Yoshwa 15 - Livulu lya Shukulu Kalunga

Mutambela uvaanene kuli Yunda

¹ Mutambela wa muyati wa vatekulwila va Yunda, wetele ku nginga ya Endome na ku mambo ya Zine ku mbwela.

² Nginga yavo ya ku mbwela yatundile ku shongo ya Mema a Kalunga a Kutsa,

³ co yakengeselele ku mbwela ku vulamatelo vwa Ngila ya Akelambime kutwala ku Zine. Yetile ku mbwela ya Kandeshe Mbaleneya, co yetile ku Hezelone nakulamata ku Andale, yongolokele ku Kaleka,

⁴ yetele ku Azemone, co yakavele muna ndonga ije yakele ku nginga ya Ingito nakweta ku Lishali lya Menditelenyani, kuje kukekwo kuyahwililile nginga. Eyi ikeyo yapwile nginga ya ku mbwela ya lifuti lya Yunda.

⁵ Co nginga ya mu ngangela yapwile Lishali lya Kutsa nakweta aje ayashangela Ndonga ya Yondau. Co nginga ya ku kunto yatundile ku cana ca Lishali lya Kutsa,

⁶ yalamatele ku Mbete Hongela, nakweta ku kunto kuje kwaliwanenene Cana ca Yondau. Asinoni yalamatele lalo na ku Limanya lya Mbohane, (Mbohane wapwile muna Luvena),

⁷ co nginga yalamatele kutunda ku Cana ca Tuyando nakuya ku Ndembile, asinoni yazengulukile ku kunto ku Ngilingale, kushungama na vulamatelo vwa Ngila ya Andumime ku mutambela wa cana ca mu mbwela. Co nginga yetile ku masima a tuvwelu-vwelu a ku Eneshemeshe, co yaile lalo ku Enelongele,

⁸ asinoni nginga yetile mu Cana ca Hinome, ku mutambela wa ku mbwela ya lilundu kuje kwakele nganda ya vaNjevushi ikeyo Yelusalema. Co nginga yalamatele a lilundu ku mutambela wa ka ngombe ka yambi ya Cana ca Hinome, ku shongo ya ku kunto ya Cana ca Lefaime.

⁹ Co nginga yetile akamwa ya lilundu nakweta ku masima a tuvwelu-vwelu a ku Nefetowa, yakengeselele ku vinganda vya muyehi na Munkinda wa Efelone. Co kutunda aje yakengeselele ku Mbala ikeyo Kilyate Njelime,

¹⁰ kuje kwongolokelele nginga mu kangombe ka yambi ya Mbala nakweta ku lifuti lya malundu ku Endome, likelyo lifuti lya Seya, co yakengeselele lalo ku mutambela wa ku kunto ya Munkinda wa Njelime (nambe Kesalone), kushelumukila ku Mbete Shemeshe, nakweta ku Timena.

¹¹ Co nginga yakengeselele ku vushelumukilo vwa lilundu lya Ekelone ku kunto, co yakengeselele ku Shikelone, yetile ku Munkinda wa Mbala, yetile ku Njameniya, co yahwililile ku Lishali lya Menditelenyani.

¹² Co ngenge ya Lishali lya Menditelenyani ikeyo yapwile nginga ya mu kangombe ka yambi. Mu vinginga evi mukemwo muvakele vatekulwila va muyati wa Yunda.

Kalembi afungulula Hevelone na Ndembile

¹³ Co Kalembi muna Njefune wa ku muyati wa Yunda vamwanene litambelo lya mutambela wa Yunda ngwe muje mwashikile Shukulu Kalunga kuli Yoshwa. Watambwile nganda ya Hevelone, ikeyo nganda ya Alemba ishe ya Anake.

¹⁴ Co muje mu nganda Kalembi washekelemo vatekulwila va Anake, vikota vya Sheshai, na Ahimane, na Talemai.

¹⁵ Co kutunda aje waile nakulwisa vanu vaje vakele mu Ndembile, ije nganda akulivanga yapwile Kilyate Sefele.

¹⁶ Co Kalembi wendekele ngwendi, “Njikashombwesa munange Akesa kuli munalume uje akafungulula Kilyate Sefele.”

¹⁷ Asinoni Otenyele, muna Kenaze ndolome ya Kalembi, ikeye waifungulwile, ngecivene, Kalembi washombwesele munendi Akesa kuli Otenyele.

¹⁸ A litangwa lya ciwano ca vulo Otenyele wasindiiye Akesa ngeci alombe lihya kuli ishe, co Akesa washulukile a cimulu cendi, co Kalembi wamwihwile ngwendi, “Vikajo ushaka?”

¹⁹ Akesa wamukumbulwile ngwendi, “Njishaka munjane masima a mema a tuvwelu-vwelu, omwo lifuti lije munanjana lyapwa lyakuma.” Ngecivene, Kalembi wamwanene masima a tuvwelu-vwelu a ku cava nawa a ku shango.

