Yoshwa 21 - Livulu lya Shukulu Kalunga

Vinganda vya vaLevi

¹ Vakulunu va vikota vya muyati wa vaLevi vaile kuli Elyazale muka-kukombelela, na kuli Yoshwa muna Nune, na kuli vakulunu va vikota vya miyati ya Isalele yoshe.

² Co vendekele navo ku Shilo mu lifuti lya Kanana ngwavo, “Shukulu Kalunga washikile Mosesa ngwendi vakatwane vinganda ngeci tukalemo, na mutambela uje wazengeleka vije vinganda wakulila vimuna vetu.”

³ Ngecivene, ngwe muje mwashikile Shukulu Kalunga, vanu va Isalele vaanene vaLevi vinganda vimo na mitambela yakulila vimuna.

⁴ Naanga ya cikota ca Kohate va ku muyati wa vaLevi vakevo vapwile vakulivanga kuvana vinganda. Co vaLevi vaje vapwile vatekulwila va Alone muka-kukombelela akuta n̄ela vavaaneneko vinganda likumi na vitatu vije vyakele ku mitambela ya Yunda, na Simyoni, na Mbenjemani.

⁵ Co cikota ca vaKohate vaje vasaleleo akuta n̄ela vavaaneneko vinganda likumi vije vyakele ku mitambela ya Efalime, na Ndani, na litambelo lya Manase wa mu Kangombe ka Yambi.

⁶ Co cikota ca vaNgeleshone vavaaneneko vinganda likumi na vitatu vije vyakele ku mitambela ya Isakale, na Ashele, na Nafetali, na litambelo lya Manase wa mu Ngangela.

⁷ Co naanga ya cikota ca Melali vavaaneneko vinganda likumi na vivali vije vyakele ku mitambela ya Luvena, na Ngande, na Zembuloni.

⁸ Ngecivene, akuta n̄ela, vanu va Isalele vaanene vinganda evi na mitambela yavyo kuli vaLevi ngwe muje mwashikile Shukulu Kalunga kuli Mosesa ngeci valilemo vimuna vavo.

⁹ Awa akewo mazina a vinganda na mitambela vyatundile kuli Yunda, na Simyoni vivaanene

¹⁰ kuli vatekulwila va Alone vaje vapwile vaka-cikota ca Kohate, vaje vatundile kuli Levi. Vakevo vavavangelele kwana.

¹¹ Co vavaanene nganda ya Kilyate Alemba, (Alemba wapwile ishe ya Anake), co ololo vaitumbula ngwavo Hevelone, mu lifuti lya malundu lya Yunda, amolika na mutambela wakulila vimuna uje wazengelekeleko.

¹² Oloni mahya a nganda ya Alemba, na membo aje azengelekeleko, vavyanene laja Kalembi muna Njefune kupwa vushwana vwendi.

¹³ Kukumbasanako Hevelone, (yapwile nganda imo mwakutewela, kuli munu uje natsii mukwavo), co vinganda evi vavyanene vatekulwila va Alone muka-kukombelela, mazina avyo Limbena,

¹⁴ na, Njatile, na Eshetemowa,

¹⁵ na Holone, na Ndembile,

¹⁶ na Aine, na Njuta, na Mbete Shemeshe, amolika na mutambela wavo wakulila vimuna, vyapwile vinganda vitanu na viwana ku miyati ya Yunda na Simyoni.

¹⁷ Co ku mutambela wa Mbenjemani vavaanene vinganda viwana, mazina avyo, Ngimbiyone, na Ngemba,

¹⁸ na Anatote, na Alemone, amolika na mitambela yakulila vimuna vavo.

¹⁹ Vyoshe vyapwile vinganda likumi na vitatu, amolika na mitambela yakulila vimuna vavo, vavyanene vaka-kukombelela, vatekulwila va Alone.

²⁰ Co naanga ikwavo ya vaLevi vaka-cikota ca Kohate vavaanene vinganda vya ku mutambela wa Efalime.

²¹ Vavaanene vinganda viwana, mazina avyo, Shekeme, na mitambela yamwo yakulila vimuna mu lifuti lya malundu lya Efalime, (Shekeme yapwile nganda imo mwakutewela), na Ngezele,

²² na Kimbezaime, na Mbete Holone, amolika na mitambela yakulila vimuna vavo.

