Yoshwa 4 - Livulu lya Shukulu Kalunga

Vemika mamanya a canukiso

¹ Omo mbunga yoshe vanajavuka Yondau, co Shukulu Kalunga wendekele kuli Yoshwa ngwendi,

² “Angula vanalume likumi na vavali, ku muyati umo na umo.

³ Valeke vanone mamanya likumi na avali mukati ka Ndonga ya Yondau, ku mutambela uje vemanene vaka-kukombelela. Valeke vambate awa mamanya vakawalundike asi kuje kumukatungila cilombo ceni ku vutsiki vwa lelo.”

⁴ Asinoni Yoshwa wasanene vanalume likumi na vavali vaje vaangwile,

⁵ wavalekele ngwendi, “Koveleni mu Yondau kulutwe lwa Cikasa ca Cikumiiyo ca Shukulu Kalunga Njambi yeni, munu na munu ambate limanya limo a citsili cendi, kwimanena muyati umo na umo wa Isalele.

⁶ Mamanya awa akanukisa vanu vyuma vije vyanalingi Shukulu Kalunga. Co kulutwe, omo vana veni vakamihula ngwavo, ‘Mamanya awa avikajo? Anunguluka cuma mukajo kuli yeni?’

⁷ Co mukavaleka ngweni, ‘Mema a mu Yondau alikelele kwita omo Cikasa ca Cikumiiyo ca Shukulu Kalunga cajavukile Ndonga ya Yondau. Co mamanya awa anapu canukiso ca ku myaka yoshe ca vanu va Isalele a vyuma vije vyalingiwile kuno.’ ”

⁸ Ngecivene, vaje vanalume vakavele mashiko a Yoshwa, ngwe muje Shukulu Kalunga washikile Yoshwa, vambatele mamanya likumi na avali akati ka Yondau, limo na limo ngwe ku miyati ya Isalele, vaatwalele ku mutambela uje vatulilile vutsiki, co vawalundikile asi.

⁹ Co Yoshwa lalo walundikile mamanya likumi na avali akati ka Yondau, ku mwela uje vemanene vaka-kukombelela vaje vambatele Cikasa ca Cikumiiyo. Mamanya awa na lelo lino kuwacili kuje.

¹⁰ Asinoni vaka-kukombelela vaje vambatele Cikasa vemanene akati ka Yondau noo vyuma vyoshe vyalingiwile, vije vyashikile Shukulu Kalunga kuli Yoshwa kuvileka vanu va Isalele ngeci vavilinge, evi vikevyo vije vyashikile Mosesa kuli Yoshwa. Co vanu vazambwile, vajavukile ndonga.

¹¹ Co capwile ngeci omo voshe vanajavuka laja, asinoni vaka-kukombelela vaje vambatele Cikasa ca Cikumiiyo ca Shukulu Kalunga vatwamene kulutwe.

¹² Ngecivene, vanalume va ku miyati ya Luvena, na Ngande, na litambelo lya muyati wa Manase, vaje valipakatele vitwa, vakevo valivangele kujavuka kulutwe lwa vanu va Isalele, ngwe muje mwavashikile Mosesa.

¹³ Co kwajavukile vanalume 40,000 vaje valipakatele vitwa vya nzita, vajavukile ku mesho a Shukulu Kalunga ngeci vakalwe nzita, vaketele ku vyana vya Yeliko.

¹⁴ A litangwa lije Shukulu Kalunga waamesele Yoshwa ku mesho a vanu va Isalele, co vamuzivilile lyova nakumusingimika matangwa oshe akuyoya kwendi, ngwe muje muvasingimikile Mosesa.

¹⁵ Asinoni Shukulu Kalunga wendekele kuli Yoshwa ngwendi,

¹⁶ “Shika vaka-kukombelela vaje vanambata Cikasa ca Cikumiiyo valamate a nunda kutunda mu Yondau.”

¹⁷ Ngecivene, Yoshwa washikile vaka-kukombelela ngwendi, “Lamateni a nunda mutunde mu Yondau.”

¹⁸ Omo vaka-kukombelela vaje vambatele Cikasa ca Cikumiiyo vanajavuka laja, ndonga yashangumukile kwita mema, yajalelele ku ngenge kwoshe ngwe muje mwalaja.

¹⁹ A litangwa lyamulikumi ku ngonde yakulivanga vanu va Isalele vajavukile Ndonga ya Yondau, co vatungile cilombo cavo ku Ngilingale, mu ngangela ya Yeliko.

²⁰ Asinoni Yoshwa walundikile mamanya aje likumi na avali, aje avambatele mu Yondau vaje vanalume likumi na vavali, co waemikilile ku Ngilingale.

²¹ Co wendekele kuli vanu va Isalele ngwendi, “Kulutwe, omo vana veni vakamihula ngwavo, ‘Mamanya awa anunguluka cuma mukajo kuli yeni?’

²² Co mukavaleka ngweni, ‘VaIsalele vajavukile Ndonga ya Yondau a livu lyakuma.’

²³ Mukavaleka ngweni Shukulu Kalunga Njambi yetu womisile mema a mu Yondau cau omwo twajavukile, ngwe muje lalo mwomisile cau mema a mu Lishali Lyakuvenga,

²⁴ walingile eci ngeci vanu voshe va ano asi vakazivuke muvwapwa vukama na nzili ya Shukulu Kalunga, co mukasingimika Shukulu Kalunga Njambi yeni ku myaka yoshe.”