni mu kasimbu kakandondo lika, co vaka-kaye kuvakanjimono, oloni yeni mukanjimona, omwo njilinakuyoya, neni lalo mukayoya.

²⁰ Omo litangwa lije likaija, mukazivuka ngeci yange njili muli Tate neni muli yange, ngwe omo yange njili muli yeni.

²¹ “Woshe uje atambula mashiko ange nakuwononoka ikeye uje anjizema. Co Tate akazema woshe uje anjizema, nange lalo njikamuzema nakulisholola kuli ikeye.”

²² Yundasa (kesi Yundasa Isikalyote embwe) wehwile ngwendi, “Mwene, omwo vika ukalisholwela kuli yetu, co kuukalisholola kuli vaka-kaye?”

²³ Yesu wamukumbulwile ngwendi, “Woshe anjizema ononoke vilongesa vyange. Co Tate akamuzema, co tukaija nakukala muli ikeye.

²⁴ Woshe uje kanjizeme kononoka vilongesa vyange. Co vilongesa vije vimunazivi kesi vyange oloni vitunda kuli Tate uje wanjitumine.

²⁵ “Njanamileke vyuma evi simbu njicili neni.

²⁶ Oloni Mukwasi, ikeye Munzinzime Wakujela, uje yakatuma Tate mu lizina lyange, akamilongesa vyuma vyoshe nakumyanukisa vyuma vyoshe vije vinjinamileka.

²⁷ “Kwoloka njimisezela, kwoloka kwange njilinakumyana. Kesi ngwe muvakana muje vaka-kaye. Kesi mulishoshomwene mu vimbunge vyeni, nameme kesi muzive lyova.

²⁸ Mwanjizivile munjendekele kuli yeni ngwange, ‘Njilinakumiseza, oloni njikaija kuli yeni.’ Nga mwanjizema, nga mwavwaelela omwo njilinakuya kuli Tate, omwo Tate wapwa wakama kutuvakana yange.

²⁹ Co njamileka evi ololo omo simbu kanda vyuma evi vilingiwe, ngecivene, omo vikalingiwa, mukakulaele.

³⁰ Kunjesi na kwendeka neni vyavingi ololo, omwo muka-kushwana wa ano a kaye alinakwija. Kesi na nzili ali yange,

³¹ oloni njilinakulinga ngwe mwanjishikile, ngecivene, vaka-kaye vazivuke ngeci yange njazema Tate. “Katukeni, tuyeni tutunde ku mutambela uno.