Yoshwa 19 - Livulu lya Shukulu Kalunga

Mutambela uvaanene kuli Simyoni

¹ Mutambela wamucivali vawanene ku vatekulwila va Simyoni. Mutambela wavo wakele mukati ka livu livaanene ku muyati wa Yunda.

² Kukumbasanako na Mbeleshemba, na Shemba, na Molanda,

³ na Hazale, na Shuwale, na Mbala, na Ezeme,

⁴ na Eletolande, na Mbetule, na Holema,

⁵ na Zikelange, na Mbete Malekambote, na Hazale Susa,

⁶ na Mbete Lembaote, na Shaluhene. Vyapwile vinganda likumi na vitatu, amolika na vinganda vije vyavizengelekele.

⁷ Co kwakele lalo Aine, na Limone, na Etale, na Ashane. Vyapwile vinganda viwana, amolika na vinganda vije vyavizengelekele,

⁸ kukumbasanako na vinganda vyoshe vije vyazengelekele vinganda evi kweta na ku Mbalate Mbele ikeyo Lama, mu mbwela. Eli likelyo livu livatambwile vatekulwila va Simyoni kupwa vushwana vwavo.

⁹ Lifuti lije livaanene Yunda lyapwile lyakama manene kutuvakana mulyapandele kupwa, co mutambela umo vawanene kuli vatekulwila va Simyoni.

Mutambela uvaanene kuli Zembuloni

¹⁰ Mutambela wamucitatu vawanene kuli vatekulwila va Zembuloni. Livu livavaanene lyetele na ku Salinde.

¹¹ Kutunda kuje nginga yakengeselele mu kangombe ka yambi ku Maleale, kweta na ku Ndambeshete, na ku muna ndonga mu ngangela ya ku Njokename.

¹² Co ku mutambela ukwavo wa Salinde nginga yakengeselele mu ngangela ku nginga ya Kiselote Tambole, asinoni yakengeselele lalo ku Ndambelate, co yetele ku Njafiya.

¹³ Co yaile mu ngangela kutunda kuje kweta ku Ngate Hefele, na ku Etekazine, co yatengulukile kukenga ku Neya ku ngila yakuya ku Limone.

¹⁴ Co ku kunto lalo nginga yatengulukile kukenga ku Hanatone, co yahwililile ku Cana ca Ifetahele.

¹⁵ Co yakumbasaneneko Katate, na Nahalale, na Shimelone, na Indala, na Mbetelehema. Vyapwile vinganda likumi na vivali, amolika na vinganda vije vyavizengelekele.

¹⁶ Co vinganda evi na membo avyo vyakele mu livu lya vatekulwila va Zembuloni livatambwile kupwa vushwana vwavo.

Mutambela uvaanene kuli Isakale

¹⁷ Mutambela wamuciwana vawanene kuli vatekulwila va Isakale.

¹⁸ Co mutambela wavo wakumbasaneneko Njezelele, na Kesulote, na Shuneme,

¹⁹ na Hafalaime, na Shione, na Anahalate,

²⁰ na Lambite, na Kishiyone, na Embeze,

²¹ na Lemete, na Enganime, na Enehanda, na Mbetepazeze.

²² Co nginga lalo yetele ku Tambole, na Shahazuma, na Mbete Shemeshe, co yahwililile ku Ndonga ya Yondau. Kukumbasanako vinganda likumi na vitanu na imo amolika na vinganda vije vyavizengelekele.

²³ Vinganda evi na membo avyo vyakele mu livu lya vatekulwila va Isakale livatambwile kupwa vushwana vwavo.

Mutambela uvaanene kuli Ashele

²⁴ Mutambela wamucitanu vawanene kuli vatekulwila va Ashele.

²⁵ Co mutambela wavo wakumbasaneneko Helekate, na Hali, na Mbetene, na Akeshafe,

²⁶ na Alame Meleke, na Amande, na Mishale. Co mu kangombe ka yambi nginga yetele ku Kalemele, na ku Shihole Limbenate.

