Yoshwa 20 - Livulu lya Shukulu Kalunga

Vinganda mwakutewela

¹ Asinoni Shukulu Kalunga walekele Yoshwa

² ngeci aleke vanu va Isalele ngwendi, “Angula vinganda mwakutewela vije njashikile Mosesa ngeci akulekevyo.

³ Nga munu umo atsiya mukwavo kwakujeneka mulonga nambe kujeneka kuzivuka ase kutewelamo ngeci munu uje ashaka kumulinga shambandinga kesi amuwane.

⁴ Ikeye asa kutewela ku nganda imo ya vinganda vije, co akemana ku cikolo ca nganda ku mutambela uje wakusompesela, nakulangulula kuli vantwama vije vinalingiwa. Co vakamutava kukala mu nganda, vakamwana mutambela wakukalamo, ngecivene, ikeye ase kukala muje.

⁵ Nga munu ashaka kulinga shambandinga, co amukava kuje, vanu va muje mu nganda kuvapandele kumwanaye embwe. Vakevo vanapande kumunyunga omwo ikeye natsiile munu kwakujeneka mulonga kesi mu vutozi embwe.

⁶ Ikeye akakala vene mu nganda ije noo vakamusompa mu mbunga, co lalo noo kutsa kwa Muka-kukombelela Wakama. Asinoni uje munu natsiile mukwavo akeluka kwimbo ku njuvo yendi, kuje kwatundile.”

⁷ Ngecivene, mu kangombe ka yambi ya Yondau vaangunwine Kendeshe mu Ngalileya, mu lifuti lya malundu lya Nafetali, na Shekeme yakele mu lifuti lya malundu lya Efalime, na Hevelone yakele mu lifuti lya malundu lya Yunda.

⁸ Co musambwa ya Ndonga ya Yondau mu ngangela ya Yeliko, vaangwile Mbezele yakele mu mutambela wa Luvena, co Lamote mu Ngilyande, yakele mu mutambela wa Ngande, na Ngolane mu Mbashane yakele mu mutambela wa Manase.

⁹ Evi vikevyo vinganda mwakutewela vivaangwile vanu va Isalele voshe na vaka-kwija vaje vakele akati kavo. Ngeci munu woshe uje atsiya mukwavo kwakujeneka mulonga akawaneko ngila yakumunyunga kutewa munu uje ashaka kumulinga shambandinga, co ikeye kuvakamutsii kuvanga akulivanga vamusompe ku mbunga.