Yoshwa 18 - Livulu lya Shukulu Kalunga

Vapanga lifuti lije lyasaleleo

¹ Omo vaIsalele vanatambula laja lifuti, co mbunga yoshe valikungulwilile ku Shilo, vashimbikile Mbalaka Mwakuliwanena.

² Oloni kwacisalele miyati itanu na ivali ya vaIsalele vaje kuvatambwile livu lyavo.

³ Ngecivene, Yoshwa wendekele kuli vanu va Isalele ngwendi, “Mukatatamena simbu yakupwa aka, ngeci muye nakutambula lifuti lije lyanamyana Shukulu Kalunga Njambi ya vakukulwila veni?

⁴ Anguleni vanalume vatatu ku muyati na muyati ngeci njivatume vaye nakusoneka mu lifuti lyoshe lije livashaka ngeci valisoneke lipwe vushwana vwavo. Asinoni vakeluka lalo kuli yange.

⁵ Co lije livu vakalipangezelalyo akati kavo mu mitambela itanu na ivali. Muyati wa Yunda ukakala ku mutambela wa ku mbwela, co vatekulwila va Yosefa vakakala ku mutambela wa ku kunto ya lifuti.

⁶ Sonekeni mwamuvwa na vutongwe mitambela eyi itanu na ivali, co muyinene kuno kuli yange. Asinoni njakuta n̄ela nakwihula kuli Shukulu Kalunga Njambi yetu ali yeni.

⁷ Nameme ngoco, vaLevi kuvakatambula mutambela umo wa lifuti kupwa vushwana vwavo amo neni, omwo vushwana vwavo vwapwa vwa vuka-kukombelela. Mwa vushunga vene, miyati ya Ngande, na Luvena, na litambelo lya Manase wa mu Ngangela vanatambula laja livu lyavo mu ngangela ya Yondau, lije lyavaanene Mosesa ngamba ya Shukulu Kalunga.”

⁸ Ngecivene, vaje vanalume vaile vungenzi vwavo nakusoneka livu omo Yoshwa wavashikile ngwendi, “Endanganeni nakukamona livu lyoshe nakulisoneka mwamuvwa, co mukeluke lalo kuli yange. Asinoni kuno vene ku Shilo, njakuta n̄ela nakwihula Shukulu Kalunga ali yeni.”

⁹ Ngecivene, vaje vanalume vaile nakwitangana a livu lyoshe nakusoneka muvakalipangezela mu mitambela itanu na ivali, co vasonekele mazina a vinganda. Asinoni velukile kuli Yoshwa ku cilombo ca ku Shilo.

¹⁰ Co Yoshwa watele n̄ela ku Shilo nakwihula Shukulu Kalunga ali vakevo, co ikeye waanene livu ku muyati umo na umo wa Isalele vaje vasaleleo.

Mutambela uvaanene kuli Mbenjemani

¹¹ Mutambela wa vatekulwila va Mbenjemani ukewo valivangele kwana. Co mutambela wavo wakele mukati ka vatekulwila va Yunda na vatekulwila va Yosefa.

¹² Co nginga yavo ya ku kunto yashangumukilile ku Ndonga ya Yondau asinoni yalamatele kwakungulumuka ku kunto ya Yeliko, co yakengeselele ku lifuti lya malundu mu kangombe ka yambi nakweta mu mambo ya Mbetevane.

¹³ Co nginga yetile kwakungulumuka ku mutambela wa ku mbwela ya Luze, ije ivatumbwile lalo ngwavo Mbetele, co yashelumukile ku Atalote Andale, a munkinda wa ku mbwela ya Mbete Holone ya mu Cimbongo.

¹⁴ Co nginga yaile ku mutambela ukwavo, yatengulukilile ku mbwela kutunda ku munkinda wa mu kangombe ka yambi nakweta ku Kilyate Mbale, nambe Kilyate Njelime, yapwile ya muyati wa Yunda. Eyi ikeyo yapwile nginga ya mu kangombe ka yambi.

¹⁵ Co nginga ya ku mbwela yashangumukilile kumukulo wa Kilyate Njelime, co yakengeselele ku masima a Nefetowa.

¹⁶ Co yashelumukilile kwisi ya munkinda uje walishungamene na Cana ca Hinome, ku shongo ya Cana ca Lefaime ku kunto. Co yakengeselele lalo ku mbwela mukati ka Cana ca Hinome, ku mbwela ya vaNjevushi kuje yetele ku Enelongele.

¹⁷ Co yelukile lalo ku kunto ku Eneshemeshe asinoni yatwaleleo na ku Ngelilote, yalishungama na Ngila ya Andumime. Co nginga yashelumukile ku Limanya lya Mbohane, Mbohane wapwile muna Luvena,

¹⁸ co lalo yetile ku kunto kumukulo wa munkinda uje walishungama na Cana ca Yondau. Asinoni yashelumukile mu cana,

¹⁹ co nginga yetile ku kunto kumukulo wa Mbete Hongela, co yahwililile kushango ku kunto ya Lishali lya Mwongwa, kuje kushango ya Ndonga ya Yondau. Eyi ikeyo nginga ya ku mbwela.

²⁰ Ndonga ya Yondau ikeyo yapwile nginga ya mu ngangela. Evi vikevyo vinginga vya livu lije mwakele muyati wa Mbenjemani livatambwile kupwa vushwana vwavo.

²¹ Vinganda vije vyapwile vya vatekulwila va Mbenjemani mazina avyo, Yeliko, na Mbete Hongela, na Emeki Kezize,

²² na Mbete Alamba, na Zemalaime, na Mbetele,

²³ na Avime, na Pala, na Ofela,

²⁴ na Kefalamoni, na Ofeni, na Ngemba. Vyapwile vinganda likumi na vivali, amolika na vinganda vije vyavizengelekele.

²⁵ Co kwakele lalo Ngimbiyone, na Lama, na Mbelote,

²⁶ na Mizipa, na Kefila, na Moza,

²⁷ na Lekeme, na Ilepele, na Talala,

²⁸ na Zela, na Haelefe, na Njevushi, ikeyo Yelusalema, na Ngimbeya, na Kilyate Njelime. Vyapwile vinganda likumi na viwana, amolika na vinganda vije vyavizengelekele. Eli likelyo livu livatambwile vatekulwila va Mbenjemani kupwa vushwana vwavo.