Vinganda vya Yunda

²⁰ Ovu vukevwo vushwana vwa vatekulwila va muyati wa Yunda,

²¹ Vinganda vya ku shongo ya lifuti lya vatekulwila va Yunda vyakele kuyehi na nginga ya Endome mu mbwela, mazina avyo, Kambezele, na Endele, na Njangule,

²² na Kina, na Ndimona, na Andanda,

²³ na Kendeshe, na Hazole, na Itenane,

²⁴ na Zife, na Teleme, na Mbelote,

²⁵ na Hazole Handata, na Kelyote Hezelone ikeyo Hazole,

²⁶ na Amame, na Shema, na Molanda,

²⁷ na Hazale Nganda, na Heshemone, na Mbete Pelete,

²⁸ na Hazale Shuwale, na Mbeleshemba, na Mbiziyotiya,

²⁹ na Mbala, na Yime, na Ezeme,

³⁰ na Eletolande, na Kesile, na Holema,

³¹ na Zikelange, na Mandemana, na Sanesana,

³² na Lambaote, na Shilehime, na Aine, na Limone. Vinganda evi vyoshe vyapwile makumi avali na vitanu na viwana, kukumbasanako na vinganda vije vyavizengelekele.

³³ Vinganda vyakele mu lifuti lya kushelama mazina avyo, Eshetawole, na Zola, na Ashena,

³⁴ na Zanowa, na Enganime, na Tapuwa, na Ename,

³⁵ na Njalemute, na Andulame, na Soko, na Azeka,

³⁶ na Shalaime, na Anditaime, na Ngendela, na Ngendelotaime. Vinganda evi vyoshe vyapwile likumi na viwana, kukumbasanako na vinganda vije vyavizengelekele.

³⁷ Co lalo kwakele Zenane, na Handasha, na Mingendalengande,

³⁸ na Ndilyane, na Mizipa, na Njoketele,

³⁹ na Lakishe, na Mbozekate, na Engelone,

⁴⁰ na Kambone, na Lahemame, na Kitelishe,

⁴¹ na Ngendelote, na Mbete Ndangone, na Naama, na Makenda. Vinganda vyoshe evi vyapwile likumi na vitanu na imo, kukumbasanako na vinganda vije vyavizengelekele.

⁴² Co lalo kwakele Limbena, na Etele, na Ashane,

⁴³ na Ifeta, na Ashena, na Nezimbe,

⁴⁴ na Keila, na Akezimbe, na Malesha. Vinganda vyoshe evi vyapwile vitanu na viwana, kukumbasanako na vinganda vije vyavizengelekele.

⁴⁵ Co lalo kwakele Ekelone na vinganda vyayo na membo ayo,

⁴⁶ na vinganda vyoshe na membo aje akele muyehi na Ashendonde, kutunda ku Ekelone nakweta ku Lishali lya Menditelenyani.

⁴⁷ Co lalo kwakele Ashendonde na vinganda vyayo na membo ayo, na Ngaza na vinganda vyayo na membo ayo, vyetele na ku muna ndonga ku nginga ya Ingito na ku ngenge ya Lishali lya Menditelenyani.

⁴⁸ Co ku lifuti lya malundu kwakele Shamile, na Njatile, na Soko,

⁴⁹ na Ndana, na Kilyate Sefele (ikeyo Ndembile,)

⁵⁰ na Anambe, na Eshetemowa, na Anime,

⁵¹ na Ngoshene, na Holone, na Ngilo. Vinganda vyoshe evi vyapwile likumi na imo, kukumbasanako na vinganda vije vyavizengelekele.

⁵² Co lalo kwakele Alambe, na Nduma, na Eshane,

⁵³ na Njamine, na Mbete Tapuwa, na Afeka,

⁵⁴ na Humeta, na Kilyate Alemba (ikeyo Hevelone,) na Ziyole. Vinganda vyoshe evi vyapwile vitanu na viwana, kukumbasanako na vinganda vije vyavizengelekele.

⁵⁵ Co lalo kwakele Mayone, na Kalemele, na Zife, na Njuta,

⁵⁶ na Njezelele, na Njokendeme, na Zanowa,

⁵⁷ na Kaine, na Ngimbeya, na Timena. Vinganda vyoshe evi vyapwile likumi kukumbasanako na vinganda vije vyavizengelekele.

⁵⁸ Co lalo kwakele Halehule, na Mbetezule, na Ngendole,

⁵⁹ na Malate, na Mbete Anote, na Eletekone. Vinganda vyoshe evi vyapwile vitanu na imo, kukumbasanako na vinganda vije vyavizengelekele.

⁶⁰ Co lalo kwakele Kilyate Mbale (ikeyo Kilyate Njelime), na Lamba. Vinganda vyoshe evi vyapwile vivali, kukumbasanako na vinganda vije vyavizengelekele.

⁶¹ Co mu mambo mwakele Mbete Alamba, na Mindine, na Sekaka,

⁶² na Nimbeshane, na Nganda ya Mwongwa, na Engendi. Vinganda vyoshe evi vyapwile vitanu na imo, kukumbasanako na vinganda vije vyavizengelekele.

⁶³ Oloni vanu va Yunda kuvashekelemo vaNjevushi vaje vakele mu Yelusalema. Ngecivene, vaNjevushi na lelo lino vacili nakukala amolika na vanu va Yunda.