Yowano 1 - Livulu lya Shukulu Kalunga

Lijwi lya mwonyo

¹ Akulivanga kwakele Lijwi, co Lijwi lyakele amo na Njambi, co Lijwi lyapwile Njambi.

² Tunde akulivanga, Lijwi lyakele amo na Njambi.

³ Ali ikeye Njambi watangele vyuma vyoshe, co kukwesi cuma civatangele kujeneka ikeye cai.

⁴ Lijwi likelyo lyapwile nsina ya mwonyo, co mwonyo ou ukewo wanenele ceke kuli vanu.

⁵ Ceke citwila mu lisusulungu, co lisusulungu kulyasele kucitundisa embwe.

⁶ Njambi watumine muluwa wendi, lizina lyendi Yowano,

⁷ ikeye wezile nakuleka vanu a vyuma vya ceke, ngeci voshe vazive lijwi nakukulaela.

⁸ Ikeye kapwile ceke embwe, oloni wezile nakwambulula a vyuma vya ceke.

⁹ Eci cikeco capwile ceke ca vushunga, ceke cije cilinakwija mu kaye nakutwila ali vanu voshe.

¹⁰ Lijwi lyakele mu kaye. Co nameme Njambi watangele kaye ali ikeye, oloni kaye kukamuzivukile.

¹¹ Ikeye wezile ku lifuti lyendi, oloni vanu vendi kuvamutambwile.

¹² Oloni kuli voshe vaje vamutambwile nakukulaela kuli ikeye, wavanene moko yakupwa vana va Njambi.

¹³ Vakevo kuvapwile vana va Njambi ku cisemwa ca ano asi embwe, cisemwa cakusemuka ku munalume, oloni Njambi vavenya ikeye wapwile ishavo.

¹⁴ Co Lijwi lyemukile munu, lyashulile na kutetela navushunga, co lyakele akati ketu. Twamwene vumpau vwendi, vumpau vuje vwaatambwile akupwa mwana umolika wa Ishe.

¹⁵ Yowano wambulwile vya ali ikeye. Co watambekele ngwendi, “Ou ikeye uje injamilekele ngwange, ‘Alinakwija munima yange, oloni ikeye napu wakama kutuvakana yange, omwo ikeye wakeleko akulivanga omo yange kanda njisemuke.’ ”

¹⁶ Co akushula na kutetela kwendi watuvezikisile tuvoshe, watwanene vivezikiso kuwezelela a vivezikiso vikwavo.

¹⁷ Omwo Njambi waanene Lishiko lyendi ali Mosesa, oloni kutetela na vushunga vinaija ali Yesu Kilistu.

¹⁸ Naumo wai wamona Njambi, kuvanga Mwana uje umolika, wakulifwa mumo na Njambi, uje ali ku mati ya Ishe, ikeye namusholola.

Vukaleo vwa Yowano Muka-kumbwitika

¹⁹ Co vaka-kushwana va vaYunda mu Yelusalema vatumine vamo vaka-kukombelela na vaLevi kuli Yowano ngeci vakamwihule ngwavo, “Yove iyajo?”

²⁰ Yowano kavyanene kuvakumbulula embwe, oloni wendekele mwamuvwa kuli vakevo ngwendi, “Kesi yange Wakuvwavesa.”

²¹ Co vamwihwile ngwavo, “Indi yove iyajo? Yove Elinja ndi?” Oloni Yowano wavakumbulwile ngwendi, “Embwe, kesi yange!” Co vamwihwile lalo ngwavo, “Indi yove Muka-kwimanena ndi?” Oloni Yowano wavakumbulwile ngwendi, “Embwe, kesi yange.”

²² Asinoni vamwihwile ngwavo, “Indi yove iyajo? Tuleke ngeci tukaleke vaje vanatutumine kuli yove. Ulitumbula ngwove yove iya?”

²³ Ikeye wavakumbulwile nakuvatumbwila majwi a Isaya muka-kwimanena ngwendi, “ Yange ‘Lijwi lya umo atambeka mu mambo ngwendi, sheveni mu ngila ya Shukulu Kalunga ngeci akwitilemo!’ ”

²⁴ Miluwa vaje vavatumine vaFaliseo

²⁵ asinoni vehwile Yowano ngwavo, “Nga kesi yove Wakuvwavesa, nambe Elinja, nambe Muka-kwimanena, omwo vika ulinakumbatizila?”

²⁶ Yowano wavakumbulwile ngwendi, “Yange njilinakumbwitika mu mema, oloni akati keni anemana umo uje kumuzivuka.

²⁷ Ikeye alinakwija munima yange, oloni yange kunjafwililile nameme kuzitula miva ya a vin̄aku vyendi.”

²⁸ Vyoshe evi vyalingiwile mu Mbetaniya, mu ngangela ya Ndonga ya Yondau, kuje kwakele nakumbatizila Yowano.