²³ Co ku mutambela wa Ndani vavaaneneko vinganda viwana, mazina avyo, Eleteke, na Ngimbetone,

²⁴ na Ainjalone, na Ngatelimone, amolika na mitambela yakulila vimuna vavo.

²⁵ Co ku mutambela wa litambelo lya Manase wa mu Kangombe ka Yambi vavaaneneko vinganda vivali, mazina avyo, Tanaake, na Ngetelimone, amolika na mitambela yakulila vimuna vavo.

²⁶ Co naanga eyi ya cikota ca Kohate vatambwile vinganda likumi, amolika na mitambela yakulila vimuna vavo.

²⁷ Mbunga ikwavo ya vaLevi, vaka-cikota ca Ngeleshone, vatambwile vinganda vivali kulitambelo lya Manase wa mu Ngangela, mazina avyo, Ngolane mu Mbashane, (yapwile nganda imo mwakutewela), na Mbeshetela, amolika na mitambela yakulila vimuna vavo.

²⁸ Co ku mutambela wa Isakale vavaaneneko vinganda viwana, mazina avyo, Kishiyone, na Ndambelate,

²⁹ na Njalemute, na Enganime, amolika na mitambela yakulila vimuna vavo.

³⁰ Co ku mutambela wa Ashele vavaaneneko vinganda viwana, mazina avyo, Mishale, na Ambendone,

³¹ na Helekate, na Lehombe, amolika na mitambela yakulila vimuna vavo.

³² Co ku mutambela wa Nafetali vavaaneneko vinganda vitatu, mazina avyo, Kendeshe mu Ngalileya (yapwile nganda imo mwakutewela), amolika na mitambela yakulila vimuna vavo, na Hamote Ndole, na Kaletane, amolika na mitambela yakulila vimuna vavo.

³³ Ngecivene, naanga yoshe ya cikota ca Ngeleshone vatambwile vinganda vyoshe likumi na vitatu amolika na mitambela yakulila vimuna vavo.

³⁴ Co vaLevi vaje vasaleleo, vaka-cikota ca Melali, vavaaneneko vinganda viwana ku mutambela wa Zembuloni, mazina avyo, Njokename, na Kaleta,

³⁵ na Ndimena, na Nahalale, amolika na mitambela yakulila vimuna vavo.

³⁶ Co ku mutambela wa Luvena vavaaneneko vinganda viwana, mazina avyo, Mbezele, na Njahaze,

³⁷ na Kendemote, na Mefate, amolika na mitambela yakulila vimuna vavo.

³⁸ Co ku muyati wa Ngande vavaaneneko vinganda viwana, mazina avyo, Lamote mu Ngilyande (yapwile nganda imo mwakutewela), amolika na mitambela yakulila vimuna vavo, na Mahanaime,

³⁹ na Heshevone, na Njazele, amolika na mitambela yakulila vimuna vavo.

⁴⁰ Ngecivene, vinganda vyoshe vivaaneneko vaka-cikota ca Melali vyapwile likumi na vivali.

⁴¹ Ngecivene, ku livu lije livashwanene vanu va Isalele, vaLevi vavaneneko vinganda makumi awana na vitanu na vitatu amolika na mitambela yakulila vimuna vavo.

⁴² Co nganda na nganda eyi mwakele mitambela yakulila vimuna ije yazengelekeleko.

VaIsalele vavaana livu

⁴³ Ngecivene, Shukulu Kalunga waanene vaIsalele livu lyoshe lije lyalikumiiye na vakukulwila vavo ngeci akavanalyo. Omo valitambwile, co vatungilemo.

⁴⁴ Co Shukulu Kalunga wavaanene kwoloka mu mitambela yoshe ya lifuti, ngwe muje mwakulaesele vakukulwila vavo. Co citozi cavo naumo wai wasele kwimana nakuvalwisa lalo, omwo Shukulu Kalunga wahyanesele vaIsalele ku vitozi vavo voshe.

⁴⁵ Shukulu Kalunga wanyungile vikulaeso vyoshe vije vyalingile na vanu va Isalele.