Yoshwa 8 - Livulu lya Shukulu Kalunga

Kufunguluka nakunyonga kwa Ayi

¹ Shukulu Kalunga wendekele kuli Yoshwa ngwendi, “Kesi uzive lyova nambe kujujuka. Ya na mashwalale voshe ku Ayi. Omwo njinakundika mwene wa Ayi, na vanu vendi, na nganda yendi, na lifuti lyendi lyoshe mu mavoko ove.

² Co ukalinga na Ayi na mwene wamwo ngwe muje muwalingile na Yeliko na mwene wamwo, oloni ku simbu ino mukapukula vufuko vwamwo amo na vimuna voshe, vyoshe vikapwa vyeni. Livwaese mukavalwise nakuvakasumuna.”

³ Ngecivene, Yoshwa wakatukile waile ku Ayi na mashwalale vendi voshe. Co ikeye waangwile mashwalale vakupwa 30,000, vanalume vaka-nzili, co wavatumine vutsiki vuje vene.

⁴ Wavashikile ngwendi, “Mukavanda anima ya nganda, oloni kesi mukaye kulyala na nganda embwe. Livwaeseni muvavoshe mukalwe.

⁵ Asinoni yange na vanu voshe vali nange tukashwenya ku nganda. Omo vanalume va mu Ayi vakaija nakutulwisa, co tukatewa ngwe muje mutwalingile akulivanga.

⁶ Vakevo vakatusheka noo tunavatwala kulyala na nganda. Co vakayongola ngwavo tulinakuvatewa ngwe muje mutwalingile akulivanga.

⁷ Asinoni yeni mukajomboloka kuje munavandele, co mukafungulula nganda, omwo Shukulu Kalunga Njambi yeni akaikundika ku mavoko eni.

⁸ Omo munafungulula laja nganda, co mukayenyeka ngwe muje mwanashiki Shukulu Kalunga, awa akewo mashiko eni.”

⁹ Ngecivene, Yoshwa wavatumine, co vaile ku mitambela yavo mu kangombe ka yambi ya Ayi, co vavandele mukati ka Ayi na Mbetele. Oloni Yoshwa walalele mu cilombo vutsiki vuje.

¹⁰ Yoshwa wendukile mutondo-tondo, co wakungulwile mashwalale amolika. Asinoni ikeye na vantwama va Isalele vatwamenenene vanu ku Ayi.

¹¹ Co mashwalale voshe vaje vakele amo na Yoshwa vaile vashwenyele ku cikolo ca nganda, vatungile cilombo ku kunto ya Ayi, mukati kavo na Ayi mwakele cana.

¹² Ngecivene, Yoshwa wambatele mashwalale vakupwa 5,000 nakuvashweka mu kangombe ka yambi ka nganda, vavandele mukati ka Ayi na Mbetele.

¹³ Eyi ikeyo ngila vavwaeselele mashwalale va nzita, vatungilile cilombo ku kunto ya nganda ya Ayi, co vaje mashwalale vasaleleo vavandele mu kangombe ka yambi. Oloni Yoshwa walalele vutsiki vuje mu cana.

¹⁴ Omo mwene wa Ayi wamwene vanu va Yoshwa, co wazambwile vwasi, wamenekele mutondo-tondo ikeye na vanu vendi voshe vaile kulutwe ku Cana ca Yondau nakulwa na vaIsalele a mutambela uje vene wakulivanga. Ikeye kazivukile ngeci kunima ya nganda kuli vanu vamo vanamuvandela.

¹⁵ Yoshwa na vanu vendi valikwisile ngwe valinakutewa, co vatewelele ku ngila yakuya ku mambo.

¹⁶ Ngecivene, mwene wasanene vanu voshe va mu nganda ngeci vakave Yoshwa, vashekele Yoshwa, co mukusheka Yoshwa kumani vakele nakuya kulyala kutunda ku nganda.

¹⁷ Vanalume voshe va mu Ayi vakavangeyeye vaIsalele, vasezele nganda ululu, munalume naumo wai wasalele nakunyunga nganda.

¹⁸ Asinoni Shukulu Kalunga wendekele kuli Yoshwa ngwendi, “Inika likunga lyove ku Ayi, omwo njinaikundika ku mavoko ove.” Ngecivene, Yoshwa walingile ngwe muje muvamulekele.

