Yowano 11 - Livulu lya Shukulu Kalunga

Kutsa kwa Lazalu

¹ Kwakele munalume umo lizina lyendi Lazalu, wa ku Mbetaniya, wakele nakuvinja. Mbetaniya yapwile nganda muje mwakele Maliya na ndokazi yendi Mata.

² (Ou Maliya ikeye uje wavwavesele mendi a Mwene na mazi akunika lwengo lwaluvwa, co wasikumwineko na vin̄ambu vyendi, ikeye vene wakele na ndolome yendi Lazalu uje wavinjile.)

³ Ngecivene, vandokazi va Lazalu vatumine lijwi kuli Yesu ngwavo, “Mwene, uje musamba wove iwazema alinakuvinja.”

⁴ Oloni omo Yesu wazivile evi, wendekele ngwendi, “Kuvinja oku kukumutwala ku kutsa embwe, eci cinalingiwa lika ngeci cisholole vumpau vwa Njambi, ngecivene, inapu ngila ije Muna Njambi akatambwilamo vumpau.”

⁵ Yesu wazemene Mata na ndokazi yendi Maliya na Lazalu.

⁶ Oloni omo watambwile muzimbu ngwavo Lazalu avinja, weshwalele wakele kuje matangwa avali.

⁷ Asinoni wendekele kuli vandongisi vendi ngwendi, “Twilukeni ku Yundeya.”

⁸ Vandongisi vendi vakumbulwile ngwavo, “Mulongisi, ololo vene vanu kuje vashakele kukwasha mamanya, co uyongola kwilukilako lalo ndi?”

⁹ Yesu wendekele ngwendi, “Litangwa lyakala na maola likumi na avali indi kesi ngoco? Ngecivene, woshe enda mu mutanya katanuka, omwo amona ceke ca ano a kaye.

¹⁰ Oloni nga enda vutsiki, atanuka, omwo kesi na ceke.”

¹¹ Yesu wendekele evi, co lalo wavalekele ngwendi,“Musamba wetu Lazalu nalala tulo, oloni njilinakuyako ngeci njikamwindule.”

¹² Vandongisi vendi vakumbulwile ngwavo, “Mwene nga nalala tulo, enduka.”

¹³ Yesu watumbwile tulo twa kutsa, oloni vakevo vayongwele ngwe natumbula tulo twakulala.

¹⁴ Ngecivene, Yesu wavalekele vushunga ngwendi, “Lazalu natsi,

¹⁵ oloni omwo yeni njinavwaelela omwo kunjakeleko, ngecivene, mukulaele. Oloni tuyeni kuli ikeye.”

¹⁶ Tomasi, (uje vatumbwile Muna Mpasa) wendekele kuli vandongisi vakwavo ngwendi, “Tuyeni amo na Mulongisi ngeci tukatse amo nendi!”

Yesu ikeye Cisangukilo na Mwonyo

¹⁷ Omo Yesu wetele kuje, wawanene Lazalu vanamutsindi laja kuneti matangwa awana.

¹⁸ Mbetaniya kuyatuvakanene makilomita atatu kutunda ku Yelusalema,

¹⁹ co vaYunda vavangi vezile nakumona Mata na Maliya nakuvazembeleka a kutsa kwa ndolome yavo.

²⁰ Omo Mata wazivile ngeci Yesu alinakwija, waile nakumushesha, oloni Maliya wasalele mu njuvo.

²¹ Mata wendekele kuli Yesu ngwendi, “Mwene, nga unakele kuno, ndolome yange nga katsile!

²² Oloni njazivuka ngeci nambe ololo Njambi akakwana coshe ciwulomba kuli ikeye.”

²³ Yesu wamulekele ngwendi, “Ndolome yove akasanguka lalo.”

²⁴ Mata wakumbulwile ngwendi, “Njazivuka ngwange akasanguka a litangwa lyakukotoka.”

²⁵ Yesu wendekele kuli ikeye ngwendi, “Yange cisangukilo na mwonyo. Woshe akulaela kuli yange nambe natsi, oloni akayoya,

²⁶ co woshe alinakuyoya uje akulaela kuli yange kakatsi embwe. Yove unakulaela eci ndi?”

²⁷ Wakumbulwile ngwendi, “Eyo Mwene, njinakulaela ngeci yove u Wakuvwavesa, Muna Njambi, uje akaija ano a kaye.”

Yesu alila

²⁸ Omo Mata wendekele evi, welukile nakusana ndokazi yendi Maliya mu vushweke. Wamulekele ngwendi, “Mulongisi naija, co alinakukusana.”

²⁹ Co omo Maliya wazivile ngeci, wakatukile vwasi watuukile nakumushesha.

³⁰ (Yesu te kanda acete mwimbo, oloni wakele kuje kwaliwanene na Mata.)

³¹ Omo vanu vaje vakele amo na Maliya mu njuvo nakumuzembeleka vamukavele omo vamumwene akatuka vwasi nakutuuka anja. Vayongwele ngwavo amo alinakuya ku mbumbo nakulililako.

