Yoshwa 3 - Livulu lya Shukulu Kalunga

Vanu va Isalele vajavuka Ndonga ya Yondau

¹ Yoshwa na vanu va Isalele voshe vendukile mutondo-tondo, vatundile mu cilombo ca ku Mungongo, vaile ku Yondau, vatungile cilombo cavo kuje, vavandamenene ngeci vajavuke.

² Omo kuneti matangwa atatu vantwama vetile mu cilombo

³ valekele vanu ngwavo, “Omo mukamona vaLevi vaka-kukombelela vanambata Cikasa ca Cikumiiyo ca Shukulu Kalunga Njambi yeni, co mukakatuka nakutunda mu mwela uno ngeci muvakave.

⁴ Vakamimwesa ngila imukaya omo kanda mucikalemo muno. Oloni kesi mushwenye kuyehi na Cikasa ca Cikumiiyo, mukashondoloka nakuseza lyaana lyakama munima yaco.”

⁵ Yoshwa walekele vanu ngwendi, “Lijeleseni, omwo imene Shukulu Kalunga akalinga vikomoweso akati keni.”

⁶ Asinoni Yoshwa walekele vaka-kukombelela ngwendi, “Ambateni Cikasa ca Cikumiiyo mutwame kulutwe lwa vanu.” Co valingile ngwe muje mwavalekele.

⁷ Asinoni Shukulu Kalunga wendekele kuli Yoshwa ngwendi, “Ku litangwa lya lelo njikakupwisa uwakama ku mesho a vanu voshe va Isalele ngeci vazivuke ngwavo ngwe muje munjakele na Mosesa mukemwo lalo munjikakala nove.

⁸ Leka vaka-kukombelela ava vanambata Cikasa ca Cikumiiyo ngwove omo veta ku ngenge ya ndonga, vanapande kwimana ku ngenge ya ndonga mu mema.”

⁹ Asinoni Yoshwa wendekele kuli vanu va Isalele ngwendi, “Ijeni kuno mutolilile evi vyendeka Shukulu Kalunga Njambi yeni.

¹⁰ Co mukazivuka ngeci Njambi wakuyoya ali akati keni ngwe omo mulinakuya kulutwe, mwa vushunga vene ikeye akasheka vaKanana, na vaHiti, na vaHivi, na vaPelezi, na vaNgilengashi, na vaAmoli, na vaNjevushi.

¹¹ Kengeni, Cikasa ca Cikumiiyo ca Shukulu Kalunga wa ano asi oshe cikajavuka Ndonga ya Yondau nakuya kulutwe lweni.

¹² Ololo anguleni vanalume likumi na vavali, ku muyati umo na umo wa Isalele.

¹³ Omo vaka-kukombelela vaje vanambata Cikasa ca Cikumiiyo ca Shukulu Kalunga wa ano asi oshe, vakalyata mendi avo mu mema, co mema a mu Yondau akemana, mema aje atunda ku cava akemana mutumbo ku mutambela umo.”

¹⁴ Ngecivene, omo vanu vatundile mu cilombo cavo, vajavukile Ndonga ya Yondau, co vaka-kukombelela vaje vambatele Cikasa ca Cikumiiyo vatwamene kulutwe lwa vanu.

¹⁵ Yapwile simbu ya kuteja omo Ndonga ya Yondau yajalelele. Co omo vaka-kukombelela, vaje vambatele Cikasa ca Cikumiiyo vetele ku ngenge ya ndonga, co valyatele mu mema,

¹⁶ co mema aje atundile ku cava emanene mutumbo ku mutambela umo, ku Andama, nganda ije ili kuyehi na Zalatane. Mema aje ayile ku shango ku Lishali lya Kutsa omine cau, co vanu vajavukilile kuyehi na Yeliko.

¹⁷ Omo vanu vendele a livu lyakuma, co vaka-kukombelela, vaje vambatele Cikasa ca Cikumiiyo, vemanene lwii a livu lyakuma akati ka Ndonga ya Yondau noo vanu voshe vanajavuka.