Yowano 10 - Livulu lya Shukulu Kalunga

Cisimo ca kanyungi

¹ “Mwa vushunga njimileka ngwange, nga munu kakovelela ku cikolo ca limba, oloni alondela kweka, uje munu napu mwizi na lipwepwe.

² Oloni munu uje akovelela ku cikolo, ikeye kanyungi ka vimanga.

³ Muka-kunyunga ku cikolo amushokolwela, co vimanga vaziva lijwi lyendi omo avasana mazina avo, co avatwamenena anja.

⁴ Omo navatuula anja, atwama kulutwe lwavo, co vimanga vamukava munima, omwo vazivuka lijwi lyendi.

⁵ Kuvakavangeya munu weka embwe, oloni vakamutewa, omwo kuvazivuka lijwi lyendi.”

⁶ Yesu wavatelelele cisimo eci, oloni kuvazivisisile vije vyendekele.

Yesu ikeye Kanyungi Wamuvwa

⁷ Ngecivene, Yesu wendekele lalo ngwendi, “Mwa vushunga njimileka ngwange, yange cikolo ca vimanga.

⁸ Voshe veka vaje valivangele kulutwe lwange vapwa vezi na mapwepwe, oloni vimanga kuvavatolililile.

⁹ Yange cikolo. Woshe akovela muli yange akovoka, co akakovela nakutuuka, co akawana kwakulila.

¹⁰ Mwizi akaija nakwiva lika nakutsiya nakunyongesa. Njinaija ngeci mukale na mwonyo, mwonyo waungi.

¹¹ “Yange kanyungi wamuvwa, kanyungi wamuvwa ali na cizango cakutsila vimanga.

¹² Uje muka-kunyungila fweto, ikeye kesi kanyungi, co vimanga kesi vendi, amona kangunga alinakwija, co aseza vimanga nakutewa, co kangunga akwata vimanga nakuvashandola.

¹³ Muka-kunyungila fweto atewa omwo akapangela fweto, co kazeme vimanga.

¹⁴ Yange kanyungi wamuvwa, njizivuka vimanga vange, co na vimanga vange vanjizivuka.

¹⁵ Ngwe amo Tate anjizivuka, co nange lalo njizivuka Tate, mu ngila imo vene njizivuka vimanga vange navo lalo vanjizivuka. Co njitula mwonyo wange omwo vimanga vange.

¹⁶ Co kuvali lalo vimanga veka vaje vanapu vange vakevo kesi va mu limba lino. Njinapande kuvanena lalo, vakaziva lijwi lyange, ngecivene, vakapwa vutanga vumo na kanyungi lalo umo.

¹⁷ “Omwo Tate anjizema njili na cizango cakwecela mwonyo wange, ngeci njiwutambule lalo.

¹⁸ Naumo wai atundisa mwonyo wange. Oloni njilinakuwana mu cizango cange. Njili na moko yakuwecela, co njili na moko yakuutambula. Evi vikevyo vyanjishikile Tate ngeci njivilinge.”

¹⁹ Kwakele lalo kulyangunuka akati ka vanu omwo majwi awa.

²⁰ Vamo vavo vavangi vendekele ngwavo, “Ali na munzinzime wakujwala! Co nazaluka! Omwo vikajo mulinakumutolilila?”

²¹ Oloni veka ngwavo, “Munu alina munzinzime wakujwala kasa kwendeka ngeci! Munzinzime wakujwala wasa kutonesa vati mesho a tupuputwa?”

Yesu vamuvyana

²² Yapwile simbu ya cisika, co vanu valisambele Ciwano Cakukundika Njuvo ya Shukulu Kalunga mu Yelusalema.

²³ Yesu wakele nakwenda mu Mbalanda ya Solomoni mu Njuvo ya Shukulu Kalunga,

²⁴ ngecivene, vanu vakungulukilile kuli ikeye vamwihwile ngwavo, “Visimbu vingai ukatuseza na citanga? Tuleke vushunga, yove Wakuvwavesa ndi?”

²⁵ Yesu wakumbulwile ngwendi, “Njamilekele laja, oloni yeni kumwanjikulaelele. Vyuma evi vinjilinga mu lizina lya Tate vikevyo vimwesa vukaleo vwange,

²⁶ oloni kumukulaela, omwo kesi mu vimanga vange.

²⁷ Vimanga vange vaziva lijwi lyange, co nange njivazivuka, co vanjikava.

²⁸ Njivana mwonyo wa myaka yoshe, co kuvakatsi embwe. Co naumo wai akavacakununa mu livoko lyange.

²⁹ Vije vyananjana Tate vinatuvakana vyuma vyoshe, co naumo wai akavacakununa mu livoko lya Tate.

³⁰ Tate nange twapwa umolika.”

³¹ Vanu vanonele lalo mamanya ngeci vamwashe.

³² Yesu wendekele kuli vakevo ngwendi, “Njinamimwesa vipangi vyavingi vyavivwa vije vyanjanene Tate ngeci njivilinge, co a vyuma evi vili vimo vimunjashela mamanya?”

³³ VaYunda vamukumbulwile ngwavo, “Kutukwashela mamanya a vipangi vyavivwa, oloni omo unashaula Njambi! Yove u munu, oloni ulinakulipwisa u Njambi!”

³⁴ Yesu wakumbulwile ngwendi, “Mu Lishiko lyeni vanasoneka ngwavo Njambi wendekele ngwendi, ‘Munapu mu vinjambi.’

³⁵ Tunazivuka ngeci visoneka vinendeka vushunga ku myaka yoshe, co Njambi watumbwile vaje vanu vinjambi, vanu vaje vaanene majwi endi.

³⁶ Ngeci mwange ni, Tate wanjangwile nakunjituma ano a kaye. Vatijo mwendeka ngweni njilinakushaula Njambi omwo njendekele ngwange nji Muna Njambi?

³⁷ Kesi munjikulaele nga kunjesi nakulinga vipangi vya Tate.

³⁸ Oloni nga njilinakuvilinga, nameme kumunjikulaela, oloni munapandele kukulaela vipangi vyange, co muzivuke ngweni Tate ali muli yange, co nange lalo njili muli Tate.”

³⁹ Vashakele lalo kumukwata, oloni ikeye walavukile watundile mu mavoko avo.

⁴⁰ Yesu watundile kuje waile lalo musambwa ya Ndonga ya Yondau kuje kwakele nakumbatizila Yowano, co wakele kuje.

⁴¹ Co vanu vavangi vezile kuli ikeye, co vendekele ngwavo, “Yowano kalingile vizivukiso, oloni vyuma vyoshe vyendekele ali munu ou vinapu vya vushunga.”

⁴² Co vanu vavangi kuje vakulaelele kuli ikeye.