Muna Manga wa Njambi

²⁹ Alikaki Yowano wamwene Yesu alinakwija kuli ikeye, co wendekele ngwendi, “Kengeni, Muna Manga wa Njambi, uje muka-kutundisa vuvi vwa vaka-kaye!

³⁰ Ou ikeye vene uje njendekele ngwange, ‘Munima yange mwija munu umo, oloni nanjituvakana, omwo ikeye wakeleko simbu kanda yange njisemuke.’

³¹ Yange kunjamuzivukile ngwange ikeye, oloni njezile nakumbwitika mu mema mukumusholola ku vanu va Isalele.”

³² Co Yowano wambulwile vukaleo ovu ngwendi, “Njamwene Munzinzime Wakujela washulukile mwilu ngwe katela, co wakele ali ikeye.

³³ Yange kunjamuzivukile ngwange ikeye, oloni Njambi, uje wanjitumine ngeci njimbwitike mu mema, ikeye wendekele kuli yange ngwendi, ‘Ukamona Munzinzime akashuluka nakukala ali munalume umo, ikeye akambwitika na Munzinzime Wakujela.’

³⁴ Co Yowano wendekele ngwendi, ‘Yange njamumwene, co njimileka ngwange ou ikeye Muna Njambi.’ ”

Vandongisi va Yesu vakulivanga

³⁵ Alikaki Yowano wemanene lalo kuje na vandongisi vendi vavali,

³⁶ co omo wamwene Yesu alinakwija kuje, co wendekele ngwendi, “Kengeni, Muna Manga wa Njambi!”

³⁷ Vandongisi vaje vavali vamuzivile omo wendekele majwi awa, co vakavele Yesu.

³⁸ Yesu watengulukile nakukenga kunima, co wavamwene valinakumukava, co wavehwile ngwendi, “Vika mushaka?” Co vamukumbulwile ngwavo, “Lambi, wakala kuli?” (Lijwi eli lilumbunuka ngwalyo “Mulongisi.”)

³⁹ Ikeye wavakumbulwile ngwendi, “Ijeni mukamone.” (Omwo yapwile simbu ya cingwezi.) Ngecivene, vaile amo nendi vakamwene kuje kwakele, co vakele amo nendi litangwa lije lyoshe.

⁴⁰ Umo wa vaje vavali wapwile Anduleo, ndolome ya Simoni Petulu.

⁴¹ Aje vene Anduleo wawanene ndolome yendi Simoni, co wamulekele ngwendi, “Tunawana Wakuvwavesa.” (Lijwi eli lilumbunuka ngwalyo “Kilistu.”)

⁴² Asinoni Anduleo watwalele Simoni kuli Yesu. Yesu wamukengele, co wendekele nendi ngwendi, “Lizina lyove yove Simoni muna Yowano, oloni vakakutumbula Kefase.” (Eli linalifu mumolika na Petulu, co lilumbunuka ngwalyo “Limanya.”)

Yesu asana Filipu na Natanele

⁴³ Alikaki Yesu wayongwele kuya ku Ngalileya. Co wawanene Filipu, co wendekele kuli ikeye ngwendi, “Njikave!”

⁴⁴ (Filipu watundile ku Mbetesainda, ku nganda kuvakele va Anduleo na Petulu.)

⁴⁵ Filipu wawanene Natanele, co wamulekele ngwendi, “Tunawana uje yasonekele Mosesa mu livulu lya Lishiko, uje lalo ivasonekele vaka-kwimanena. Ikeye Yesu muna Yosefa, wa ku Nazaleta.”

⁴⁶ Co Natanele wamwihwile ngwendi, “Kuma ku Nazaleta kwasa kutunda cuma cacivwa ndi?” Filipu wamukumbulwile ngwendi, “Ija ukamone.”

⁴⁷ Omo Yesu wamwene Natanele alinakwija kuli ikeye, co wendekele vyendi ngwendi, “Ou ikeye kaIsalele wa vushunga, muli ikeye kumwesi makuli!”

⁴⁸ Natanele wamwihwile ngwendi, “Unanjizivuka vati?” Yesu wamukumbulwile ngwendi, “Njakumwene mwisi ya muti wa mukuyu simbu kanda Filipu akusane.”

⁴⁹ Natanele wamukumbulwile ngwendi, “Mulongisi, yove unapu u Muna Njambi! Yove Mwene wa Isalele!”

⁵⁰ Yesu wamukumbulwile ngwendi, “Unatava omwo njinakuleke ngwange njakumwene mwisi ya muti wa mukuyu ndi? Ukamona vyuma vyakama kutuvakana evi!”

⁵¹ Co Yesu wendekele kuli vakevo ngwendi, “Mwa vushunga njimileka ngwange, mukamona lilu linashokoloka, co na tungelo va Njambi valonda nakushuluka ali Muna Munu.”