Yoshwa 23 - Livulu lya Shukulu Kalunga

Majwi akusalesa a Yoshwa kuli vantwama

¹ Co capwile ngeci omo kwetile matangwa amangi, Shukulu Kalunga wahwimisile Isalele ku vitozi vavo vaje vavazengelekele. A simbu ije Yoshwa te nakuluvala laja,

² ngecivene, Yoshwa wasanene Isalele yoshe, vakulunu, na vantwama, na maako, na vamyata va vanu, co wendekele ngwendi, “Yange ololo njinakuluvala manene.

³ Munamono vyuma vyoshe vije vyanalingi Shukulu Kalunga Njambi yeni ku miyati yoshe eyi omwo yeni. Shukulu Kalunga Njambi yeni ikeye namilwilako.

⁴ Njinaana vushwana ku miyati yeni livu lya miyati ije inasalako, amo neli lya miyati yoshe ije injinafungulula, kutunda ku Ndonga ya Yondau mu ngangela kweta ku Lishali lya Menditelenyani mu kangombe ka yambi.

⁵ Shukulu Kalunga Njambi yeni ikeye vavenya akavasheka kulutwe lweni, co akavashekela kulyala omo yeni mulinakuya kulutwe. Co mukashwana lifuti lyavo, ngwe muje mwamikulaesele Shukulu Kalunga Njambi yeni.

⁶ Ngecivene, nyanyameni nakwononoka vyuma vyoshe vije vivanasoneka mu livulu lya Mashiko lya Mosesa. Kesi mukalimbululeo nambe litambelo limo embwe,

⁷ co kesi mukalikumbasane na vanu ava vanasalao akati keni nambe kutumbula mazina a vinjambi vavo, nambe kulisinga a mazina a vinjambi vavo, nambe kulemesa vinjambi vaje, nambe kuvatsikamena embwe.

⁸ Oloni kakateyeni kuli Shukulu Kalunga Njambi yeni, ngwe muje mumwalingi kweta na lelo lino.

⁹ Shukulu Kalunga wamishekelele miyati yakama na nzili omo yeni mwakele nakuya kulutwe, co naumo wai wasele kwimana nakumilwisa.

¹⁰ Munalume umo wa ali yeni asa kusheka vanalume 1,000, omwo Shukulu Kalunga Njambi yeni ikeye amilwilako, ngwe muje mwamikulaesele.

¹¹ Nyanyameni ngeci muzeme Shukulu Kalunga Njambi yeni.

¹² Nga mumukengesa nima, co mulipandakana na miyati eyi yasalao, ava vali akati keni, co mulyambatela navo,

¹³ mwa vushunga vene zivukeni ngweni Shukulu Kalunga Njambi yeni kakasheke lalo miyati eyi ili kulutwe lweni. Oloni, vakevo vakapwa vushonde kuli yeni ngwe mweto nambe ngwe mbulu, co vakamivavalesa ngwe makote ku vimati vyeni, ngwe mambimbo mu mesho eni. Noo mukanyonga mu lifuti eli lyalivwa lyanamyana Shukulu Kalunga Njambi yeni.

¹⁴ “Ololo simbu yange ya kutsa inete. Munu na munu azivuke mu mbunge yendi na mu mwonyo wendi ngwendi Shukulu Kalunga Njambi yove nakwana vyuma vyoshe vyavivwa vije vyakukulaesele. Vikulaeso vyoshe vinalingiwa, co kukwesi cimo canonwa cai.

¹⁵ Ngwe omo ikeye wanyungile vikulaeso vyoshe vije vyalingile kuli yeni, ngecivene, Shukulu Kalunga akanena vyuma vyoshe vyavivi ali yeni, noo naminyongesa mu lifuti eli lyalivwa lyanamyana Shukulu Kalunga Njambi yeni.

¹⁶ Nga kumukanyungu cikumiiyo ca Shukulu Kalunga Njambi yeni cije camishikile, co nga mukapangela nakulemesa vinjambi veka nakuvatsikamena, vukalu vwa Shukulu Kalunga vukaija ali yeni, co mukanyonga vwasi mu lifuti lije lyalivwa lyanamyana.”