²⁷ Co nginga yakengeselele mu ngangela, yaketele ku Mbetendangone, co yetele ku Zembuloni, na ku Cana ca Ifetahele a ngila ya ku kunto ku Mbetemeke, na ku Neyele. Co yaile ku kunto kweta ku Kambule,

²⁸ na Embelone, na Lehombe, na Hamone, na Kana, kweta na ku Sindone.

²⁹ Asinoni nginga yatengulukilile ku Lama, co yetele ku nganda ya cimpaka ya Tile, asinoni yatengulukilile ku Hosa, co yahwililile ku Lishali lya Menditelenyani. Kukumbasanako Mahalambe, na Akezimbe,

³⁰ na Umema, na Afeke, na Lehombe. Vyapwile vinganda makumi avali na vivali, amolika na vinganda vije vyavizengelekele.

³¹ Vinganda evi na membo avyo vyakele mu mutambela wa lifuti lya vatekulwila va Ashele livatambwile kupwa vushwana vwavo.

Mutambela uvaanene kuli Nafetali

³² Mutambela wamucitanu naumo vawanene kuli vatekulwila va Nafetali.

³³ Nginga yawo yatundile ku Hefele ku muti wa Oke mu Zananime, nakweta ku Andaminekembe, na ku Njaminiya, na ku Lakume, co yahwililile mu Ndonga ya Yondau.

³⁴ Co nginga yatengulukilile mu kangombe ka yambi ku Azenote Tambole, kutunda kuje yetele ku Hukoke, co yetele lalo ku mutambela wa Zembuloni ku mbwela, co mutambela wa Ashele wakele mu kangombe ka yambi, co Yondau yakele mu ngangela.

³⁵ Co vinganda vya vimpaka vyapwile, Zindime, na Zele, na Hamate, na Lakate, na Kinelete,

³⁶ na Andama, na Lama, na Hazole,

³⁷ na Kendeshe, na Endeleyi, na Enehazole,

³⁸ na Ilone, na Mingendalele, na Holeme, na Mbetenate, na Mbete Shemeshe. Vyapwile vinganda likumi na vitanu na viwana, amolika na vinganda vije vyavizengelekele.

³⁹ Vinganda evi na membo avyo vyakele mu livu lya vatekulwila va Nafetali livatambwile kupwa vushwana vwavo.

Mutambela uvaanene kuli Ndani

⁴⁰ Mutambela wamucitanu na ivali vawanene vatekulwila va Ndani.

⁴¹ Mutambela wavo wakumbasaneneko Zola, na Eshetawole, na Ileshemeshe,

⁴² na Shalembime, na Ainjalone, na Itela,

⁴³ na Elone, na Timena, na Ekelone,

⁴⁴ na Eleteke, na Ngimbetone, na Mbalate,

⁴⁵ na Njehunde, na Mbenembelake, na Ngatelimone,

⁴⁶ na Menjalekone, na Lakone, kweta na ku mutambela uje wazengelekele Yopa.

⁴⁷ Omo vanu va Ndani vonwele kutambula livu lyavo, co vaile nakulwisa Laishe, co vaifungulwile, vatsiile vanu vamwo, co vatambwile livu lije. Ngecivene, vatungile muje nakutengulula lizina lya nganda ya Laishe ngwavo Ndani, vailukile lizina lya kukulwila yavo Ndani.

⁴⁸ Vinganda evi na membo avyo vyakele mu livu lya vatekulwila va Ndani livatambwile kupwa vushwana vwavo.

Mutambela wakumanesela uvaanene kuli Yoshwa

⁴⁹ Omo vanu va Isalele vamanesele kupangezela livu, co vaanene Yoshwa muna Nune mutambela umo wa livu kupwa vushwana vwendi.

⁵⁰ Ngwe muje mwashikile Shukulu Kalunga, vamwanene nganda ije yalombele, Timenate Sela, mu lifuti lya malundu lya Efalime. Co ikeye watungililemo nganda nakutumbama muje.

⁵¹ Co Elyazale muka-kukombelela, na Yoshwa muna Nune, na vantwama va vikota vya miyati ya Isalele vaanene mitambela eyi ya livu mukwihula kuli Shukulu Kalunga akuta n̄ela ku Shilo, valingile vyoshe evi ku cikolo ca Mbalaka Mwakuliwanena. Co mu ngila eyi vamanesele kupangezela livu.