³² Asinoni Maliya wetele kuje kwakele Yesu, co aje vene omo wamumwene, wawililile ku mendi endi wendekele ngwendi, “Mwene, nga unakele kuno, ndolome yange nga katsile!”

³³ Omo Yesu wamumwene alinakulila, co wamwene vanu vaje vezile amo nendi vakele lalo nakulila, co wakele manene na vusiwa mu mbunge yendi.

³⁴ Wavehwile ngwendi, “Kuli kumunamutsindi?” Co vakumbulwile ngwavo, “Mwene, ija umone.”

³⁵ Yesu walilile.

³⁶ Vanu vendekele ngwavo, “Kengeni muje mwamuzemene!”

³⁷ Oloni vamo vavo vendekele ngwavo, “Ou kesi ikeye uje watonesele mesho a uje kapuputwa indi? Kuma kapandele kwamena Lazalu ngeci kesi atse ndi?”

Yesu asangula Lazalu

³⁸ Yesu wakele na vusiwa manene mu mbunge yendi, co waile ku mbumbo ije yapwile yakucokola mu limanya, co ku cikolo vaakeleko limanya.

³⁹ Yesu washikile ngwendi, “Tundiseni limanya ku cikolo ca mbumbo!” Mata ndokazi ya mutsi wakumbulwile ngwendi, “Mwene, a simbu ino alinakunika, omwo kuneti matangwa awana tunde atwamutsindilile!”

⁴⁰ Yesu wendekele kuli ikeye ngwendi, “Kuma kunjakulekele ngwange nga ukulaela ukamona vumpau vwa Njambi ndi?”

⁴¹ Ngecivene, vatundisileko limanya. Co Yesu wakengele kwilu wendekele ngwendi, “Tate, njikukandelela, omwo ukanjizivi.

⁴² Njinazivuka ngwange simbu yoshe ukanjizivi, oloni njendeka eci omwo mbunga eyi inemana kuno, vakulaele ngeci yove wanjitumine.”

⁴³ Omo wamanesele kwendeka evi, watambekele na lijwi lyakama ngwendi, “Lazalu, tuukamo!”

⁴⁴ Watuukilemo, mendi endi na mavoko vyapwile vyakukuta na vinanga vije vivamuzengelele, na ku mesho endi vazengeleko lilesu. Co Yesu wavalekele ngwendi, “Muzitulenivyo ngeci aye.”

Vutumbe vwakutsiya Yesu

⁴⁵ Vanu vavangi vaje vezile kuli Maliya vamwene vije vyalingile Yesu, co vakulaelele kuli ikeye.

⁴⁶ Oloni vamo vavo velukile kuli vaFaliseo vavalekele vije vyalingile Yesu.

⁴⁷ Ngecivene, vaFaliseo na vakulunu va vaka-kukombelela valiwanene na vaka-Munga, co vendekele ngwavo, “Tulinga vati? Omwo kengeni vizivukiso vyoshe vyalinakulinga ou munalume!

⁴⁸ Nga tumwecelela ngoco, voshe vakamukulaela, co vakulunu va vaLoma vakanyongesa Njuvo yetu ya Shukulu Kalunga na muyati wetu woshe!”

⁴⁹ Oloni umo wavo Kayafase, uje wapwile Muka-kukombelela Wakama mwaka uje, wendekele ngwendi, “Yeni na cimo cai muzivuka!

⁵⁰ Kuma kumuzivuka ngweni mwamuvwa munu umo kutsila vanu, co kutuvakana kunyongesa muyati woshe ndi?”

⁵¹ Mwa vushunga vene, kendekele eci mu cizango cendi embwe, omwo ikeye akupwa Muka-kukombelela Wakama mwaka uje, wambulwile vuka-kwimanena ngeci Yesu ikeye akatsila vaYunda,

⁵² co kesi vakevo lika embwe, oloni akungulwile amo vanu va Njambi mu muvila umo vaje vanashandokela kweka.

⁵³ Ngecivene, tunde a litangwa lije vakulunu va vaYunda vatumbile vutumbe vwakutsiya Yesu.

⁵⁴ Ngecivene, Yesu kendele citona-mesho mu Yunda, oloni watundileko waile ku mutambela weka kuyehi na mambo, ku nganda vatumbwile ngwavo Efalime. Co wakele kuje amo na vandongisi vendi.

⁵⁵ Simbu ya Ciwano ca Pasovala yakele muyehi, co vanu vavangi vatundile ku mitambela yavo valamatele kuya ku Yelusalema mukulijelesa omo simbu ya ciwano kanda yete.

⁵⁶ Vashakezekele Yesu, co omo vakungulukilile mu Njuvo ya Shukulu Kalunga, valihozwele akati kavo ngwavo, “Muyongola vati? Mwa vushunga vene kuma kaija kuno ku ciwano ndi?”

⁵⁷ Vakulunu va vaka-kukombelela na vaFaliseo vashikile ngwavo nga umo wazivukile kuje kwakele Yesu, napandele kwambulula ngeci vakamukwate.