Yoshwa 2 - Livulu lya Shukulu Kalunga

Yoshwa atuma vaka-kunenga ku Yeliko

¹ Asinoni Yoshwa watumine vaka-kunenga vavali mu vushweke kutunda mu cilombo ca ku Mungongo ngwendi, “Yeni mukanenge lifuti lya Kanana, vunene-nene nganda ya Yeliko.” Omo vetele ku nganda, co vakovelele mu njuvo ya cikwizi umo lizina lyendi Lahave.

² Co mwene wa mu Yeliko wazivile ngwavo kuli vaIsalele vamo vanaija vutsiki nakunenga lifuti,

³ ngecivene, watumine lijwi kuli Lahave ngwendi, “Tuula ovo vanalume vali mu njuvo yove vanaija nakunenga lifuti lyoshe.”

⁴ Oloni uje munakazi te nashweke laja vaje vanalume vavali, co wendekele ngwendi, “Mwa vushunga, vaje vanalume vanezile kuli yange, oloni kunjizivuka oku kuvanatundu.

⁵ Co omo tekanda vashoke ku cikolo a simbu ya cingwezi, vaje vanalume vaile, oloni oku vanaila kunjizivukako. Vazambwileni muvakave, muvawana.”

⁶ Oloni Lahave wavatwalele akamwa ya ciluli ca njuvo cakusivama, co wavashwekele mu kalyaule kaje washandele akamwa ya ciluli ca njuvo.

⁷ Ngecivene, vaje vanu va mwene vatuukile mu nganda, co vaka-kunyunga vashokele cikolo. Vaile nakukengezeka vaje vaIsalele vaka-kunenga lifuti ku ngila yakujavukila ku Ndonga ya Yondau.

⁸ A vutsiki vuje vene, vaje vaka-kunenga simbu kanda vacilale, Lahave walondele kuli vakevo kwilu a ciluli cakusivama ca njuvo

⁹ wendekele kuli vakevo ngwendi, “Njazivuka ngeci Shukulu Kalunga namyana lifuti eli. Munu na munu alinakulijajela mu lifuti lino omwo yeni.

¹⁰ Twazivile muje Shukulu Kalunga womisile cau Mema a Kalunga Akuvenga kulutwe lweni omo mwatundile ku Ingito. Co twazivile lalo omo wanyongesele vimyene vavali va vaAmoli, Sihone, na Onge, vaje vakele mu ngangela musambwa ya Yondau.

¹¹ Omo twazivile vyuma evi, vimbunge vyetu vyazeyele, co tuvavoshe twalijujukilile omwo yeni, omwo Shukulu Kalunga Njambi yeni wapwa Njambi wa mwilu na ano asi.

¹² Cooni ololo lisingeni mu lizina lya Shukulu Kalunga ngweni mukalinga mwamuvwa nakuzivila ngozi vavushoko vwange ngwe omo yange njinamwesa ngozi kuli yeni. Njaneni cimweso cimo ngeci njimikulaele

¹³ ngwange mukamene tate, na vanana, na vandolome vange, na vamunanana, na naanga yavo yoshe ku kutsa.”

¹⁴ Co vaje vanalume vendekele kuli ikeye ngwavo, “Tutse tunyangwe nga kutulingi ngwe mutunendeka. Nga kuulekako munu umo evi vitulinga, co tukukulaesa ngwetu omo Shukulu Kalunga akatwana lifuti eli, co tukakulinga mwamuvwa.”

¹⁵ Asinoni Lahave watuwisilile vaje vanalume mu njanena nakuvasosela asi na mukole, omwo njuvo yendi vaitungilile kumukulo wa civumbe ca nganda.

¹⁶ Co wavalekele ngwendi, “Yeni ku lifuti lya malundu, amo vanu va mwene vamiwana, vandeni kuje matangwa atatu noo vanelukamo. Co omo vineti evi, mwasa kuya vungenzi vweni.”

¹⁷ Vaje vanalume valekele Lahave ngwavo, “Tukanyunga cisingo eci ciwunatusingisa.

¹⁸ Omo tukakovela mu lifuti lyeni, unapande kulinga eci, ukakuta ou mukole wakuvenga ku njanena eyi iwunatusosela asi. Co ukasana isho, na vanyoko, na vandolome vove, amo na vavushoko vwa isho voshe mu njuvo yove.

¹⁹ Nga munu umo akaya anja kutunda mu njuvo, nga akatsa, co ukapwa mulonga wendi, yetu kutukakala na mulonga embwe, oloni nga munu umo ali mu njuvo akavulumuka, co tukakala na mulonga.

²⁰ Oloni nga ulekako munu umo vyuma evi vitunalingi, co tukasamba ku cisingo eci ciwunatusingisa.”

²¹ Co Lahave watavele ngwendi, “Cilingiwe ngwe mumunendeka.” Co wavecelele vaile. Omo vanai laja, wakutiiye mukole wakuvenga ku njanena.

²² Omo vaje vaka-kunenga vaile ku lifuti lya malundu nakukavandako, co vanu va mwene vavashakezekele mu lifuti mwoshe matangwa atatu, oloni kuvavawanene, ngecivene, velukile ku Yeliko.

²³ Asinoni vaje vaka-kunenga vavali vatundile ku malundu, vajavukile ndonga, co velukile kuli Yoshwa nakumuleka vyuma vyoshe vije vyalingiwile.

²⁴ Co vendekele ngwavo, “Mwa vushunga Shukulu Kalunga natwana lifuti lyoshe. Co vanu voshe vanalijujukila omwo yetu.”