¹⁹ Vwasi-vwasi omo Yoshwa wajundwile livoko lyendi, co vaje mashwalale vavandele kunima ya nganda vazambwile, vashatukilile mu nganda nakuyifungulula, co vayenyekele.

²⁰ Omo mashwalale va ku Ayi vakengele kunima, vamwene vwisi vukondoka kondoo mwilu. Co kukwakele ngila yeka lalo yakulyamena yai, omwo vaIsalele vaje vatewelele mu mambo vatengulukile nakuvalwisa.

²¹ Omo Yoshwa na mashwalale vendi vamwene ngeci vaje mashwalale vavandele vanafungulula laja nganda na vwisi vwakondokele kondoo mu nganda, co vashangumukile kutsiya mashwalale va ku Ayi.

²² Co vaIsalele vaje vakele mu nganda vezile nakulikumbasana na vaje vakele nakulwa nzita, ngecivene, vaje mashwalale va ku Ayi valimwene vakevo vavenya ngeci vaIsalele vanavazengeleka, co mashwalale va vaIsalele vatsiile mashwalale voshe va ku Ayi, naumo wai waputumukileo na mwonyo,

²³ kuvanga mwene wa ku Ayi, ikeye ivafungulwile nakumutwala kuli Yoshwa.

²⁴ VaIsalele vatsiile mashwalale voshe va ku Ayi vaje vakele mu shwata na mu mambo muje muvatewelele, asinoni vaIsalele velukile ku Ayi nakutsiya voshe vaje vakele muje mu nganda.

²⁵ Co vanu voshe va mu Ayi vavatsiile ku litangwa lije vene, vanalume na vanakazi vapwile 12,000.

²⁶ Yoshwa wenikile likunga lyendi ku Ayi, co kaliwisilile asi noo wanyongesele vanu voshe va muje mu nganda.

²⁷ Oloni vaIsalele vambatelele vimuna na vufuko vuje vuvafungulwile muje mu nganda, ngwe muje Shukulu Kalunga walekele Yoshwa.

²⁸ Ngecivene, Yoshwa wenyekele nganda ya Ayi nakuyiseza mupulungwa, na lelo lino icili ngacije vene.

²⁹ Asinoni Yoshwa washukikile mwene wa ku Ayi a muti, co wasezele muvila wendi aje noo cingwezi. Omo lyatokele, Yoshwa washikile ngeci vatundiseo muvila vakaumbilile ku vukovelelo vwa cikolo ca nganda. Co valundikileo mutumbo wakama wa mamanya, kweta na ku litangwa lya lelo kuwacili.

Valava lishiko a Munkinda wa Evale

³⁰ Ngecivene, Yoshwa watungilile mutula Shukulu Kalunga Njambi ya Isalele a Munkinda wa EVaLe

³¹ Ikeye wautungile ngwe ku mashiko aje aanene Mosesa ngamba ya Shukulu Kalunga kuli vaIsalele, ngwe muvanasoneka mu Livulu lya Mashiko lya Mosesa ngwavo, “Mukatunga mutula wakulinga na mamanya akujeneka kushonga na cikuvo.” Akeo uvakombelelele vin̄ombelo vya kwenyeka kuli Shukulu Kalunga, nakukombelelao lalo vin̄ombelo vya kulitombola.

³² Aje vene, vaIsalele oku vanamukengelela, Yoshwa wasonekele a mamanya amo Mashiko aje asonekele Mosesa.

³³ Co vaIsalele, na vantwama vavo, na vamyata vavo, na maako vavo, na vaka-kwija vaje vakele akati kavo, vemanene ku mitambela ivali ya Cikasa ca Cikumiiyo ca Shukulu Kalunga, nakukenga shwii kuli vaLevi vaka-kukombelela vaje vambatele Cikasa. Co litambelo lya vanu vakengesele vinima vyavo ku Munkinda wa Ngelizime, co litambelo likwavo vakengesele vinima vyavo ku Munkinda wa Evale ngwe muje Mosesa ngamba ya Shukulu Kalunga wavashikile kulinga omo simbu yetele ngeci vanu va Isalele vatambule vivezikiso.

³⁴ Asinoni Yoshwa watambekele akulava majwi oshe a Mashiko, nawa akuvezikisa, nawa a visingo, ngwe muje muvawasoneka mu Livulu lya Mashiko.

³⁵ Mashiko oshe a Mosesa, Yoshwa waalavelele mbunga ya vaIsalele voshe amo na vanakazi, na vanike, na vaka-kwija vaje vakele akati kavo.